Musik Inap Bagarapim Yu?
YUMI ken tok piksa olsem: Wanpela wanwok i singautim yu long go long haus bilong em na kaikai. Yu amamas long go. Taim yupela i kaikai i stap, nau yu kisim save long sampela pasin nogut bilong em olsem: Em i amamas long givim pen na bagarapim narapela man, na pasin na toktok bilong em i soim yu em inap kilim i dai skin bilong em yet, na em i save kamapim ol tok nogut, na em i save kirapim ol man long lotuim Satan. Olsem wanem? Bai yu go bek narapela taim na kaikai wantaim dispela kain man? Ating bai yu tok: “Nogat!”
Orait, olsem wanem sapos dispela wanwok i bin putim ol tingting nogut na tok nogut bilong em long wanpela kaset na givim long yu? Bai yu wok long harim harim gen? Ating nogat, a?
Tasol long nau planti milion man i save mekim olsem, na wanem samting i kamap? Planti man i harim dispela kain musik ol i save kisim tingting na pasin dispela musik i save kamapim.
Mipela stori long wanem kain musik? I gat kain kain musik na i no gat wanpela kain i gutpela olgeta, maski em jes-musik o musik bilong bipo, o narapela kain. Olsem na yu mas was gut na skelim gut.
Tasol i gat sampela kain musik i moa nogut. Ol i tokaut klia long ol samting i nogut tru. Olsem na yu mas strong long sakim dispela kain musik. Wanpela nius (U.S.News & World Report) i tok, as tok bilong planti musik hevi-metal i kirapim ol yangpela long mekim ‘pasin hambak, pasin sem, na sampela taim kilim i dai skin.’ Wanpela saveman (Dr. David Elkind) i tok, ‘pasin na toktok bilong sampela lain bilong rok-musik i nogut tru, olsem na dispela i save bagarapim nem bilong olgeta rok-musik.’ Long sampela kantri ol i save putim wanpela tok lukaut long skin bilong sampela kaset na ol man i ken save, planti singsing bilong en i save toktok long pasin nogut.
Olsem wanem? Sampela man i strong tumas long daunim dispela kain musik, long wanem, ol i no save laikim dispela kain musik, o tok bilong ol dispela man i gat gutpela as? Orait, yumi ken skelim sampela rok-musik em planti man long nau i save harim long rot bilong ol kaset, na musik-video long televisen, na long ol string-ben. Skelim gut ol samting dispela kain musik i save mekim long ol man, na yu inap save, dispela kain musik em rot bilong painim amamas tasol, o em samting nogut bilong bagarapim tingting. I stret yu na famili bilong yu i harim dispela kain musik o lukim ol samting dispela kain musik i kamapim?