Baibel i Tok Wanem?

“Bodi Bilong Ol Meri i No Strong Tumas”—Dispela i Daunim Ol Meri?

“PLANTI MAN I NO GAT STRETPELA TINGTING LONG OL MERI, NA OL I TING OL MERI I NO GAT SAVE LONG MEKIM WOK, NA TINGTING BILONG OL I NO WOK GUT, NA OL I NO INAP KISIM BIKPELA SAVE​—OL MAN I TING OL I MERI TASOL. BILONG WANEM OL I TING OLSEM?”​—BETTY A.

“OL MERI I KISIM TINGTING OLSEM OL I NAMBATU TASOL, NA MAN I NAMBAWAN.”​—LYNN H.

OLSEM WANEM? Taim Baibel i tok “bodi bilong ol meri i no strong tumas,” dispela i daunim ol meri? Dispela tok bilong Baibel i stap long 1 Pita 3:​7, em i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol. Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela.”

Taim Pita i raitim dispela tok long ol wanlotu Kristen, ol man i save daunim tru ol meri​—ol haiden na ol Juda i bikhet na lusim pinis lotu i tru i save mekim olsem. Olsem wanem? Pita na ol Kristen bilong pastaim i laik helpim tingting bilong ol man long bipo, em ol i save daunim ol meri?

Ol i Nambatu Tasol?

Ol man i bin stap long taim bilong Pita na ol i kaunim tok bilong em, ol i bin kisim wanem tingting long dispela tok “bodi bilong meri i no strong tumas”? Hap tok Grik (skeuʹos) ol i tanim olsem bodi, i kamap planti taim long Ol Skripsa Grik na i makim kain kain dis sospen samting bilong mekim wok. Taim Pita i tok “bodi bilong meri i no strong tumas,” em i no laik daunim ol meri. Sampela ves bilong Baibel i tok bokis long man na meri wantaim, ol i olsem “ol sospen graun” (2 Korin 4:7) na “ol sospen bilong kisim marimari” (Rom 9:23). Olsem na bodi bilong man i no strong olgeta, long wanem, em tu i olsem wanpela sospen na inap bagarap. Tru, Pita i tok bodi bilong meri “i no strong” olsem bodi bilong man. Tasol Rom 5:6 i stori long olgeta man na meri wantaim​—na i tok, ol i “no gat strong.” Olsem na ol Kristen bilong pastaim i no bin ting olsem dispela tok “bodi bilong ol meri i no strong tumas” i daunim ol meri, nogat.

Ol i ting tok bilong Pita i litimapim nem bilong ol meri. Long taim bilong Pita, ol man i no save litimapim nem bilong ol meri. Ol man i save bosim strong meri bilong ol, na paitim ol, na bagarapim bel na tingting bilong ol, na mekim pasin sem long ol olsem God i save pinis bai kamap. (Stat 3:16) Olsem na taim Pita i givim dispela tok long ol man marit em ol i Kristen, i olsem em i tokim ol: No ken bihainim pasin bilong ol man ausait long daunim na bosim ol meri.

Nau yumi ken glasim gut dispela tok “i no strong tumas.” Long dispela ves, Pita i no stori long samting bilong bel na tingting; em i stori long skin. Skin bilong meri i no strong olsem skin bilong man. Olsem wanem skin i no strong? Ol bun na masol i mekim na skin bilong man i moa strong, winim bilong meri. Tasol tok bilong Pita i no makim olsem man i winim meri long tingting o long samting bilong spirit o long stretpela pasin. Tru, taim sampela samting i kamap, pasin ol meri i save mekim bilong kamapim bel na tingting bilong ol i narapela kain long pasin ol man i save mekim, tasol dispela i no makim olsem man i moa strong na meri i no strong tumas. Baibel i stori long sampela meri olsem Sara, Debora, Rut, Esta, em ol i bihainim laik bilong God na ol i strong long bihainim stretpela pasin, na ol i sanap strong na bihainim gutpela tingting. Ol man i gat pasin daun i save olsem sampela meri inap wokim gut tingting bilong ol​—winim ol man.

