Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g93 4/8 p. 15-17
  • Tingim Gut Ol Meri Insait Long Kongrigesen

No gat vidio bilong dispela seksen.

Sori, popaia kamap long lodim vidio.

  • Tingim Gut Ol Meri Insait Long Kongrigesen
  • Kirap!—1993
  • Ol Liklik Het Tok
  • Wankain Infomesen
  • Olsem Wanem Meri i “No Strong Tumas”?
  • I Mas i Gat Wanem Samting?
  • “Bodi Bilong Ol Meri i No Strong Tumas”—Dispela i Daunim Ol Meri?
    Kirap!—1995
  • Gutpela Tok Bilong Stiaim Ol Marit
    Wastaua i Tokaut Long Kingdom Bilong Jehova—2005
  • Man i Mas Laikim Tumas Meri Bilong Em na Tingim Gut Em
    Wastaua i Tokaut Long Kingdom Bilong Jehova—1989
  • Man na Meri—Tupela Wantaim i Gat Gutpela Wok
    Wastaua i Tokaut Long Kingdom Bilong Jehova—2007
Lukim Moa
Kirap!—1993
g93 4/8 p. 15-17

Tingim Gut Ol Meri Insait Long Kongrigesen

LONG Baibel i gat lo olsem Krais i stap aninit long God, na man i stap aninit long Krais, na meri i stap aninit long man bilong em. (1 Korin 11:3) Tasol pasin bilong i stap aninit long narapela i no olsem narapela i stap olsem hatpela bos. Man i no stap gutpela het o bos bilong famili sapos em i kros pait, o paitim ol, o toknogutim ol. Na man Kristen i no ken bosim meri bilong em long olgeta samting. Em i no gutpela sapos man i ting em i no inap popaia.a Sapos man na meri i lain long tok, “Sori, mi popaia, yu tok stret,” ating planti marit bai stap gut. Tasol sampela taim em hatwok long tupela marit i mekim dispela kain tok.​—Kolosi 3:​12-14, 18.

Taim aposel Pol na Pita i mekim sampela tok bilong helpim ol marit, olgeta taim ol i tok, ol marit i mas bihainim pasin bilong Krais. Meri bai daun long man bilong em sapos man i bihainim lek bilong Krais na mekim gutpela wok bos, “long wanem, man i het bilong meri bilong en, olsem Krais em i het bilong [kongrigesen]. . . . Na Krais i bin kisim bek [kongrigesen].”​—Efesus 5:23.

Aposel Pita i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela.” (1 Pita 3:7) Wanpela Baibel Spen i tanim dispela tok olsem: ‘Yupela ol man: kamapim pasin isi long meri bilong yupela na tingim gut meri.’ Sapos man i kamapim dispela kain pasin em bai tingim gut meri bilong em. Em i no ken ting meri bilong em i bilong inapim ol laik bilong em long ol samting bilong maritpasin. Taim wanpela meri i liklik yet, wanpela i bin mekim pasin sem long em, na em i tok: ‘Sapos meri i bin kisim dispela hevi taim em i liklik yet na nau man bilong em i mekim gut long em, em i bikpela samting. Mipela ol meri i mas save man i laikim tru mipela, na mipela i no stap tasol bilong inapim laik bilong man long ol samting bilong maritpasin, o bilong klinim haus tasol. God i bin kamapim marit bambai man na meri i ken poroman wantaim na narapela i ken helpim narapela. Tupela i mas wok wantaim.​—Stat 2:18; Sindaun 31:​28, 29.

Olsem Wanem Meri i “No Strong Tumas”?

Pita i givim tok long ol man marit olsem ol i mas mekim gut long meri bilong ol. Em i tok: “Bodi bilong ol meri i no strong tumas.” (1 Pita 3:7) Wanem insait bilong dispela tok bilong Pita? Yumi save skin bilong ol meri i no strong olsem skin bilong man, a? Tasol yumi no ken ting man i winim meri long ol samting bilong tingting na bel. Planti meri i karim bikpela hevi, na sapos man i mas karim dispela hevi, maski em i mas karim sotpela taim tasol, ating em i no inap. Yumi ken tingim hevi sampela meri i mas karim sapos man bilong ol i dring o em i man bilong kros pait. Na yumi ken tingim hevi na bikpela pen meri i karim taim em i karim pikinini! Sapos man marit i stap wantaim meri bilong em taim em i karim pikinini, ating dispela man bai tingim gut meri bilong em, long wanem, em i save meri bilong em i gat strongpela bel.

Long yia 1944, wanpela meri Juda (Hannah Levy-Haas), bipo em i bin stap long banis kalabus nogut (Ravensbrück) long Jemani, em i bin rait olsem: ‘Mi save bel hevi tru long wanpela samting long hia. Ol man i no gat strong olsem ol meri. Ol meri inap karim hevi long skin na long bel, tasol ol man nogat.’​—Buk Mothers in the Fatherland, em Klodia Koons i raitim.

