Papamama—Stap Olsem Maus Bilong Pikinini

PAPAMAMA i laik helpim tru ol pikinini man na pikinini meri bilong ol. Aposel Pol i tokim ol papa, ol i mas skulim ol pikinini long ol tok bilong God. (Efesus 6:4) King Solomon bilong bipo i tokim ol yangpela: “Harim tok bilong papamama bilong yu na yu no ken sakim tok bilong tupela. Tok bilong tupela bai i mekim yu i kamap gutpela man.”​—Sindaun 1:​8, 9.

Sapos papamama i gat wok long skulim ol pikinini, wanem wok bilong ol skul? Olsem wanem papamama na ol tisa i ken wok wantaim?

Wok Bilong Papamama na Ol Tisa

Wanpela meri (Doreen Grant) i bin skelim ol samting skul i mekim long famili na em i tok: “Papamama . . . i gat bikpela wok long skulim ol pikinini bilong ol.” Sapos yu wanpela papa o mama, ating yu no wanbel long dispela tok.

Ating yu lukim pasin bilong skulim ol pikinini long nau i no wankain olsem long taim yu liklik na yu go long skul. Na long nau ol skul i lainim ol pikinini long ol samting bipo yumi no save long en, olsem ol samting bilong televisen na ol nius, na helt-edukesen, na ol kompyuta samting. Dispela i mekim na sampela papamama i no go tumas long lukim ol tisa long skul. Dokta David Lewis i tok: “Maski papa o mama i no man bilong sem, taim em i toktok wantaim ol tisa bilong pikinini ating bai em i pilim olsem em i stap liklik pikinini yet. Ol i no toktok gut wantaim ol tisa long ol hevi olsem ol man i bikpela pinis; ol i mekim pasin olsem bilong pikinini.”​—Buk Help Your Child Through School.

Tru tumas, planti papamama i no save go lukim ol tisa. Taim bikpela hevi i kamap, bai ol i go. Na ating bai ol i go bilong krosim tisa. Tasol sapos papamama i wok gut wantaim tisa, ol inap helpim tru pikinini long skul, na planti papamama i mekim olsem.

Yupela ol papamama, bilong mekim gut wok bilong yupela, yupela i mas laik long save long ol samting pikinini i lainim long skul na skelim gut. Bilong wanem yu mas mekim olsem? Long wanem, ol tisa inap givim tingting long pikinini bilong yu long pasin em i mas bihainim. Tingting bilong tisa long wanem pasin i stret na wanem pasin i no stret, dispela inap tanim tingting bilong pikinini. Ol pikinini i save tingim pasin bilong tisa i gutpela bilong ol i bihainim. Planti tisa i save amamas sapos papamama i wok gut wantaim ol.

Wanpela het-tisa long hap saut bilong Jemani em i raitim pas long ol papamama na em i tok: “Long dispela yia, winim olgeta yia bipo, mipela ol tisa i lukim planti skulmanki, em planti nau tasol ol i kirap long skul [long Jemani ol i kirap long skul taim ol i gat 6-pela krismas], na ol i gat hatpela pasin; ol i no save sori; na papamama i no bin lainim ol liklik long gutpela pasin ol i mas bihainim. Planti ol i no gat lo bilong bosim ol na ol i mekim nabaut tasol; ol i no save pilim asua liklik; ol i tingim ol yet tasol; ol i no save mekim gut long narapela; ol i kirap nating na mekim pait, olsem pasim nek o kikim [narapela].”

Tisa i tok moa olsem: “Dispela i givim bikpela hatwok moa long mipela ol tisa, tasol mipela i no laik toktok planti. Mipela i save, maski mipela i wok strong, skul yet i no inap skulim ol pikinini na mekim bikpela long ol; papamama tu i gat wok. Olsem na yupela ol gutpela papamama, mipela i laik kirapim yupela yet long mekim bikpela wok moa bilong skulim ol pikinini; no ken larim televisen o ol narapela pikinini i skulim ol; yupela yet i gat wok long helpim ol long kamap gutpela man na meri na skulim ol long stretpela pasin ol i mas bihainim.”

Maski ol tisa i askim ol papamama long wok gut wantaim ol, planti papamama i no kirap long mekim. David Lewis i tok: “I no olsem ol i no tingim ol pikinini, o ol i gat planti wok tumas o ol i ting ol i no gat save long mekim. As bilong dispela i olsem: Ol i bilip tru olsem sapos pikinini i kisim gutpela mak long skul o em i no kisim gutpela mak, dispela i no samting bilong ol pasin na lo ol yet i skulim em long en; ol i ting taim mama i karim em, save i stap long skin bilong em o i no stap long skin bilong em.” Tasol dispela tingting i no stret.

Sapos i gat hevi insait long famili, dispela inap mekim na pikinini i no skul gut. Na sapos famili i pas gut wantaim na i stap amamas, dispela inap helpim pikinini long skul gut. Wanpela ripot long edukesen i tok: “Famili i as na bai pikinini i skul gut o nogat; skul yet i no as bilong dispela.” Wanpela buk tu i mekim wankain tok: “Maski papa o mama i gat planti wok ol i mas save, sapos ol yet i tingim pikinini na strongim em na sambai long em maski ol i mekim liklik tasol, dispela inap helpim pikinini long skul gut.”​—Buk How to Help Your Child Through School.