Tasol sampela i ting, kain tok olsem meri “i no strong tumas” i makim olsem ol meri i nambatu lain tasol. Tasol tingim dispela tok piksa: Wanpela man i gat tupela gutpela dis. Wanpela dis i strongpela, na narapela i no strong tumas. Olsem wanem? Ating man hia bai mekim nabaut long namba tu dis, long wanem, em i no strong tumas? Nogat, a? Em bai isi long en na lukautim gut, winim strongpela dis. Olsem na i stret long ting man i nambawan na meri i nambatu tasol, long wanem, man i gat strongpela skin moa? Nogat tru! Pita i mekim dispela tok “bodi bilong meri i no strong tumas” bilong kirapim ol man long tingim gut ol meri​—i no bilong daunim ol.

“Bihainim Gutpela Tingting”

Pita i kirapim ol man marit long “bihainim gutpela tingting na sindaun gut wantaim ol meri bilong [ol].” Tasol ol i mas bihainim pasin bilong husat na mekim olsem? Long ol ves i kam paslain, Pita i stori long Krais i tingim ol lain bilong em na mekim pasin sori long ol. (1 Pita 2:​21-25; 3:7) Long olgeta taim Krais i save tingim ol samting bilong helpim ol disaipel i nambawan na ol samting bilong helpim em yet i nambatu. Em i laik helpim ol long i stap gutpela long samting bilong spirit na long skin, na em i no save subim ol long mekim ol samting i hatwok tumas long ol i mekim. Ol man marit i mas bihainim gutpela pasin bilong Krais na mekim wankain pasin long meri bilong ol.

Taim marit i wok gut, dispela i no save kamap nating​—i gat as bilong en. Man na meri wantaim i mas save long wok ol i mas mekim bilong helpim marit long kamap gutpela. Olsem na Pita i tok, ol man marit i mas “bihainim gutpela tingting” na sindaun wantaim meri bilong ol. Ol i mas kisim gut save long pasin Jehova na Pikinini bilong em, Krais Jisas, i bin mekim long ol meri. Ol i mas save long pasin God i laik ol i mekim long meri bilong ol.

Na tu, man marit i mas save gut long meri bilong em​—ol tingting i stap long bel bilong em na strong bilong em, ol samting em i laikim na ol samting em i no laikim. Ol man i mas save long rot bilong tingim gut meri​—em i gat tingting na save, na em i gat nem. Baibel i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios. Olsem tasol yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Man i laikim tru meri bilong en, em i laikim tru em yet. Yumi save, i no gat wanpela man i save birua long bodi bilong em yet. Nogat. Em i save givim kaikai long en na lukautim gut.”​—Efesus 5:​25, 28, 29.

Mekim Gutpela Pasin Long Ol

Taim Pita i tok ol meri “i no strong tumas,” em i mekim narapela tok tu olsem, ol man i mas “mekim gutpela pasin long ol.” Insait bilong dispela tok bilong Pita long tok Grik (ti·meʹ) i olsem: Litimapim nem bilong meri, tingim gut em, tingim em i olsem wanpela gutpela samting tru. Olsem na man i no ken ting em i ken mekim gut long meri long laik bilong em yet, nogat; em i wanpela samting man i mas mekim long meri​—em i mas tingim meri long olgeta taim na mekim gut long em. Pol i tokim olgeta Kristen, man na meri wantaim, olsem: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.”​—Rom 12:10.

God Jehova i no tingim ol meri i olsem bilas tasol bilong man. Long lain Israel, ol man na meri i brukim lo bilong God ol i bin kisim wankain strafe sapos ol i bagarapim marit, mekim pasin sem long wanblut o long animal, na ol narapela rong. (Wok Pris 18:​6-17, 23, 29; 20:​10-12) Ol Sabat, ol lo i bosim ol Promisman, ol Bikpela De, na ol narapela samting bilong Lo inap helpim ol meri tu. (Kisim Bek 20:10; Namba 6:2; Lo 12:18; 16:​11, 14) Ol pikinini i mas bihainim tok na litimapim nem bilong papa na mama wantaim.​—Wok Pris 19:3; 20:9; Lo 5:16; 27:16; Sindaun 1:8.

