Wara Nogut
OL SAVEMAN long wanpela yunivesiti (Mayor de San Marcos National) long Peru i skelim 30 botol em ol i bin pulapim wara long en ol i kisim long ol ples bilong dring wara na long ol haus samting long biktaun Lima. Wanpela nius (Visión) i stori olsem, 29 botol i gat ol binatang bilong sik, olsem jem, na ol hap pekpek samting i stap long ol. Wanpela botol tasol i gat gutpela wara em ol man inap dring.
Dipatmen bilong Helt long Peru i tok olsem, bikpela hap bilong olgeta wara ol man i dring long Lima, em inap givim “sik pekpek blut, na sik taifoid, na sik hepataitas, na sik kolera, na sik bilong bel i pen samting.” Long Peru, namel long Janueri na Epril 1991, 150,000 man i bin kisim sik kolera, na 1,100 i bin i dai.
Wanpela rot bilong stretim dispela hevi em long boilim wara inap longpela taim bilong kilim ol jem nogut. Tasol i hatwok long mekim olsem. Dispela nius (Visión) i tok olsem: ‘Planti famili i stap rabis na ol i no inap boilim wara inap 10-pela minit, long wanem, pe bilong kerasin em i antap tumas.’ Sapos ol i mekim olsem, bai ol i tromoi bikpela hap mani bilong pe ol i kisim long wok long olgeta wan wan wik.
Dispela hevi i no stap tasol long ol kantri i gat planti man i stap rabis, nogat. Wanpela nius (The New York Times) i tok, long Amerika long “olgeta wan wan yia, winim 250,000 pikinini i save dring wara i gat wanpela marasin ain ol i kolim ain bol i stap long wara, na dispela samting inap bagarapim tingting na skin bilong ol taim ol i wok long kamap bikpela.” Na long hap bilong Yurop ol man i tingting planti, long wanem, marasin nogut i wok long pulap long ol wara. Narapela nius (New Scientist) i tok: ‘Long hap bilong Yurop, ol wara bilong dring i stap insait long graun, na marasin nogut i ken go insait long graun na bagarapim ol dispela wara.’
Long Kamapim Tok Hait 14:7 Baibel i tok, “[Jehova] i bin wokim heven na graun na solwara na olgeta hul wara.” Em i gat strong bilong senisim wara i gat marasin nogut long en i kamap klinpela wara bilong dring. (Kisim Bek 15:22-25; 2 King 2:19-22) Em bai mekim dispela long olgeta hap bilong graun, na em bai bagarapim ol man i wok long bagarapim graun.—KTH 11:18.