Spot Olimpik Bilong Barsilona—Ol Hevi Bilong Kisim Biknem

Wanpela man long Spen i raitim dispela stori bilong Kirap!

LONG Julai 25, 1992 long nait, wanpela man i bin taitim banara bilong em. Long sap bilong spia bilong en i gat liklik paia. Nau em i slekim banara na spia i go stret long skai, na taim spia i flai i go daun em i laitim wanpela traipela bombom i sanap antap long bikpela stediam. Em nau, Spot Olimpik bilong Barsilona i kirap.

I gat 11,000 manmeri bilong 172 kantri i kam bilong resis long Spot Olimpik na bilong winim 1,691 medal Olimpik. Ol i laik winim ol mak i antap long mak ol man bipo i bin winim. Na sampela i mekim olsem. Planti man, olsem 3 bilion samting i lukim dispela samting long televisen.

Ol samting ol man bilong pilai long Olimpik i mekim i bilong liklik taim tasol na em i pinis, tasol sapos em i win na kisim medal, bihain em inap kisim biknem na bikpela mani. Sampela man i bin kisim biknem long Spot Olimpik i bin larim ol kampani i putim nem bilong ol long ol klos spot, su bilong resis, aiglas tudak, sampela pilai bilong video, na ol i kisim planti milion kina long dispela.

Givim Bel​—Em Bikpela Samting Long Winim Resis

Planti man bilong Spot Olimpik, olsem ol man i kalap kalap long ol rop samting na tantanim, na ol man i save go antap tru na kalap i go daun long wara, i olsem ol i no hatwok long mekim, a? Tasol planti yia ol i bin hatwok long lainim skin. Sampela i kirap na lain taim ol i gat 5-pela krismas tasol. Na sapos ol i laik kamap nambawan, dispela trening ol i mekim i mas kamap nambawan samting long i stap bilong ol, na ol narapela samting, em nambatu.

Wanpela man bilong Spen (Martín López Zubero) i winim wanpela resis bilong subim wara long Olimpik, em i tok: ‘Bikpela hap taim long i stap bilong mi, em mi bin stap long wara.’ Em i kirap long 5 klok moningtaim bilong trening, na long wanpela yia samting em i bin subim wara i go i go inap 8,000 kilomita samting.

Pasin bilong trening i no olsem man i mas daunim laik bilong skin tasol, em i mas karim sampela pen tu. Wanpela meri (Jackie Joyner-Kersee) i bin winim medal gol long Olimpik long Siol na Barsilona, em i tok: ‘Bilong insait long Spot Olimpik em samting bilong amamas, tasol samting mi mas mekim bilong trening, i no samting bilong amamas. Askim olgeta man i save insait long pilai spot​—olgeta taim skin i mas karim pen.’ Ol man i kalap kalap long ol rop samting na tantanim, ol i mas bosim tru skin. Tupela taim long olgeta de ol i mas trening, maski skru long han o lek i lus o wanpela masol i bagarap. Tasol man i wok strong na givim bel, em i save kisim prais, na ol man i amamas long lukim pilai bilong em.

Ol Bilaspasin Bilong Olimpik

Ol bilaspasin na ol Spot Olimpik i samting ol man i ken kirap nogut tru long en, a? Ol manmeri i amamas tru long lukim save bilong ol man i pilai spot. Na planti bilaspasin i bin kamap long Barsilona na planti man i kamapim save bilong ol long ol pilai.

Olsem: Ol man inap winim 8-pela medal gol long pilai bilong kalap kalap long ol rop samting na tantanim. Wanpela man, em Vitali Scherbo bilong Rasia i bin winim 6-pela medal gol. Na Xiaosahuang Li bilong Saina i bin kalap kalap na tantanim 3-pela taim na lek i no paitim graun. Na Carl Lewis i bin tromoi lek na kalap longpela tru. Em namba tri taim em i bin winim dispela resis. I no gat narapela man long Spot Olimpik i bin winim dispela resis 3-pela taim. Wanpela meri, em Yuko Arimori bilong Japan, i bin insait long wanpela longpela resis na em i winim medal silva. Taim em i resis pinis, skin bilong em i no gat strong moa, tasol em i ran na raunim stediam wanpela taim. Taim em i mekim olsem em i wok long brukim skru long olgeta manmeri, olsem na ol i sanap na paitim han long gutpela pasin bilong em. Taim em i raunim stediam pinis em i brukim skru long meri i winim dispela resis.

Ol kampani i tromoi bikpela mani bilong helpim ol Spot Olimpik na ol man i insait long pilai, na long dispela rot ol kampani i kisim hap biknem bilong en, na dispela i helpim wok bisnis bilong ol.

Win Long Strong Bilong Marasin

Save bilong man yet na trening em i save mekim, em bikpela samting, tasol ol i no mekim dispela tasol na ol i win. Sampela man i save kisim marasin bilong helpim ol long win. Ol i kisim marasin o drak olsem anabolik-steroit bilong mekim ol masol i go bikpela moa (ol man bilong apim ol hevipela ain i laikim dispela marasin); o marasin beta-bloka bilong mekim klok i wok isi liklik (ol man i sut long banara na gan i save laikim dispela marasin); o marasin iritropoietin bilong wokim hariap sampela nupela blut (ol man i kikim wilwil o ran longwe i save laikim dispela marasin).

Ol man i resis ol i laik win, olsem na maski i tambu long mekim wok long ol marasin olsem drak, ol i mekim. Long 1987 wanpela meri, em Birgit Dressel, em i dai, long wanem, em i bin kisim 20 kain marasin. Wanpela meri long taim bilong em (Gaby Bussmann) i tok: ‘Insait long Spot Olimpik sapos man i no kisim ol marasin drak, em bai hatwok tru long insait long dispela resis.’

