Ol Yangpela i Laik Save . . .

Olsem Wanem Mi Inap Abrusim Pasin Pamuk?

Yangpela meri Valerie i tok: ‘Bipo mi ting i orait long holim skin bilong boipren na kis. Mi ting em rot bilong kamapim bel bilong mi olsem mi laikim em tru. Na mi ting mi inap pasim skin long mekim rong olsem pamuk. Tasol mi tingting kranki​—mi bin pamuk.’a

OL YANGPELA Kristen i save Baibel i tambuim ol singel long slip wantaim. (1 Korin 6:​9, 10) Tasol ating sampela i no save, Baibel i tambuim tupela singel long pilai pilai na nau skin i redi pinis long mekim maritpasin. Dispela kain pasin i stret long ol marit tasol i mekim. (Galesia 5:19) Orait, i gat rong sapos narapela i mekim sampela pasin bilong makim olsem em i laikim narapela? Nogat.

Baibel i stori long yangpela meri bilong Sulam na yangpela man bilong lukautim sipsip i laik marit long em. Taim tupela i wokabaut wantaim tupela i bihainim stretpela pasin. Tupela i bin mekim sampela samting bilong soim olsem narapela i laikim tru narapela. (Solomon 1:2; 2:6; 8:5) Long nau sampela yangpela i pasim tok pinis long marit, ol i ting i no gat rong sapos ol i holim han o kis samting.b

Tasol maski yangpela man na meri i laik stap stret, sapos ol i no was gut, tupela inap mekim ol samting i kirapim skin na ol inap pamuk. Ol i ken mekim wanem na abrusim pasin pamuk?

“Bihainim Tok”

Song 119:9 i tok: “Olsem wanem na yangpela man i ken wokabaut long klinpela pasin? Em i mas bihainim tok bilong yu.” Sapos yu laik bihainim tok bilong God yu mas was gut long ol poroman bilong yu. Wanpela yangpela man bilong Amerika, em Nakia, i tok: ‘Olgeta taim ol pren bilong mi i wok long subim mi long mekim pasin pamuk.’ Baibel i tok: “Sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Wanpela nius bilong ol yangpela i givim gutpela tok olsem: ‘Painim ol poroman i gat pasin i wankain olsem pasin bilong yu.’

Na taim yutupela i bung o toktok wantaim, mekim long ai bilong ol man. Tingim samting i kamap taim yangpela man i singautim yangpela meri Sulam long go wokabaut wantaim em long naispela ples. I no olsem yangpela man i gat tingting nogut, nogat; em i laik amamas wantaim em long wokabaut. Tasol ol brata bilong meri Sulam i kros. I no olsem ol i ting tupela i gat tingting long mekim pasin pamuk, nogat. Tasol ol i save, taim yangpela man na meri i wokabaut wantaim na tupela tasol i stap, traim inap painim tupela. Orait, ol brata i bin mekim wanem? Ol i givim wok long susa bilong ol bambai em i no gat taim bilong wokabaut.​—Solomon 1:6; 2:​8-15.

Long nau tu, sapos yangpela man na meri tasol i stap wantaim long wanpela hap i no gat narapela man i stap, bel bilong tupela inap kirap na tupela bai hatwok long sakim pasin pamuk. Wanpela yangpela meri, nem bilong em Mary, i tok: ‘Taim mitupela boipren i wokabaut wantaim, planti taim mipela i gat was bilong mipela.’ Tasol wanpela taim tupela tasol i stap wantaim long wanpela haus. Mary i tok: ‘Mipela i no bosim gut bel. Mipela i longlong stret. Mipela ting mipela i no inap pundaun. Nau mi save, oltaim mipela i mas i gat was bilong mipela maski mipela stap we o mekim wanem samting.’

Olsem na yu mas was gut! Sapos yu wokabaut wantaim wanpela, yu mas bihainim gutpela tingting long ol samting yupela bai mekim o long ol hap yupela bai go long en. I gutpela long raun wantaim sampela lain, nogut yutupela tasol i raun. O yu mas strong long yupela i gat was bilong yupela. Na was gut, nogut yutupela tasol i stap wantaim long haus o long ka. Yutupela ken kisim amamas long go lukim wanpela haus tumbuna o go long wanpela haus kaikai o go long narapela ples i gat planti man. Na tingim tok bilong Hosea 4:11: “Kain kain strongpela dring i save paulim tingting bilong ol manmeri.” Tru tumas, dring i save daunim gutpela tingting, olsem na maski krismas bilong yu i bikpela liklik na lo bilong gavman i orait long yu dring, yu mas tingim gut ol samting dring inap mekim long yu.

Was Gut Long Ol Samting Yu Mekim

Sindaun 13:10 i tok: “Sapos man i larim ol arapela man i givim tingting long em, orait dispela man i gat gutpela tingting na save.” Olsem na yu mas bihainim gutpela tingting na was gut long ol samting yu mekim. Nogut yu wet inap long bel i kirap pinis na nau yu hatwok long sakim ol samting inap pulim yu long mekim pasin pamuk. Yangpela man na meri i bihainim savepasin sapos pastaim ol i toktok gut na pasim tok long ol samting ol bai mekim bilong soim olsem narapela i laikim tru narapela. Na tupela i mas bihainim tok bilong Efesus 4:25: “Mekim tok tru tasol long ol arapela.”

