Nupela Taim Bai Kamap Long Wanem Taim?
NUPELA taim God bai kamapim, em bai kamap taim dispela olpela pasin bilong nau i pinis. Tasol ating yu gat askim olsem: ‘Yumi ken bilip tru olsem dispela olpela pasin bai pinis?’ Orait, tingim: Bipo i gat wanpela olpela pasin i bin pinis?
Planti samting i makim olsem bipo wanpela olpela pasin i bin pinis. Baibel i tok: “Ol manmeri bilong bipo [long taim bilong Noa] tu, ol i bin givim baksait long God, na em i no larim ol. Nogat. Em i mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut.”—2 Pita 2:5; 3:6.
Nau yumi save, ‘ol manmeri bilong bipo ol i bin givim baksait long God,’ ol i lus. Tasol i no olsem graun tru i pinis, na ol sta long skai, na olgeta manmeri, nogat. Ol manmeri i bin winim Tait Wara ol i bin kamapim pikinini, na taim ol i kamap planti, narapela pasin i kamap—em pasin yumi stap long en long nau. Tasol wanem samting bai painim dispela pasin nau yumi stap long en?
Baibel i tok, pasin nogut long taim bilong Noa i pinis, na bihain em i tok: “Na nau, . . . skai na graun i stap na i wetim paia i kamap na i bagarapim ol.” (2 Pita 3:7) Paia i makim olsem pasin nogut bai pinis. Tru tumas, “dispela graun [em pasin nogut bilong nau] bai i pinis.” (1 Jon 2:17) Tasol wanem taim dispela bai kamap?
Ol aposel i laik save, olsem na ol i askim Jisas: “Wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek na dispela graun i laik pinis?” (Matyu 24:3) Orait, Jisas i givim mak long ol, na ol man i stap long taim dispela mak i kamap, ol i ken save wanpela taim i laik pinis na nupela taim bai kisim ples bilong en. Wanem dispela mak?
Mak
I gat planti samting bai kamap olsem mak—i no wanpela samting tasol. Na ol samting i kamap olsem mak, olgeta i mas kamap insait long wanpela hap taim tasol, olsem taim bilong wanpela lain. (Matyu 24:34) Wanem ol wan wan samting bilong dispela mak?
Sampela samting Jisas i kolim i olsem: “Sampela lain bai i kirapim pait long ol narapela narapela lain. . . . Ol bikpela bikpela guria bai i kamap long graun. Na long sampela hap . . . bikpela hangre na bikpela sik.” “Long dispela taim bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela. . . . Pasin nogut bai i kamap bikpela, olsem na planti man bai i lusim pasin bilong laikim ol arapela.”—Luk 21:10, 11; Matyu 24:7-9, 12.
Aposel Pol i stori long sampela samting moa bai kamap olsem mak bilong “las de” bilong dispela olpela pasin. Em i tok: “Long taim bilong las de planti hevi nogut tru bai i kamap. Ol man bai i laikim ol yet tasol . . . laikim tumas long kisim mani . . . sakim tok bilong papamama . . . i no tok tenkyu . . . givim baksait long ol pasin bilong God . . . bihainim kwik olgeta kranki tingting bilong ol yet . . . tingim ol yet i bikpela man tru . . . laikim tumas ol kain kain pasin bilong amamas . . . i no laikim God . . . bihainim pasin bilong God long skin tasol.”—2 Timoti 3:1-5.
Ating yu bin harim o lukim olgeta dispela samting—ol bikpela pait bilong olgeta hap, na ol bikpela bikpela guria, na ol bikpela sik na hangre, na ol man i givim pen na hevi long ol man i save bihainim Krais, na pasin nogut i kamap bikpela, na taim bilong planti hevi nogut tru, winim ol narapela taim bipo. Na Baibel i tok: God bai “bagarapim ol man i bin bagarapim graun.” (KTH 11:18) Na tru tumas, long nau ol man i wok long bagarapim graun!
Long Novemba 1992, ol nius i gat het-tok olsem: ‘Ol Nambawan Saientis i Tokaut Long Graun Bai Bagarap.’ Wanpela saveman (Dr. Henry Kendall) i tok: ‘Dispela tok bilong ol saientis i no wanpela tok nating, na ol i no pretim nating yumi.’ Wanpela nius i tok: ‘Ol dispela 1,575 saientis i tokaut long dispela hevi, ol i gat nem namel long lain saientis long olgeta hap.’ Yumi no ken sakim dispela tokaut bilong ol olsem graun bai bagarap olgeta!
Em nau, truim bilong olgeta wan wan samting bilong dispela mak i kamap. Na truim bilong bikpela samting Jisas i tokaut long en, em tu i kamap, olsem: “Ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap,” em pinis bilong dispela pasin bilong nau. (Matyu 24:14) Jisas i tok, dispela bai kamap taim ol i autim gutnius bilong Kingdom long olgeta hap. Na ol Witnes Bilong Jehova i save autim dispela tok long olgeta hap bilong graun!
Samting Yu Mas Mekim
Olsem na olgeta samting i makim olsem, nupela taim God bai kamapim, em i klostu pinis. Sapos yu no laik bagarap taim dispela olpela pasin i pinis, na yu laik go insait long dispela nupela taim na stap amamas, yu mas mekim sampela samting. Baibel i tok, “dispela graun bai i pinis,” tasol “man i bihainim tok bilong God, em bai i stap oltaim.”—1 Jon 2:17.
Olsem na yu mas save long laik bilong God na bihainim. Ol Witnes i laik helpim yu long mekim olgeta samting God i tok yu mas mekim bambai yu ken i stap long dispela nupela taim na stap amamas oltaim oltaim.
[Piksa Kredit Lain long pes 10]
NASA photo
[Piksa long pes 10]
Klostu long nupela taim i laik kamap, planti hevi nogut tru bai kamap