Wolsingham—Tok Pait Long Piksa Holi Long Inglan
WANPELA MAN LONG BRITEN I RAITIM DISPELA STORI BILONG KIRAP!
WOLSINGHAM em wanpela naispela liklik ples long provins Nofok, long Inglan. Long olgeta yia inap 100,000 man i save kam long dispela ples bilong lukim piksa holi bilong Bikmeri Bilong Wolsingham (Our Lady of Wolsingham). Ol Katolik i gat wanpela na Sios Bilong Inglan i gat wanpela. Dispela i mekim na ol man i kros na tok pait.
Long nius Church Times wanpela pris bilong Sios Bilong Inglan i tok: ‘Long sampela yia nau taim ol man i go long liklik ples holi bilong mipela long Wolsingham, hevi i save kamap. Bikpela lain i save bung na singaut strong bilong kamapim kros bilong ol. Na ol i no mekim nabaut dispela samting.’
Bilong wanem ol dispela man i kros? Ol i kros long Sios Bilong Inglan na tok: ‘Samting ol i mekim i no pasin bilong lotu Kristen tru, em pasin haiden. Em i bagarapim Tok Tru, na em i samting nogut long ai bilong God, na ol i mekim bikpela rong tru long lotu Talatala bilong mipela.’
Long Inglan i no planti taim lotu i save kamapim kros bilong en, olsem na wanem samting i stap long Wolsingham na dispela i mekim na ol man i kros? Sapos yumi save long ol stori bilong bipo long tupela liklik ples holi long Wolsingham em bai helpim yumi long save.
Lotu Talatala na Lotu Katolik i Pait
Paslain long yia 1500 taim sampela i bruk long misin Katolik na kamapim ol lotu Talatala, i gat lotu Katolik tasol long Inglan, na ol i gat planti liklik ples holi. Wanpela liklik ples holi i olpela tru em long Wolsingham, na imis bilong Virgo Maria i stap long en. I no gat narapela liklik ples holi long Inglan i gat imis bilong Virgo Maria long en i winim dispela. Long yia 1061 wanpela bikmeri i wokim wanpela haus long Wolsingham. Ol stori i tok, piksa bilong wokim haus i kamap long wanpela driman na piksa i wankain long haus mama bilong Jisas, em Maria, i bin stap long en long Nasaret. Bihain long dispela taim planti man long olgeta hap i save long dispela liklik ples holi bilong Maria.
Ol king na ol man nating i bin go long Wolsingham. Wanem samting i pulim ol i kam? I gat imis bilong Maria na pikinini Jisas i sindaun long lek bilong em ol i bin wokim long diwai. Na tu, ol man inap baim pekato bilong ol na baim bun samting bilong ol santu. Na ol i tok, taim ol sikman i kam long dispela hap, sik bilong ol i pinis. Na ol man inap lukim “mirakel” bilong Wolsingham, em liklik hap susu bilong Maria i strong pinis i stap insait long wanpela liklik botol. Sampela man i lukim dispela samting na ol i tok, i no susu tru, em sok samting. Na wanpela saveman bilong Baibel, em Erasmus, em i tok, em i no wanpela samting tru, em giaman. Na sampela i ting dispela susu i olsem sok ol i bin paitim wantaim waitpela hap bilong kiau.
Bilong wanem Erasmus i go long Wolsingham? Ol i ting, em i go bilong truim wanpela tok promis em i bin mekim. Erasmus i bin stori gut long liklik ples holi long Wolsingham, tasol ‘ol tok em i mekim long pasin bilong ol man long lotuim dispela samting i olsem tok bilas.’ (Buk The Catholic Encyclopedia) Saveman Frederic Seebohm i tok, i no gat wanpela samting bilong truim tok olsem Erasmus ‘i man bilong lotuim Virgo o em i ting i stret long go bilong lotu long ples imis i stap long en.’
Long taim sampela i bruk long misin Katolik, nupela lotu Sios Bilong Inglan i daunim lotu Katolik. Na long 1538 King Henri Namba 8, em bikman bilong Sios Bilong Inglan, i tokim ol man long bagarapim liklik ples holi bilong “Sangumameri Bilong Wolsingham,” em nem ol i bin kolim long dispela imis. Na hap graun liklik ples holi i bin stap long en, ol i baim i go long ol man. Ol i no laikim tru dispela imis ol man i save lotuim olsem god giaman, olsem na ol i kisim i go longwe olsem 160 kilomita, long Selsi, Landon, na kukim long paia long ai bilong ol man.
Ol Talatala i Bihainim Ol Katolik
Tasol bihain long yia 1900 Sios Bilong Inglan i wokim wanpela Bikmeri Bilong Wolsingham, na em i kamap wanpela samting holi bilong ol Talatala! Ol i bin sapim imis i wankain long imis bilong bipo tru na long 1921 ol i putim insait long haus lotu bilong ol long Wolsingham. Long 1922 ol man i kam lukim dispela imis. Planti man i save kam long dispela liklik ples holi, tasol sampela man bilong Sios Bilong Inglan i no amamas, ol i kros. Long olgeta yia long mun Me taim ol i wokabaut i go inap 30 minit na karim dispela imis, ol dispela man i save singaut bilong kamapim kros bilong ol, olsem dispela em pasin bilong lotuim god giaman.
Long 1934 ol Katolik i wokim liklik ples holi bilong ol yet (National Shrine of Our Lady) long wanpela olpela haus lotu (Slipper Chapel) long Wolsingham. Dispela liklik ples holi i gat namba 2 imis bilong mama i holim pikinini na em tu i wankain long imis bilong bipo. Bipo tru ol man i bin kam long dispela hap na rausim su na wokabaut lek nating i go long liklik ples holi. Tasol ol man i no singaut na kros long dispela liklik ples holi, nogat; ol i mekim long liklik ples holi bilong Sios Bilong Inglan. Ol i tok Sios Bilong Inglan i givim bel tumas long Maria na i olsem pasin bilong lotuim god giaman, na dispela i no stret long lotu Talatala.
Tasol i gat narapela as na ol man i kros? Planti i ting kros bilong ol i gat narapela as. Nius The Independent i tok: ‘Nau ol man i kros, long wanem, ol i no amamas long pasin sodom planti man bilong Sios Bilong Inglan i save mekim, na ol i kros moa long dispela lain ol man i kolim “Gin and Lace.” Ol i kolim dispela nem long wanpela lain man bilong Sios Bilong Inglan, na planti bilong ol em ol pris. Inap sampela yia nau ol i save kam long Wolsingham. Bilong wanem ol i kam? Wanpela man i save kam oltaim em i tok: ‘Planti man i kam long dispela bung ol i gat pasin olsem pasin sodom.’
Yumi save, kain bung i gat ol god giaman, na nau planti man i save tingim pasin sodom ol i kam long en, em wanpela kain bung ol trupela Kristen i no ken tru go long en.—1 Korin 6:9; 10:14; 1 Jon 5:21.