Na sampela taim kosa i orait long ol i kisim marasin drak. Wanpela kosa (Winfried Heinicke) bilong Jemani long bipo i tok: ‘Mi tokim ol, sapos yu laik insait long Olimpik, yu mas kisim marasin drak.’ Planti ol i tingting strong long win na kisim nambawan prais, na ol i no tingim stretpela pasin, olsem lo Olimpik i tok ol i no ken kisim marasin. Na ol i no tingim samting dispela marasin nogut i mekim long skin bilong ol. Wanpela lain i bin givim ol askim long planti man i save gut long pilai spot, na planti ol i tok ol bai kisim strongpela marasin bilong helpim ol long win na stap olsem nambawan inap 5-pela yia, maski dispela i kilim ol i dai bihain.

Jason Livingston bilong Inglan em i bin raus long resis Olimpik long Barsilona, long wanem, em i bin kisim marasin anabolik-steroit. Na man i winim nambawan prais long resis bilong 400 mita, em Harry Reynolds bilong Amerika, em i no resis, long wanem, long 1990 em i bin kisim ol marasin i tambu long man bilong resis i ken kisim. Olsem na ol i putim tambu long em olsem em i no ken resis inap tupela yia. Nau em i lus long winim wanpela medal na long kisim bikpela mani long ol kampani samting i laik mekim wok long nem bilong nambawan man bilong resis.

Tasol ol i no painim planti bilong ol dispela man i kisim ol marasin. Long Spot Olimpik long Barsilona ol i bin glasim klostu 2,000 man bilong resis, tasol sampela inap giaman na kisim wanpela kain marasin i no kamap ples klia taim ol i glasim pispis bilong ol.

Tasol yumi save, planti ol i kisim medal, long wanem, planti yia ol i bin wok strong long daunim laik bilong skin na bosim skin. Ol i no mekim wok long ol marasin. Tasol olsem wanem? Ol i kisim gutpela samting long dispela hatwok bilong ol?

Gutpela Samting Bilong i Stap Oltaim

Wanpela meri (Gail Devers) i amamas tru long winim resis bilong 100 mita. Em i tok: ‘Mi gat bikpela laik long kisim dispela prais, na nau mi kisim.’ Klostu tupela yia paslain long dispela resis em i gat sik na em i hatwok tru long wokabaut! Ol dokta i bin toktok long katim na rausim tupela lek bilong em. Na Pablo Morales i bin winim medal gol long resis bilong 100 mita long subim wara, na em i bin trening wanpela yia tasol paslain long dispela resis. Em i tok: ‘Nau mi kisim prais em mi gat bikpela laik long kisim.’

I no olgeta man bilong resis inap win. Sampela i ting ‘bikpela samting long Spot Olimpik i no bilong winim wanpela prais. Nogat. Ol i laik insait tasol long pilai.’ Tasol sampela i laik win na kamap nambawan, na taim ol i no win, ol i bel hevi. Wanpela man bilong apim ol hevipela ain, em Ibragim Samadov, em i laik tru long kisim medal gol, tasol em i kamap namba tri. Em i bel hevi na tok: ‘Sapos mi bin kisim medal gol dispela inap helpim sindaun bilong mi, na mi inap skul long wanpela gutpela wok na helpim famili bilong mi. Nau mi no save bai mi mekim wanem.’ Na ol man i bin winim resis i bel hevi taim skin bilong ol i no gat strong moa long win.

Wanpela meri bilong pilai tenis bipo (em Anna Dmitrieva bilong Rasia) i tok: ‘Long Rasia lain bilong bosim ol spot i no save tingim ol man. Taim wanpela i pinis long pilai spot, ol bai painim 10-pela moa.’ Na man bilong kisim tupela medal gol long Tokyo long 1964 (Henry Carr) i tok: ‘Taim man i kamap nambawan, dispela i giamanim bel bilong em, long wanem, dispela biknem i bilong liklik taim tasol na em i pinis. Bihain ol narapela man i kamap nambawan na ol man i lusim tingting long ol man i bin stap nambawan bipo.’

Olsem na dispela biknem ol man bilong spot i kisim i no winim ol tok promis bilong God long givim laip oltaim long ol man i mekim laik bilong em. Bilong kisim dispela prais Pol i tok: “Sapos yumi laik mekim bodi bilong yumi i kamap strong, na yumi save trening oltaim, [olsem long pilai spot] dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela . . . inap long helpim yumi long dispela laip nau yumi stap long en, na long laip yumi bai kisim bihain tu.”​—1 Timoti 4:8.

Tru tumas, Spot Olimpik i kamapim klia ol samting ol man inap mekim taim ol i daunim laik bilong skin. Tasol dispela i bilong liklik taim tasol. Na ol Kristen i laik winim resis bilong ol Kristen, ol tu i mas trening gut na daunim laik bilong skin. Dispela resis i narapela kain long ol Spot Olimpik, long wanem, ol man i insait long resis Kristen ol inap kisim prais i save stap oltaim oltaim. Olsem na pasin bilong bihainim ol man long pilai spot, dispela i no ken i stap olsem bikpela samting long ol Kristen. Ol i mas wok long kisim pasin bilong Krais na bihainim, na “ran strong” long resis Kristen.​—Hibru 12:1.

[Ol Piksa long pes 23]

Ol man i kalap i go daun long wara long Olimpik. Baksait long ol em biktaun Barsilona

[Kredit Lain]

Photos: Sipa Sport

[Piksa long pes 24]

Man i kalap kalap na tantanim skin

[Kredit Lain]

Photo: Sipa Sport

[Piksa long pes 25]

Resis bilong 100 mita. Meri i resis long han sut em i winim medal gol

[Kredit Lain]

Photo: Sipa Sport