Skulim Ol Pikinini Bilong Yu Long Bihainim Stretpela Pasin

TAIM ol pikinini bilong yu i liklik yet, yu bin mekim planti samting long haus na bai ol i no ken kisim bagarap. Ating yu karamapim ol pawa poin, haitim ol naip, na banisim gut sait sait bilong lata​—⁠yu mekim olsem bilong ol i no ken kisim bagarap.

Tasol taim ol i kamap tineja, i hatwok moa long banisim ol! Nau yu tingting planti tru: ‘Olsem wanem? Pikinini man bilong mi i save lukim ponografi?’ ‘Pikinini meri bilong mi i save kisim ol doti piksa bilong em yet na salim long mobail fon i go long ol narapela?’ Na papamama i tingting planti moa yet na i askim: ‘Tineja bilong mi i insait long pasin pamuk?’

Bosim Ol Strong

Sampela papamama i traim long was oltaim na glasim gut olgeta samting ol tineja bilong ol i mekim. Tasol bihain planti papamama i painimaut olsem dispela pasin bilong bosim ol strong i mekim na ol pikinini i lain gut long haitim ol pasin bilong ol, em ol pasin papamama i nolaik tru long ol i insait long en.

Tru tumas, i no gutpela long bosim strong ol tineja. God Jehova tu i no save bosim strong ol man bilong kirapim ol long bihainim tok bilong em, olsem na yupela papamama i no ken mekim olsem. (Lo 30:19) Orait, olsem wanem yu inap helpim tineja bilong yu long wokim disisen long bihainim stretpela pasin?​—⁠Sindaun 27:⁠11.

Wanpela gutpela rot em long toktok oltaim wantaim ol, na mekim olsem kirap long taim ol i liklik yet.b (Sindaun 22:⁠6) Orait taim ol pikinini i kamap tineja, toktok yet wantaim ol. Yupela papamama i mas i stap olsem namba wan lain em tineja i ken kisim stretpela save long ol samting. Alicia, wanpela gel long Briten, em i tok: “Planti man i ting mipela i laik toktok wantaim ol pren tasol long ol samting bilong maritpasin, tasol dispela i no tru. Mipela i laik ol papamama i toktok wantaim mipela long ol dispela samting. Mipela i bilip long ol tok bilong ol.”

Ol i Mas i Gat Ol Stretpela Lo

Taim ol pikinini i wok long kamap bikpela, ating ol i save pinis long olsem wanem ol meri i save kisim bel, tasol dispela save tasol i no inap, nogat, ol i mas kisim tu ol tok bilong stiaim ol. Na tu, ol i mas “lainim gut tingting bilong ol long kliagut long wanem samting i stret na wanem samting i no stret.” (Hibru 5:14) Ol i mas i gat ol stretpela lo bilong maritpasin na bihainim ol dispela lo. Olsem wanem yu inap skulim pikinini bilong yu long ol dispela lo?

Pastaim yu mas skelim ol stretpela lo em yu yet i save bihainim. Olsem: Yu holim strong tingting olsem pasin pamuk​—⁠man na meri i no marit i slip wantaim​—⁠i no stret. (1 Tesalonaika 4:⁠3) Ating ol pikinini bilong yu i save long tingting bilong yu long dispela samting na ol inap kamapim ol tok bilong Baibel bilong strongim ol dispela tingting. Taim wanpela i askim ol, ol bai tokaut olsem i no stret long man na meri i slip wantaim paslain long ol i marit.

Tasol yu mas mekim sampela samting moa. Buk Sex Smart i skelim olsem sampela yangpela bai tok ol i wanbel long tingting bilong papamama long ol samting bilong maritpasin. Na buk i tok: “Ol i pilim olsem ol i no gat save inap long ol i ken kamapim tingting bilong ol yet. Taim sampela samting i kamap na ol i mas mekim disisen long ‘wanem samting i stret na wanem samting i no stret,’ ol i no save gut long samting ol i ken mekim na ol i paul olgeta.” Dispela em i as na ol i mas i gat ol stretpela lo. Olsem wanem yu ken helpim pikinini bilong yu long kisim ol dispela stretpela lo?

Kamapim klia tingting bilong yu long stretpela pasin.

Olsem wanem? Yu gat strongpela tingting olsem ol marit tasol i ken slip wantaim? Sapos olsem, orait oltaim yu mas kamapim klia dispela tingting long pikinini bilong yu. Buk Beyond the Big Talk i kamapim tok bilong wanpela wok painimaut olsem “insait long ol famili we papamama i save tokaut klia long ol tineja olsem i no stret long ol tineja i mekim maritpasin, planti taim ol dispela tineja i no save hariap long insait long maritpasin.”

