Pas Bilong Ol Man

Maritpasin Mi rait long tok tenkyu tru long yupela long kamapim ol dispela stori long “Husat i Mas Lainim Pikinini Long Ol Samting Bilong Maritpasin?” (Disemba 8, 1992) Mi gat tupela pikinini na mi no bin stori liklik long ol long dispela samting. Mi no bin lain long dispela samting tu, olsem na mi no save wanem tok mi bai mekim long ol o olsem wanem mi bai mekim. Tasol bihain mi kaunim ol dispela stori, na mi toktok wantaim narapela narapela long dispela samting. Mi amamas tru long mekim olsem, na mi ting em i wanpela gutpela samting tru papa o mama i ken mekim.

M. A. P., long Spen

Dispela stori i no bilong mekim ol man i kirap nogut, nogat. Em i kamapim klia na em i stori gut long olsem wanem yumi inap lainim ol pikinini bilong yumi. Tenkyu long helpim mi long tingim wok bilong mi long lainim ol pikinini. Tenkyu long kamapim dispela stori, long wanem, em i helpim mi long stretim dispela hevi bilong mi.

V. B., long Frans

Mi wanpela meri na mi gat 25 krismas. Nau mi pilim tru ol stretpela lo bilong God long ol samting bilong maritpasin samting. Amamas bilong pasin pamuk em i giaman tasol. Sapos man i mekim dispela samting, bihain bai bel bilong em i no stap isi moa. Maski mi no stap pikinini o yangpela moa, mi pilim olsem dispela stori i lainim mi long planti gutpela pasin mi ken bihainim.

S. H., long Amerika

Bipo mi no bin kaunim wanpela stori kain olsem dispela. Mi kirap nogut long pasin bilong yupela long lainim ol pikinini long ol samting bilong maritpasin, tasol yupela i helpim ol tu long bihainim stretpela pasin.

N. C., long Itali

Mi mama bilong tupela yangpela meri. Mi bin stori gut long tupela long ol kain kain samting bilong maritpasin. Tasol mi mama bilong tupela manki tu. Wanpela i gat 11-pela krismas na narapela i gat 9-pela krismas. Mi bin stori long sampela samting bilong maritpasin, tasol mi no stori long ol senis em bai kamap long bodi bilong ol. Long apinun mi kisim dispela gutpela nius bilong yupela long pos ofis. Dispela bai helpim mi long stori gut wantaim tupela pikinini man bilong mi long dispela samting.

P. W., long Ostrelia

Mi wanpela yangpela meri. Taim mi kaunim dispela nius, mi kisim planti gutpela save. Papamama bilong mi i no save gut long pasin bilong lainim mipela long ol samting bilong maritpasin. Tasol Jehova i bin helpim mi, na mi no lusim ol stretpela pasin bilong em. Mi laik bai dispela nius i helpim ol papamama em ol i no toktok yet wantaim ol pikinini bilong ol long ol samting bilong maritpasin.

A. M., long Meksiko

Pilai Kriket Mi laik tok tenkyu tru long yupela long pasin bilong yupela long stori long dispela pilai bilong kriket long dispela stori “Kriket na Sofbal​—Tupela Pilai i Wankain?” (Me 8, 1992) Long dispela kantri, planti man i save giaman tasol na wokim ol samting bilong pilai kriket long salim tasol long ol turis. Mi laik bai wanpela taim yupela i ken stori long pasin bilong pilai sofbal. Mipela inap pilai ragbi bilong lain Amerika, tasol mipela i no save long pilai sofbal.

A. E., long Inglan