Ol Yangpela i Laik Save . . .

Bilong Wanem Papamama i No Tingting Tumas Long Mi?

Wanpela yangpela meri i tok: “Taim mi askim mama long toktok liklik taim wantaim mi, em i save tok em i gat planti wok.”

CHRISTINA i gat 16 krismas​—em i no marit na em i gat bel. Em i bel hevi long samting em i bin mekim. Em i krai na em i tok: “Mama bilong mi i no bin stori long mi long ol dispela samting. Em i no gat taim long pilim tingting bilong mi long samting mi mekim.”

Ating sampela taim yu pilim olsem tu​—olsem papamama i no laik save long wanpela samting yu mekim. Ating bel hevi bilong yu i no inap kirapim yu long mekim wankain pasin olsem Christina i bin mekim. Na yu save sapos papamama i no tingim yu gut, i no gat as na yu ken mekim pasin nogut, a? Olsem na sapos papamama i no tingim yu, bai bel bilong yu i bagarap yet. Maski yu bikpela liklik, bai yu pilim yet olsem papamama i mas sori na mekim gut long yu. Sapos papamama i no tingim yu, bai yu pilim olsem ol i lusim yu i stap wanpis. Wanpela yangpela meri i tok: “Taim mi askim mama long toktok liklik taim wantaim mi, em i save tok em i gat planti wok.”

Sampela man i skelim dispela samting na ol i tok, insait long olgeta 100 100 yangpela, 25 i tok olsem “papamama i no save lusim bikpela hap taim bilong toktok wantaim ol.” Wanpela yangpela i tok: “Bai mi amamas moa sapos mi pas gut wantaim papamama na mi inap kamapim tingting bilong mi long ol.” Maski ol yangpela i stap wantaim papamama, planti i no pas gut wantaim na toktok gut wantaim.

Bilong Wanem Ol i No Tingim Gut Yu

Tingim: Yu bin wet inap de olgeta long stori wantaim mama long wanpela hevi bilong yu. Tasol taim em i kam bek long haus, em i sindaun na lukim nius long televisen. Taim yu laik toktok wantaim em, em i tokim yu: “Mi laik malolo liklik.”

Ating em i no laikim yu, a? Nogat. I no olsem papamama i no tingim yu na ol i mekim olsem. Tasol yumi stap long taim bilong “planti hevi nogut.” (2 Timoti 3:​1-3) Olsem na ating planti narapela samting i pulim tingting bilong papamama bilong yu. Ating bel bilong ol i no stap isi, o skin bilong ol i les na ol i no gat strong long sindaun na toktok wantaim yu. Dispela samting i kamap moa yet sapos papa o mama tasol i lukautim yu. Sapos yu no kamapim bel hevi bilong yu, bai papamama i ting olsem yu stap orait tasol.

Na i gat planti narapela samting tu ol papamama i wok long tingim. Sapos papa bilong yu em i wanpela Kristen, ating em i gat planti wok bilong kongrigesen em i mas lukautim. (Lukim 2 Korin 11:​28, 29.) Na ating mama i gat sik long skin, tasol em i no tokaut long dispela. Olsem wanem? Yu gat ol brata na susa? Sapos olsem, orait, papamama i wok long lukautim ol tu​—i no yu tasol.

Ating sampela papamama i gat sampela hevi olsem pasin bilong dring oltaim, olsem na ol i no inap toktok wantaim ol pikinini o mekim narapela samting bilong helpim ol. Tasol ating sampela i no save long pasin bilong toktok gut wantaim ol pikinini. Ol papamama i mas kamapim pasin bilong laikim tru pikinini bambai pikinini i ken lain long dispela pasin. (1 Jon 4:19) Na ating papamama bilong papa o mama bilong yu i no tingim gut ol taim ol i liklik yet.

Na sampela pasin bilong ples i no save helpim ol yangpela. Long sampela hap bilong Afrika, lo bilong ples i tok olsem papa na mama na ol pikinini i no ken sindaun wantaim na kaikai. Dispela i save kamapim wanem samting? Collin em wanpela yangpela Afrika na em i tok: “I hatwok long mi pas gut wantaim papamama bilong mi. Taim mi liklik i kam inap nau mi bin karim hevi bilong mi yet.”

Abrusim Ol Samting Bilong Daunim Yu

Ating i gat as na papamama i no gat taim long tingim yu, tasol bai yu pilim nogut na bai yu kros. Bilong bekim, planti yangpela i no wok gut wantaim papamama o ol i no bihainim tok bilong ol. Sampela i ting sapos ol i bikhet, papamama i ken save long hevi bilong ol. Tasol sapos ol yangpela i mekim olsem ol i bagarapim ol yet. Sindaun 1:32 i tok: “Ol manmeri i no gat gutpela tingting, ol i save givim baksait long mi, na dispela pasin bilong ol i save kilim ol yet i dai.”