Olsem yumi tok pinis, pasin bilong kolim tasol ol lo long stretpela pasin, dispela i no makim olsem ol pikinini bilong yu bai bihainim ol dispela lo, nogat. Tasol ol strongpela lo bilong stretpela pasin insait long famili bai helpim ol pikinini long ol yet i ken kisim stretpela tingting. Sampela wok painimaut i kamapim olsem taim ol yangpela i kamap bikpela, planti ol i save kisim wankain tingting olsem papamama, maski i luk olsem ol i no laik bihainim ol dispela tok taim ol i yangpela.

Skulim ol long stretpela save long maritpasin.

 Em i bikpela samting long givim tok lukaut long ol pikinini. (1 Korin 6:18; Jems 1:​14, 15) Tasol Baibel i stori long maritpasin olsem wanpela presen i kam long God, na i no wanpela umben bilong Satan. (Sindaun 5:​18, 19; Solomon 1:⁠2) Sapos yu stori tasol long ol samting nogut bilong maritpasin, ol inap kisim tingting kranki we i no stret wantaim ol tok bilong Baibel. Wanpela yangpela meri long Frans, Corrina, em i tok: “Papamama bilong mi i save toktok tumas olsem maritpasin em i samting nogut, na dispela i mekim na mi kisim tingting kranki long pasin bilong man na meri i slip wantaim.”

Skulim gut ol pikinini bilong yu long kliagut long olgeta samting bilong maritpasin. Wanpela mama long Meksiko, Nadia, i tok: “Long olgeta taim mi tokim ol pikinini olsem maritpasin em i wanpela gutpela samting God Jehova i givim long ol man na meri bilong amamas wantaim. Tasol em i samting i stret long ol marit tasol i ken mekim. Pasin yumi bihainim long dispela samting inap makim olsem em bai givim amamas long yumi o nogutim yumi.”

Helpim tineja bilong yu long skelim ol samting inap kamap.

 Bilong wokim ol gutpela disisen long ol samting inap kamap long laip, ol tineja i mas save long ol samting ol inap mekim na skelim gut pastaim ol gutpela samting na ol samting nogut inap kamap long en. No ken ting olsem sapos tineja i save long wanem pasin i stret na wanem pasin i no stret, dispela tasol em inap, nogat. Wanpela mama Kristen long Australia, Emma, i tok: “Taim mi tingim ol rong mi bin mekim taim mi yangpela, mi ken tok olsem sapos man i save tasol long ol lo bilong God, dispela i no makim olsem em i wanbel long en. Em i bikpela samting long yu mas kliagut long ol gutpela samting ol dispela lo i save kamapim na ol samting nogut i save kamap taim man i brukim ol dispela lo.”

Baibel inap helpim yumi, long wanem, planti taim em i kolim ol lo na bihain em i tokaut long ol samting nogut inap kamap sapos man i brukim lo. Olsem: Sindaun 5:​8, 9 i tokim ol yangpela man long sakim pasin pamuk “nogut [ol i] lusim gutpela nem bilong [ol].” Olsem ol dispela ves i kamapim, taim man na meri i slip wantaim paslain long ol i marit, dispela i bagarapim pasin bilong ol, pasim ol long givim bel olgeta long mekim wok bilong God, na ol i no amamas long ol yet. Dispela i mekim na ol narapela husat i bihainim stretpela pasin ol i no laik maritim ol. Sapos tineja bilong yu i tingim ol samting nogut em pasin bilong brukim ol lo bilong God inap mekim long skin, bel na tingting, na long ol samting bilong spirit, dispela inap strongim tingting bilong em long bihainim ol lo bilong God.c

Takao, wanpela yangpela long Japan husat i gat 18 krismas, i tok: “Mi save olsem mi mas bihainim stretpela pasin, tasol long olgeta taim mi hatwok tru long daunim laik bilong skin.” Ol yangpela husat i pilim olsem, ol i ken save olsem ol narapela tu i gat wankain hevi. Aposel Pol, maski em i strongpela Kristen, em i tok: “Taim mi gat laik long mekim pasin i stret, pasin nogut i stap wantaim mi.”​—⁠Rom 7:⁠21.

Ol yangpela i mas save olsem dispela pasin bilong wok strong long daunim laik bilong skin, em i gutpela samting. Em inap kirapim ol long tingim olsem ol i laik kamap wanem kain man. Dispela inap helpim ol long kliagut long dispela askim, ‘Mi laik bosim laip bilong mi na bai ol narapela i save olsem mi gat pasin bilong mi yet na mi save stap gut​—⁠o mi laik bai ol narapela i save olsem mi save bihainim nating ol laik bilong mi yet?’ Sapos pikinini bilong yu i gat ol lo bilong stretpela pasin, dispela bai helpim em long bekim gut dispela askim.