Raun Long Bas i Go Namel Long Ostrelia
WANPELA MAN LONG OSTRELIA I RAITIM DISPELA STORI BILONG KIRAP!
OLSEM WANEM? Yu bin raun long wanpela wara i gat planti pukpuk long en? O yu bin stap long wanpela hap i longwe long ol taun na long nait i gat gutpela mun i stap na yu bin sindaun ausait na singsing wantaim ol narapela? Taim yu sindaun insait long bas na siksti i go long haiwe, yu bin insait long wanpela miting Kristen? Em sampela samting ol planti handet manmeri bilong ol narapela narapela hap i bin amamas long en taim ol i raun long bas bilong i go long wanpela kibung distrik bilong ol Witnes Bilong Jehova long Alis Spring. Alis Spring i stap namel long Ostrelia, em ples bilong san i strong na graun i drai.
Wanpela i tok: ‘Mipela i bin slip ausait long liklik haus sel inap long tupela i ken slip long en. Planti taim mipela sanapim na brukim haus sel, olsem na taim mipela i kamap long Alis Spring, mipela inap sanapim haus sel insait long 3-pela minit tasol! Taim mipela kamap long ples slip na ol bas i sanap, wantu tasol na planti liklik haus sel i sanap pinis.’
Taun Alis
Alis Spring em wanpela gutpela ples i stap namel long ples drai. I gat 23,000 manmeri i stap long dispela taun, na taun i stap long hap saut bilong namel bilong Ostrelia. Nau planti turis i save kam long Alis na ol i amamas long lukim ol Aborijini na ol samting ol i save wokim.
Tasol bikpela samting long ol Witnes i raun long bas em 3-pela de kibung i kamap long dispela taun. Sampela i amamas long lukim gen ol pren bilong ol. Wanpela pasin tru bilong ol man i stap insait tru long Ostrelia na ol i laik mekim gut long ol man, em pasin bilong wokim lip ti i hat tru. Na long kibung i gat wanpela liklik ples kaikai na ol man inap kisim lip ti ol i boilim long tin na wanpela kain bret ol i kolim dempa ol i bin kukim long paia. Ol i kapsaitim lip ti long wanpela tin em smok bilong paia i bin holim, olsem na em i blakpela. Orait, taim wara i boil ol i kapsaitim lip ti long en, na sampela taim ol i tanim wara long wanpela liklik han bilong diwai kumurere. Taim ol i slipim liklik han bilong diwai kumurere antap long ai bilong tin, smok bilong paia i no go insait long wara.
Dempa em wanpela kain bret ol i wokim long plaua na sol na bekpaura na wara. Taim bret i hat yet ol i save katim na putim bikpela hap bata na samting olsem hani long en. Planti man i amamas long bung long dispela liklik ples kaikai bilong kisim lip ti na dempa na toktok wantaim ol narapela.
Em i Wok Strong Long Ples i No Gat Planti Man
I gat 72 Witnes long Kongrigesen Alis Spring, na hap bilong ol long autim tok inap 200,000 skwea kilomita. Dawin i olsem 1,800 kilomita long hap bilong not na Adelet i olsem 1,600 kilomita long hap bilong saut. Ol man i kam long kibung i kirap nogut long lukim hatwok bilong ol man i stap insait tru long Ostrelia, long wanem, ol ples i stap longwe longwe, na ples i hat nogut tru, na i gat bikpela das, na i no gat planti man.
Tingim taun Jaberu. I gat wanpela yureniam-main long dispela taun, na i gat wanpela Witnes tasol i stap. Kongrigesen i stap longwe long em inap olsem 260 kilomita. Tasol maski em i stap wanpis em i stap strong long ol samting bilong spirit. Em i kam long kibung na dispela i strongim ol narapela. Na 4-pela Aborijini i lusim longwe ples Jilkmingan, em liklik ples i stap arere long Anem Lan long Noten Teritori, na ol i kam bilong kisim baptais wantaim 22 man moa long kibung.