Orait, olsem wanem yu ken wok gut wantaim ol tisa bilong pikinini bilong yu?

Stap Olsem Maus Bilong Pikinini

(1) Tingim ol samting pikinini i lainim long skul na wok long helpim em. Mekim olsem taim pikinini i kirap nupela long skul. Ol liklik pikinini i save amamas long papamama i helpim ol; ol yangpela, nogat.

Kaunim ol buk wantaim pikinini. David Lewis i tok: “Ol i kisim bikpela hap save (inap 75 pesen) long skul long rot bilong kaunim ol buk.” Olsem na sapos yu helpim pikinini bilong yu long rit gut bai yu helpim em gut. Ol i bin skelim dispela samting na ol i tok, sapos papamama i lainim pikinini long kaunim gut ol tok long buk, dispela bai helpim moa yet pikinini, winim wanpela tisa i gat bikpela save em i mekim long skul.

Na yu ken helpim pikinini tu long lain long rait na long bungim ol namba. Wanpela tisa (Ted Wragg) i tok: “Maski yu yet yu no smat tru long bungim ol namba samting, yu inap helpim pikinini long ol liklik wok long dispela.” Na sapos yu gat hap save tasol long rit rait samting, yu no ken larim dispela i pasim yu long toktok wantaim pikinini long ol samting em i lainim long skul bambai em i ken save yu laik helpim em.

(2) Toktok wantaim tisa long ol samting pikinini i lainim. Kaunim pepa bilong skul bambai yu ken save long ol samting ol i lainim ol skulmanki long en. Mekim taim skul i no kirap yet, na bai yu save wanem ol hevi inap kamap. Go toktok wantaim tisa bambai em i ken save long laik bilong yu na olsem wanem em i ken tingim gut. Olsem bai yutupela inap wok gut wantaim. Sapos skul i putim miting bilong ol tisa i ken save long ol papamama, go long miting. Taim skul i singautim ol papamama i go lukim wok bilong ol skulmanki, go lukim na toktok wantaim ol tisa bilong pikinini bilong yu. Gutpela tru yu mekim olsem; dispela bai helpim yu gut taim hevi i kamap.

(3) Helpim pikinini long skelim gut wanem samting em i laik skul long en. Yu mas save wanem samting pikinini i amamas long skul long en na wanem samting em i no save amamas long en. Kirapim pikinini long tingim gutpela wok em i ken mekim. Askim ol tisa, wanem wanem samting pikinini inap skul long en. Ol i save long ol samting skul i gat sedyul bilong skulim ol manki long en.

Hevi i no ken kamap sapos yu toktok gut wantaim ol tisa. Planti skul i save strong long ol pikinini i smat long skul ol i mas i go long yunivesiti samting. Tasol ol pikinini i laik mekim wok God i makim bilong ol Kristen, ol i no laik lusim planti yia long winim bikpela skul. Sapos ol i laik skul moa, ol i kisim kos bilong lainim sampela wok em inap helpim ol long lukautim ol yet long ol samting bilong skin. Sampela tisa i save kros long sumatin i mekim olsem, long wanem, ol i ting em i sakim gutpela skul ol i bin wok strong long givim long em. Sapos yu stori gut long sampela skul moa pikinini inap kisim long rot bilong wok em i laik mekim, bai ol tisa i save ol papamama Kristen i laik bai ol pikinini i wok yet long kisim save.a

Stretpela Rot Bilong Mekim

Yu inap abrusim planti bel hevi long helpim pikinini long skul sapos yu save, ol man i laik wok gut wantaim ol i mas toktok gut wantaim.​—Lukim blok “Rot Bilong Toktok Gut Wantaim Tisa.”

Nogut yu bel nogut na toktok planti na krosim tisa; yu mas i stap olsem maus bilong pikinini bilong yu​—yu mas toktok gut wantaim tisa na wok gut wantaim em. Sapos yu mekim olsem, bai yu helpim pikinini bilong yu long kisim gutpela skul.

[Ol Futnot]

[Blok long pes 10]

Rot Bilong Toktok Gut Wantaim Tisa

1. Wok long save long ol tisa bilong pikinini bilong yu.

2. Sapos yu gat tok long tisa, skelim gut pastaim: em i bin mekim tru rong?

3. Sapos yu bel hevi o belhat, larim bel i go kol pastaim na yu go toktok wantaim tisa.

4. Taim yu no bung yet wantaim tisa, raitim ol askim bilong givim long em na samting yu laik mekim.

5. Tokaut klia long tingting na laik bilong yu, na wok gut wantaim tisa long painim rot bilong stretim ol hevi.

6. Pilim gut tingting bilong tisa. Askim yu yet, Sapos mi tisa, bai mi mekim wanem? Dispela bai helpim yu long stretim gut tok wantaim tisa.

7. Harim tok; no ken toktok tasol. Sapos yu no save gut long wanpela samting, no ken pret long askim tisa. Sapos yu no wanbel wantaim tisa, tokaut long dispela na long pasin isi tokim em bilong wanem yu no wanbel wantaim em.

—Buk Help Your Child Through School, bilong Dokta David Lewis, em i as bilong ol dispela tok.

[Piksa long pes 9]

Kaunim buk wantaim pikinini

[Piksa long pes 9]

Go toktok wantaim tisa long ol samting pikinini i lainim

[Piksa long pes 9]

Helpim pikinini long skelim gut samting em i laik skul long en