Samting i Winim Samting Yumi Kisim Nating

KLOSTU olgeta man i bin pilai laki, bipo sindaun bilong ol i orait liklik, tasol taim ol i pilai laki, sindaun bilong ol i go nogut. Na planti taim ol wan wan man i kisim bikpela winmani ol i kisim save olsem, dispela mani i no rot bilong painim amamas.

Wanpela man singel bilong Japan, em i winim 45 tausen kina long laki-tiket. Em i ting long baim wanpela haus long dispela mani, tasol planti man i bel nogut long em na toktok planti, na dispela i mekim na em i no amamas. Ol wanwok bilong dispela man i kirap nogut taim em i kukim dispela laki-tiket long ai bilong ol.

Wanpela meri long Florida i kisim 5 milion kina long laki-tiket, tasol ol polis i holim em, long wanem, em i laik kilim i dai tambu bilong em. Pikinini man bilong dispela meri i tok, mama bilong em i bel hevi, long wanem, bikpela hap mani bilong em i lus long sampela bisnis, na tu em i tromoi nating mani long baim ol samting.

Man Bilong Lus i Kamap Man Bilong Win

Domingo i gat 5-pela pikinini na bipo em i kalabus tru long pilai laki. Em i tok: ‘Sapos mi kisim winmani mi ting mi wanpela hapman stret, na mi mas pilai gen bilong truim dispela tingting.

‘Dispela kain tingting i olsem wanpela drak mi no inap lusim. Mi redi long lusim meri pikinini bilong mi bambai mi ken pilai laki yet. Planti taim mi tok promis long meri bilong mi bai mi lusim olgeta pilai laki, tasol mi save giaman. Mi tingim wanpela taim mi tokim meri bilong mi, mi no ken tru pilai laki gen, tasol taim mi mekim dispela tok, mi wok long tingim rot mi ken kisim sampela mani long en bilong pilai laki gen.

‘Olgeta mani bilong mi i lus, na bisnis bilong mi tu i bagarap. Mi gat planti bikpela dinau. I no gat wanpela de mi no bin betim mani, tasol bihain wanpela samting i kamap na em i kirapim mi long tingim gut sindaun bilong mi. Mi kirap na stadi long Baibel wantaim ol Witnes. Mi amamas long ol samting mi lain long en, tasol mi wok yet long pilai laki. Mi amamas tru long wanem, dispela Witnes i bin stadi wantaim mi em i no kros kwik, isi isi em i helpim mi.

‘Kwiktaim tok bilong Baibel i helpim mi. Em i kirapim mi long lusim pasin bilong tingting nating long kisim planti samting na mi kirap skelim pasin bilong mi, em ol pasin i stap ples klia long ai bilong God. Taim mi mekim olsem mi kirap nogut tru na mi sem pipia, olsem ol man em aposel Pol i raitim pas long ol na em i tokim ol: “Yupela i bin kisim wanem gutpela samting long ol pasin yupela i bin mekim bipo, em ol pasin nau yupela i save sem long en? Nogat. Dispela kain pasin i save mekim man i dai tasol.”​—Rom 6:21.

Jisas i tok: “Tok tru bai i mekim yupela i kamap fri.” (Jon 8:32) Dispela tok i kamap tru long mi. Tok tru bilong Baibel i helpim mi long save, i stap bilong mi i gat as bilong en. Wanpela pren bilong mi bilong bipo, em mitupela i bin pilai laki wantaim, mi bin helpim em long senisim pasin bilong em olsem mi bin mekim. Taim em na meri bilong em i kisim baptais mi kisim bikpela amamas tru, na dispela amamas i winim olgeta amamas mi bin kisim taim mi bin kisim winmani.

‘Insait long 20 yia nau mi no bin putim wanpela bet long pilai laki. Tru i hatwok, tasol em i no hatwok tumas. Samting God i bin givim long mi i bin inapim laik tru bilong mi, winim ol samting mi bin wok long painim taim mi pilai laki.’a

Man i laik mekim laik bilong God em i mas save, Baibel i tok wanem long pasin bilong pilai laki. Na ol man i bihainim tok bilong God, ol inap abrusim ol hevi dispela pasin i save kamapim, na ol i save God inap givim ol narapela samting long ol, i winim prais bilong winmoni.

Wanpela Samting i Moa Win

Pol i bin raitim pas na em i tok: “Ol i no ken bilip long [planti mani] samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi amamas. Ol i mas mekim planti gutpela pasin bilong helpim ol arapela manmeri. . . . Sapos ol i mekim olsem, orait ol bai i bungim planti samting bilong helpim ol bihain, na ol bai i kisim dispela laip em i laip tru.”​—1 Timoti 6:​17-19.

Sapos yumi gat gutpela nem long God, em wanpela gutpela samting tru bilong holim. Dispela inap helpim yumi long kisim “laip tru”​—em laip oltaim, em nambawan prais yumi inap kisim. I no gat narapela samting inap winim dispela. Taim Jisas i beten long God, em i tok: “Laip bilong i stap gut oltaim, em i olsem: Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais.”​—Jon 17:3.

Sampela man i save winim wanpela prais, sampela nogat. Tasol maski yumi husat, sapos yumi mekim laik bilong God, yumi olgeta inap kisim prais God i laik givim long yumi. Taim man i mekim laik bilong God dispela inap givim bikpela amamas long em, na i stap bilong em i gat as bilong en. Olsem na taim yu tingim ol hevi pilai laki inap kamapim, tingim wanpela savetok bilong Inglan bilong bipo, em i tok: ‘Gutpela pilai yumi ken mekim long samting bilong pilai satu, em yumi ken kisim na tromoi i go.’

[Ol Futnot]

[Piksa long pes 10]

Kisim laip oltaim long graun paradais i winim tru prais bilong winmoni