Sapos dispela hevi i stap yet na bel bilong yu i hevi, tasol yu no stretim, dispela tu i no gutpela, a? Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Sapos tingting na bel bilong man i bagarap, em samting nogut tru. (Sindaun 18:14) Na sapos man i larim dispela tingting nogut i stap, orait taim em i go bikpela dispela hevi bai stap yet. Tingim stori bilong yangpela Johan. Em i tok: “Taim mi wok long i go bikpela, papa i man bilong dring oltaim na em i no save stap taim mi laik tru long toktok wantaim em. Em i tingim ol hevi bilong em yet tasol.” Taim Johan i kamap bikpela man, planti taim tingting bilong em i no stap isi na bel bilong em i gat tok.

Sampela pren i helpim em na nau Johan inap kirap long stretim dispela hevi. Olsem na stori bilong em inap helpim yu long painim ol rot bilong stretim dispela hevi taim yu stap wantaim famili.

Kirapim Ol Long Laikim Yu

Yu ken mekim wanem sapos planti taim papamama i no laik toktok wantaim yu. Yu ken helpim ol sapos yu kirap long tingim gut ol. (Matyu 7:12; Filipai 2:4) Sapos ol i laik go long stua o maket samting, askim ol, ol i laik bai yu go wantaim ol o nogat. Askim ol i gat sampela rot yu inap helpim ol, olsem long kukim kaikai o klinim haus samting? Bihain liklik yu ken stori long ol hevi bilong yu long ol samting i save kamap long skul samting.

Ating sampela taim hevi bilong yu i bikpela liklik na yu mas stori long dispela samting. Sapos papa i kam bek long wok na em i slip i stap, i no gutpela sapos yu kirapim em bilong toktok wantaim em, a? Traim long painim “gutpela taim” bilong stori wantaim em​—taim em i stap isi na em i stap amamas. (Sindaun 15:23) Ating nau em bai putim yau long harim ol hevi bilong yu.

Tasol olsem wanem sapos yu mekim ol samting bilong helpim papamama, tasol ol i no tingim gut yu?a Sindaun 15:22 i tok: ‘Sapos yu laik mekim sampela wok, orait pastaim yu mas kisim tingting long planti arapela man. Sapos yu no mekim olsem, bai yu hatwok nating.’ Ating yu mas tokim papamama bilong yu long pasin isi na stretpela rot, yu pilim olsem ol i no tingim gut yu na i olsem ol i no laikim yu na yu hevi long dispela samting. Ating yu laik bai ol i mekim liklik tok amamas bilong strongim yu long sampela taim o yu laik bai ol i helpim yu wantaim sampela homwok bilong yu.

Ating papamama bai kirap nogut long harim olsem yu gat dispela hevi. Na ating kwiktaim bai ol i tokim yu olsem ol i laikim yu na ol i sori long pasin ol i mekim na yu pilim olsem ol i no laikim yu. Papamama bai wok strong long stretim dispela hevi em pikinini i kamapim long ol.

Taim yu toktok wantaim papamama na yu kamapim hevi bilong yu, ating bai yu kisim save olsem yu tu i gat hap asua long dispela samting. Ating ol i mekim gut long yu tasol yu no bin pilim dispela samting. Maski husat i gat asua​—yu o papamama, sapos yupela toktok wantaim long dispela hevi, em nambawan rot long stretim.

Painim Ol Narapela Long Helpim Yu

Olsem wanem sapos yu mekim olgeta dispela samting, tasol papamama i no tingim gut yu? Dispela inap bagarapim tru bel bilong yu, a? Tasol no ken tingting planti. I gat ol narapela rot bilong stretim ol dispela hevi.

Olsem: Traim painim wanpela man​—ating wanpela em i lapun​—em inap helpim yu taim papamama i no helpim yu. Olsem Sindaun 17:17 i tok, ‘ol gutpela pren i stap i save sambai long helpim yumi long taim bilong hevi.’ Painim dispela kain pren. Tasol skelim gut ol tok em i givim long yu​—dispela tok inap helpim yu na i stret wantaim tok bilong Baibel o nogat.

Kongrigesen Kristen bilong ol Witnes Bilong Jehova inap strongim na helpim yu tu. Insait long kongrigesen, yu inap painim ol brata na susa na papa na mama bilong spirit, em ol inap tingim gut yu na helpim yu long kamap strong long tingting na bel na long ol samting bilong spirit. (Mak 10:30) Collin, em dispela yangpela bilong Afrika yumi stori pinis long em, em i bin painim ol dispela kain pren. Em i painim ol rot bilong stretim hevi bilong em, olsem na em i kirap long go long ol miting bilong ol Witnes. Bihain ol man long kongrigesen i prenim em na mekim gut long em. Bihain papamama na ol brata susa bilong em tu i kam long ol miting.

Ating papamama bilong yu i laikim yu tru, tasol ol i no save gut yu gat wanem kain ol hevi. Go long ol na tokim ol long ol dispela hevi! Ating bai yu kisim save olsem ol i laikim yu tru.

[Ol Futnot]

[Piksa long pes 23]

Long nau bel na tingting bilong planti papamama i no stap isi na skin bilong ol i les, olsem na ol i no save putim gut yau na harim hevi bilong pikinini