Olsem wanem sapos wanpela yangpela meri i poroman gut wantaim boipren na nau em i ting i orait long tupela i kis? Olsem wanem sapos boipren i ting dispela bai putim traim long em, long wanem, em i hatwok long bosim bel na skin? Orait, ating em bai mekim samting yangpela meri i laik em i mekim, nogut meri i no laikim em moa. Tasol maski yangpela man i sem long kamapim tingting bilong em, em i mas tok tru na kamapim tingting bilong em long yangpela meri. Kristen i save sori long narapela, “em i no save tingting tumas long em yet,” nogat; narapela mas pilim tingting na bel bilong narapela long dispela samting. (1 Korin 13:5; 1 Pita 3:16) Tru, i hatwok long toktok long dispela kain samting, na ating yu bai sem, na ating i hatwok moa sapos nau tasol yu kirap na wokabaut wantaim poroman, tasol em rot bilong pasim planti hevi inap kamap bihain. Tasol sapos yupela inap toktok gut wantaim long ol dispela samting, ating yu ken save gut long pasin na tingting bilong poroman yu laik maritim, na marit bilong yu inap stap gut.

‘Bai Yu Mekim Sapos Yu Laikim Mi’

Tasol sampela taim ol yangpela i no laik mekim pasin pamuk; ol i laik kis tasol, tasol dispela inap kirapim bel bilong ol. Nau em taim bilong tokaut olsem dispela pasin i no stret. Sapos yu ting mobeta yu ranawe, orait ranawe. (Skelim wantaim Sindaun 23:2.) Olsem wanem sapos poroman i no laik bihainim laik bilong yu na em i laik yupela i pamuk? Sori tru, sampela yangpela i bilipim tok bilong poroman olsem: ‘Sapos yu laikim mi bai yu mekim,’ o ‘Ol narapela i save mekim,’ o ‘Klostu yumi bai marit, olsem na bilong wanem yu no laik mekim?’ I no long nau tasol sampela i save grisim ol narapela long kain tok olsem, nogat; dispela kain tok i bin kamap long taim bilong Baibel tu. Sindaun 7:21 i tok: “Dispela meri [o man] i mekim planti switpela tok bilong grisim em na kirapim bel bilong en.” (Skelim wantaim Song 5:9.) No ken tru larim toktok bilong narapela i pretim yu na yu kirap mekim wanpela samting yu no laik mekim.

Sapos wanpela i laikim yu tru, em i no ken subim yu long mekim wanpela pasin i no stret long bel bilong yu o long mekim wanpela samting yu tingting planti long en. (1 Korin 13:5) Na dispela tok, ‘ol narapela i save mekim,’ i no trupela tok. Na maski ol narapela i save mekim pasin pamuk, i no olsem yu tu mas mekim, a? Tingim tok bilong Kisim Bek 23:2: “Sapos ol planti man i mekim pasin nogut, orait maski long bihainim pasin bilong ol.”

Na i no gat wanpela tok long Baibel i tok, ol man i pasim tok long marit ol inap mekim ol samting ol marit tasol inap mekim. Tingim tok bilong buk bilong Nancy Van Pelt (The Compleat Courtship), i tok: ‘Long olgeta wan handet wan handet meri singel i bin pamuk, 33 i tok, taim ol i pamuk namba wan taim ol i ting ol bai maritim dispela man ol i pamuk wantaim em. Tasol wan wan tasol i bin mekim olsem. Long olgeta wan handet wan handet man singel i pamuk, 7-pela tasol i ting ol bai maritim yangpela meri ol i pamuk wantaim em. Ating ol yangpela meri hia i giamanim bel bilong ol yet o ol yangpela man i no tok tru​—yumi no save.’ Wanpela savetok bilong Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​—Sindaun 14:15.

Taim Yu No Bosim Gut Skin

Wanpela yangpela man bilong Jemani, em Thomas, i tok: ‘Oltaim mi wokabaut wantaim wanpela meri olsem gelpren bilong mi. Mipela save holim skin na kis, tasol mipela inap bosim skin na mipela i no pamuk. Olsem na mi yet mi ting mi inap bosim gut skin.’ Dispela tingting kranki i paulim em na bihain em i pamuk. Tingim tok bilong Baibel: “Sapos wanpela man i ting em i sanap strong, orait em i mas lukaut gut. Nogut em i pundaun.”​—1 Korin 10:12.

Olsem wanem sapos tupela i pamuk? Yangpela man John i tok: ‘Taim mi na yangpela meri mi laik marit long em i kirap raun wantaim, mipela i save bihainim ol pasin i klin na stret. Tasol wanpela taim mipela kirap na holim skin bilong narapela na kis kis​—klostu mipela pamuk. Long dispela taim mi save mi mas toktok wantaim wanpela elda bilong kongrigesen.’ Tru tumas, taim tupela i mekim ol samting na klostu ol i pamuk, i mas i gat man bilong helpim tupela! Yu no ken giamanim bel bilong yu, olsem yu wanpela inap winim dispela hevi. Wanpela yangpela i tok: ‘Mi save beten olsem: “Helpim mipela na mipela i no ken mekim gen.” Sampela taim beten i helpim mi na sampela taim nogat.’ Olsem na Baibel i tok yumi mas “singautim ol hetman bilong sios i kam.” (Jems 5:14) Ol elda Kristen inap givim gutpela tok bilong helpim o stretim yupela, na yupela inap stap gut wantaim na stap gut long Jehova​—em bikpela samting.

Tasol mobeta ol yangpela i mekim ol samting bilong was gut long pasin bilong ol, na taim ol i kirap wokabaut wantaim poroman, ol i mas putim sampela tambu pastaim, na ol i mas pasim tok long bel olsem ol bai stap klin long ai bilong God. Sapos yupela i mekim ol dispela samting, ol bikpela hevi i no ken painim yupela.

[Ol Futnot]

[Piksa long pes 17]

Yangpela man o meri i bihainim savepasin sapos em i no larim poroman i holim skin bilong em o kis long em