Buk Sindaun sapta 31, ves 10 inap 31 i litimapim nem bilong “meri i gat gutpela pasin tru,” long wanem, em i stap gut long man bilong em, na em i meri bilong wok, na em i bihainim gutpela tingting taim em i mekim ol narapela narapela wok bilong em. Em i gat gutpela nem long mekim wok bisnis bilong helpim famili, na long lukautim gut ol samting bilong mani. Dispela i narapela kain tru long tingting bilong sampela man, em ol i ting meri i olsem samting nating tasol! Bihain insait long kongrigesen Kristen, spirit holi i strongim ol meri bilong autim tok long Krais. (Aposel 1:​14, 15; 2:​3, 4; skelim wantaim Joel 2:​28, 29.) Olsem na sampela meri bai kamap jas long heven na skelim ol man, na ol meri, na ol ensel tu. (1 Korin 6:​2, 3) Tru, ol meri i no ken skulim ol man long ol bung bilong kongrigesen; tasol sampela taim ol meri Kristen i bin beten o autim tok profet. Baibel i tok, ol i ken skulim ol yangpela meri, ol pikinini, ol man ausait long kongrigesen.​—Matyu 24:14; 1 Korin 11:​3-6; Taitus 2:​3-5; skelim wantaim Song 68:11.

Tok bilong 2 Pita 1:17 inap helpim yumi tu long save, Pita i gat wanem tingting tru taim em i tok ol man i mas mekim gutpela pasin long ol meri. Dispela ves i tok, Jehova i givim biknem long Jisas taim em i tokaut long ol man olsem em i amamas long pikinini, em i tok: “Dispela em i Pikinini bilong mi, mi laikim em tumas, na mi amamas long em.” Man marit i mas mekim wankain pasin, na ol pasin em i mekim long meri long haus na taim tupela i stap wantaim ol narapela man i mas kamapim long ples klia olsem em i givim biknem long meri bilong em.

Kisim Laip Bilong i Stap Oltaim

Inap longtaim pinis, ol man i save tingim meri i olsem samting nating na i no gat nem liklik​—olsem em i wokmeri tasol o samting bilong mekim laik bilong man tasol. Tasol bilip Kristen i litimapim tru meri, long wanem, em i kirapim ol man long tingim gut meri na litimapim nem bilong em. Buk Barnes’ Notes on the New Testament i tok olsem, dispela tok bilong Pita i ‘kamapim wanpela bikpela tok tru long ol meri. Long olgeta lotu, ol i save tingim man i olsem nambawan na meri i nambatu; lotu Kristen tasol i no save mekim olsem. Lotu Kristen i skulim yumi olsem, ol meri bai kisim laip long bihain na olgeta gutpela samting em lotu i tok yumi inap kisim. Dispela wanpela tok tru inap pasim ol man long olgeta hap long daunim na bagarapim ol meri, na helpim sindaun bilong ol meri long kamap gutpela moa.’

Krais i baim pinis ol man na meri wantaim, na dispela i nambawan as na ol man marit i mas laikim tru na mekim gut long meri bilong ol, long wanem, ol i bilong Krais. Bihain long Pita i tok ol meri “i no strong tumas,” em i tok moa olsem: “Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela.” (1 Pita 3:7b) Tok bilong Pita i makim olsem, sapos man i mekim nogut long meri bilong em, dispela bai bagarapim pasin wanbel bilong em wantaim God na pasim ol beten bilong em.

Dispela tok “i no strong tumas” i no bilong daunim ol meri; nogat tru. Tru, Jehova i makim man olsem het bilong famili, tasol em i no orait liklik long man i mekim nogut long meri. Em i tok, ol man i mas bihainim gutpela tingting na sori long meri na mekim gutpela pasin long em.

Baibel i kirapim olgeta man, ol marit na ol singel, long litimapim nem bilong ol meri, na no ken mekim olsem ol i nambawan na meri i nambatu tasol. Ol man na meri i givim bel long lotuim God na tingim ol narapela olsem ol i gat nem, ol bai kisim ol gutpela blesing tru long God.​—Skelim wantaim 1 Korin 7:16.

[Piksa Kredit Lain long pes 19]

Miss G. E. K. / Artist: Alice D. Kellogg 1862-1900

Courtesy of Joanne W. Bowie