Tru Ol Sta i Save Bosim Wokabaut Bilong Yu?

WANPELA MAN LONG BRASIL I RAITIM DISPELA STORI BILONG KIRAP!

WANPELA singsing bilong Cole Porter i tok: ‘Ol sta yet i makim mun Julai na bai graun i bam wantaim planet Mas.’ Dispela singsing i kamapim bilip bilong ol man long bipo yet na i kam inap long nau​—ol sta i bosim olgeta samting bai painim man.a Tru, ol sta na planet i save bosim sindaun bilong ol man? Sapos olsem, ol inap mekim wanem long yumi? Sapos nogat, wanem wok bilong ol sta?

Yumi no kirap nogut long planti man i laik save long ol samting bai painim ol long bihain, long wanem, planti bikpela samting i kamap pinis, a? Olsem: Banis Belin i pundaun; planti kantri bipo ol i insait long Soviet Yunion nau ol i bruk; ol man i no bilip moa long ol man politik; narapela lain i birua long narapela lain long Afrika na Yurop; narapela lotu i bel nogut long narapela lotu long India na long Aialan; pe bilong ol samting i go antap long planti kantri; planti yangpela i bikhet. Yunivesiti Bilong Hambek i kamapim wanpela ripot i tok, kirap long taim Namba 2 Pait i pinis i kam inap long nau, i no gat narapela yia i winim 1992 na planti hevi i bin kamap​—52 pait i bin kamap long narapela narapela kantri. Planti man i askim olsem: ‘Mipela ken painim we rot bilong i stap bel isi na kisim gutpela sindaun?’

Ol man i tingting planti long ol samting bai painim ol bihain, olsem na planti i givim bel long kain kain pasin bilong glasman. Wanpela bilong en, em pasin bilong lukluk long ol sta. Dispela pasin i no olsem pasin bilong ol saientis long kisim save long ol sta, nogat. Ol man bilong lukluk long ol sta i tok, ol sta na planet ‘i gat strong long bosim olgeta samting man i mekim na olgeta samting long graun tu.’ Long nau planti milion man i no inap sakim pasin bilong kaunim stori bilong ol sta o horoskop bilong save long ol samting bai painim ol bihain.b

Na ol man bilong lukluk long ol sta i tok, ol inap toksave long ol samting bai painim man i gat hevi long marit, o em i sik, o ol inap toksave long husat bikman bai pinis o kirap long wok politik, o wanem taim i gutpela long kirapim wanpela nupela bisnis, o man i pilai winmoni em i mas mekim wok long wanem ol namba bilong kisim winmani.

Nius Reuters i bin tok, paslain long man bilong Nancy Reagan (bipo em presiden bilong Amerika) i save mekim ol tok bilong em o raun long balus, Misis Reagan i save askim wanpela meri bilong lukluk long ol sta (Joan Quigley) bilong save wanem taim i gutpela bilong presiden i mekim wok bilong em. Buk New Catholic Encyclopedia i tok, ‘Pop Julias Namba 2 [1503-1513] i bin askim ol man bilong lukluk long ol sta long makim de stret em i mas kirap mekim wok pop bilong em. Na Pop Pol Namba 3 [1534-1549] tu i bin askim ol long makim taim stret em i mas bung olgeta taim wantaim ol kadinal bilong em.’ Alfred Hug em i dairekta bilong wanpela bisnis long Swiselan na dispela bisnis i save mekim wok long pasin bilong lukluk long ol sta. Ol i save tokim ol man wanem taim i gutpela bilong putim mani bilong ol long stok-maket, na sapos ol i mekim olsem, gutpela samting tru bai kamap long en. Hug i tok: ‘Ol sta yet i makim ol dispela samting.’

Olsem na yumi save planti man i ting ol sta i gat strong long bosim ol samting bilong yumi man. Dispela pasin bilong lukluk long ol sta i kirap we? Baibel i save stori long dispela pasin na long ol man bilong lukluk long ol sta?

[Ol Futnot]