Ol Solwara i Bagarap
LONG olgeta wan wan yia, 129 milion lita wel i save kapsait long ol solwara. Tasol bikpela wel tru i kapsait long wanpela sip (Exxon Valdez) long 1989 long wanpela nambis bilong Alaska, em i no insait long dispela 121 milion lita, na 159 milion lita wel i bin kapsait long solwara long olgeta wan wan de long pait long hap bilong Persian Galf long 1991, em tu i no insait long dispela namba!
Tasol ol man i save kapsaitim planti arapela samting tu long solwara. Ol saveman i tok, long Solwara Notsi klostu long Jemani, ol marasin nogut bilong ol faktori i pulap long solwara. Inap 190 kilomita, kirap long nambis i go long solwara, wanpela marasin bilong pen bilong sip i wok long bagarapim wanpela hap bilong solwara ol saveman i kolim maikrolea. Na ol pis i save larim ol kiau bilong ol i stap long dispela hap, na tu, ol liklik binatang bilong solwara i stap long dispela hap. Ol dispela binatang i olsem kaikai bilong ol narapela samting bilong solwara.
Long Solwara Mediterenian, ol saveman i painim ol marasin nogut, na wel samting i wok long bagarapim dispela hap bilong solwara. Taim ol animal weil i kam antap bilong pulim win, marasin nogut i save bagarapim ol. Olsem na long dispela solwara long olgeta yia, 6,000 weil na dolfin samting i save dai. Wanpela taim, planti handet dolfin i dai na si i karim skin bilong ol i kam tromoi antap long nambis. Long Frans 50 dolfin i dai long olgeta wan wan wik na skin bilong ol i stap long nambis. Wanpela binatang jem i kilim ol dispela dolfin. Ol marasin nogut long solwara i wok long daunim gutpela marasin i stap long skin bilong ol dolfin bilong pasim dispela binatang jem long kilim ol. Olsem na wanpela saveman i tok: “Sapos marasin nogut na ol pipia samting i kilim ol dolfin, orait yumi tu inap dai long dispela samting.”
Ating dispela tok bai pretim yu. Tasol dispela tok i stret. Ol pipia na marasin nogut samting i save bagarapim ol man long kain kain rot. Long Nufaunlan ol i wok long painim sampela man em ol i pundaun wantaim balus long solwara, tasol ol pipia long solwara i pasim ol long painim ol dispela man. Ol plastik i trip antap long solwara, na ol man i no save, ol i lukim ol hap bilong balus o ol i lukim pipia. Ol i no bin painim ol dispela man.
Yumi bel hevi long harim dispela stori, a? Tasol sapos ol man i hevi long ol pipia samting i bagarapim graun, olsem wanem long dispela Man em i bin wokim “solwara na olgeta samting i stap long [en]?” (Nehemia 9:6) Klostu nau, em bai “bagarapim ol man i bin bagarapim graun.”—KTH 11:18.
[Piksa Kredit Lain long pes 31]
Mike Baytoff/Black Star