Ol i Mekim Gutpela Pasin
Kibung i pinis na ol bas i go long hap antap long not. Ol i amamas long raun long bot long gutpela wara bilong Kateren Goj na bihain ol i go long Kakadu Nesenel-Pak. Em namba wan taim ol i lukim ol pukpuk i raun long ples tru bilong ol. Ol i amamas long lukim, tasol ol i pret liklik. Bihain ol i slip long Dawin, em biktaun bilong Noten Teritori, na long de bihain ol i go long Mataranka Stesen. Dispela ples i gat nem, long wanem, em i gat ol naispela klinpela liklik raunwara bilong waswas long en, na wara i hat liklik. Na i gat ol naispela diwai karuka i raunim ol dispela wara.
Tasol maski ol i raun bilong lukim ol gutpela gutpela samting, ol i bin tingim ol samting bilong spirit tu. Ol bas i kamap olsem Haus Kingdom. Olsem na maski bas i raun, long olgeta moningtaim ol i bin kaunim teks bilong de, olsem wanpela liklik tok bilong Baibel, na tu, ol i mekim olgeta miting Kristen. Draiva bilong wanpela bas em i no wanpela Witnes, tasol em i kirap nogut long pasin bilong ol Witnes long mekim ol dispela samting, olsem na em yet i baim wanpela rop bilong maikrofon na sampela samting moa bilong pasim long bikmaus bilong bas, bambai narapela inap harim gut tok bilong narapela taim em i givim bekim long miting samting.
Taim ol i raun, wanpela lapun i kisim bikpela sik na kwiktaim em i mas go long haus sik. Ol bas i no inap wet, olsem na wanpela pren bilong lapun i stap wantaim em. Tupela de bihain lapun i orait gen, tasol nau tupela i bel hevi liklik, long wanem, ol i stap na ol bas i go pinis. Tasol sori Kristen i pinisim bel hevi bilong tupela.
Tupela Witnes bilong dispela hap ol i bin mekim wok pailot long balus na ol i harim stori bilong tupela. I no longtaim na fopela i sindaun long wanpela liklik balus na flai i go long taun Pot Ogasta bilong painim ol bas. Wanpela i stori long dispela na i tok: ‘Bel bilong mipela i amamas tru, long wanem, mipela stap insait long gutpela lain brata!’ Na taim balus i kamap, planti pasindia long bas i amamas long givim liklik mani olsem kontribusen bilong baim balus. Draiva bilong bas i kirap nogut tru long dispela gutpela pasin sori, na em i tok, bipo em i no bin lukim dispela kain pasin.
Wanpela man i bin raun 3-pela wik long bas na em i stori long raun bilong em i go long Alis Spring, na em i tok: ‘Dispela raun i strongim tru bel bilong mi na i strongim bilip bilong mi tu. Wanpela samting mi tingim na em i bikpela samting long mi, em pasin wanbel mipela olgeta i bin amamas long en. Maski mipela i bin raun we long Ostrelia, dispela i no bikpela samting—bikpela samting em mipela i bin stap wanbel na holim wanpela tingting tasol!’
[Mep long pes 18]
(Bilong save ol dispela rait i stap we long pes, lukim buk o magasin)
Ol rot ol bas i bihainim long go kam long kibung Alis Spring
Westen Ostrelia
Noten Teritori
Kwinslan
Niu Saut Wels
Saut Ostrelia
Viktoria
Tasmenia
Dawin
Pet
Alis Spring
Brisben
Sidni
Adelet
Melbon
Hobat
Uluru (Ers Rok)
Pot Ogasta
Kakadu Nesenel-Pak
[Piksa long pes 16, 17]
Sampela Aborijini i laik kisim baptais long kibung distrik long Alis Spring
[Piksa long pes 17]
Lip ti na bret ol i kukim long paia
[Piksa long pes 17]
Pukpuk i slip long san long Kakadu Nesenel-Pak
[Ol Piksa long pes 18]
Uluru (Ers Rok) em i stap 470 kilomita saut-wes long Alis Spring
Samting yu inap lukim long Kakadu Nesenel-Pak long Noten Teritori