Taim yumi tingim dispela samting i bin kamap long dispela banis kalabus nogut long Jemani, i no gat gutpela as na ol man i daunim ol meri long wanem meri i no gat strongpela skin. Olsem wanpela buk i tok, planti meri i gat strongpela bel, winim ol man. (The Japanese) Long kongrigesen Kristen ol strongpela meri Kristen inap helpim ol meri i gat bikpela bel hevi. Sampela meri, em man bilong ol i mekim nogut long ol oltaim, ol i no hatwok long toktok wantaim wanpela strongpela meri Kristen na kamapim hevi bilong ol, tasol ating ol bai hatwok long toktok wantaim wanpela man. Sapos hevi i bikpela, na strongpela meri Kristen i laik kisim sampela tingting long dispela, em inap askim wanpela elda long helpim em long givim sampela gutpela tok long dispela meri i gat hevi.​—1 Timoti 5:​9, 10; Jems 5:​14, 15.

Taim tingting bilong ol meri i no stap isi o ol i bel hevi long wanpela samting, sampela man i tok, ol meri i stap olsem, long wanem, sik bilong mun i painim ol. Dispela kain tok bilong ol man i save skrapim tru bel bilong sampela meri. Wanpela meri Kristen, nem bilong em Beti, em i tok: ‘Yumi save olsem aposel Pita i bin tok, ol meri i no gat strongpela skin, tasol i no gutpela sapos long ples wok bos i ting taim meri i gat hevi samting, as bilong dispela em sik bilong mun. Mipela i gat save, na mipela ol meri i laik bai ol man i tingim gut mipela na harim gut tok bilong mipela taim mipela i gat wanpela hevi samting.’

Olgeta wan wan i gat tingting na pasin bilong ol yet. Sampela meri i gat strongpela bel na sampela nogat. Sampela man i gat strongpela bel na sampela nogat. Dispela meri Beti i bin tokim Kirap! olsem: ‘Mi no amamas sapos wanpela i skelim mi long wanem mi wanpela meri tasol. Mi bin lukim sampela man i krai na sampela taim ol i amamas na planti taim ol i bel hevi. Na mi save long sampela meri i no gat liklik sori long bel bilong ol.’

I Mas i Gat Wanem Samting?

Bilong senisim dispela pasin long daunim meri, i no inap sapos ol meri i kempen o tokaut long dispela hevi. Na i no inap sapos ol man i mekim wan wan samting bilong tingim gut ol meri. Long olgeta lain ol man i mas tingting gut na askim skin bilong ol yet​—ol i ken mekim wanem bilong helpim ol meri long i stap amamas na ol i no ken putim hevi long ol meri?​—Matyu 11:​28, 29.

Wanpela nius (Time) i bin kamapim tingting bilong wanpela man bilong raitim ol buk (Katha Pollitt). Em i tok: ‘Planti man i no save repim meri o paitim em o kilim em i dai, tasol i no olsem ol i no gat hap asua long dispela pasin bilong mekim nogut long ol meri. Pasin bilong ples em ol man i save bihainim, na tingting bilong ol long ol meri, dispela i as bilong planti hevi i painim ol meri. Mi ting ol man i mas skelim gut bel na tingting bilong ol long dispela samting.’

Tasol maski olgeta man long olgeta hap i senisim tingting bilong ol long ol meri, dispela tu i no inap stretim olgeta pasin i no stret long dispela graun. Bilong wanem? Long planti kantri ol man i mekim pasin nogut tru na pasin i no stret long ol narapela man, i no long ol meri tasol. Pait, na kros pait, na kilim man i dai, na mekim pasin birua na pretim man, em pasin tru bilong planti man long sampela kantri. Olsem na i mas i gat nupela gavman i bosim dispela graun olgeta. Na olgeta man i stap aninit long dispela gavman i ken lain long stretpela pasin. God i bin tok promis long dispela samting, olsem Kingdom bilong em i stap long heven bai bosim dispela graun. Long dispela taim tasol olgeta man na meri na pikinini bai mekim pasin i stret long narapela. Na long dispela taim tasol man bai tingim gut meri na meri bai daun long man. Long Aisaia 54:​13 Baibel i tok olsem: “Bai mi yet mi skulim ol pikinini bilong yu, na bai ol i gat gutpela sindaun tru.” Em nau, taim olgeta manmeri i lain long olgeta stretpela lo bilong Jehova, dispela bai mekim na long nupela taim olgeta bai tingim gut narapela.

[Ol Futnot]

a Lukim Wastaua bilong Disemba 15, 1991, pes 19-21. “Meri i Mas Daun Olsem Wanem Long Man Bilong Em?”

[Piksa long pes 16]

Tok bilong strongpela meri inap helpim narapela

[Piksa long pes 17]

Man i save tingim gut meri bilong em sapos em i helpim em long mekim sampela wok long haus

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim