Sampela Tok i Kam Long Olgeta Hap
Meri i No Ken Mekim Wok Pris
Wanpela lain i givim askim long sampela Katolik na ripot Gallup i tok, winim 66 pesen bilong ol dispela Katolik i tok, ol i orait long meri i kamap pris. Tasol Pop John Paul Namba 2 i tok, ol Katolik i mas lusim dispela kain tingting. Pop i salim pas long ol bisop na pas i tok: ‘Misin i no gat strong long makim ol meri i kamap pris, na olgeta man i stap gut long lotu i mas bihainim dispela tok.’ Pas i gat het-tok olsem: ‘Ol Man Tasol i Ken Kamap Pris,’ na narapela tok bilong pop i kam wantaim pas na i tok olsem: ‘I no wanpela samting bilong ol man bilong lotu i ken skelim na tok resis long en. Lain bilong lotu i mas orait na stap gut long dispela tok; skulim man long narapela kain tok i no stret na i save bagarapim bel bilong man.’ Tupela mun paslain long pas pop i raitim, Sios Bilong Inglan i makim 32 meri i kamap pris, em namba wan taim misin i bin mekim olsem. Dispela i mekim na 700 pris Angliken i no amamas na tok ol bai lusim misin na go insait long lotu Katolik; 35 pris tasol i lusim Misin Angliken. Sampela bikman long Vatiken i ting, wanpela hap wok bilong pas bilong pop i bilong tokim ol pris Angliken i laik lusim misin, Misin Katolik bai amamas sapos ol i kamap Katolik.
‘Samting Bilong Kamapim Dai’
Nius Veja i kamapim stori ‘Samting Bilong Kamapim Dai.’ Nius i tok: ‘Nau long ol biktaun planti man i laik holim gan long haus bilong ol.’ Tasol wanpela man bilong Brasil em i hapman stret long sut long gan em i tok: ‘Birua inap painim olgeta man i holim gan. Sapos man i no laik kisim bagarap, i gutpela sapos em i no baim gan.’ Ating ol raskol i save moa long sut long gan, na taim ol i laik mekim nogut long man, nau man i kirap nogut na wok long painim gan bilong em. Sapos em i no redi, ‘ating em i no inap winim raskol.’ Na wanpela polis i tok: ‘Man i no holim gan bai mekim wok long tingting bilong pasim raskol, em i no pait.’
Nau i No Gat Planti Animal
Bipo kantri Simbabwe inap tok, ol i gat planti blakpela raino, winim ol narapela kantri. Long 1980 i gat olsem 3,000 raino i stap, nau i gat 300 samting. (Nius The Star, bilong Johanisbek) Ol man i wok hait na kilim ol animal, ol i wok yet long kilim ol raino bilong kisim kom bilong en. Long nau gavman i orait long ol wokman bilong nesenel-pak i ken kilim i dai ol man i wok hait na kilim animal bilong kisim mani. Tasol wanpela hevi i olsem, gavman i no gat bikpela mani bilong helpim dipatmen bilong ol nesenel-pak na ol wokman i ken raun long ol hap ol raino i stap long en. Nius The Star i tok, ‘Insait long 10-pela yia namba bilong ol elefan long Simbabwe i go daun. Bipo 80,000 elefan i stap, nau i gat 60,000 tasol.’ As bilong dispela hevi em ol man i wok hait na kilim ol animal bilong kisim mani.
Asua Bilong Ol Draiva na AIDS i Go Bikpela
Long India planti man ol inap kisim sik AIDS em ol draiva bilong trak. Planti tausen draiva i lusim famili bilong ol inap longpela taim liklik, olsem na ol i go long ol haus pamuk long Bombe. I gat 80,000 pamukmeri i wok long ol dispela haus pamuk, na ol saveman i ting 50 i go inap 60 pesen bilong ol, ol i gat jem HIV bilong AIDS. Taim ol i lusim Bombe ol draiva i go long ol narapela hap bilong kantri. Long sampela liklik ples i stap klostu long ol bikrot, ol man bilong ples i bin sanapim planti liklik haus bilong ol yangpela meri bilong ples i ken slip wantaim ol draiva na kisim mani. Na sampela yangpela maniman bilong ol biktaun klostu, ol tu i save kam long ol dispela liklik ples bilong slip wantaim ol meri. Na olsem nius The Times of India i tok: ‘Jem HIV i go nabaut na i no gat wanpela man inap save sik i kam na i go long wanem wanem hap.’ Na wanpela samting i mekim na dispela hevi i go bikpela moa, em tingting kranki bilong planti draiva. Ol i ting ol i mas slip wantaim meri na bai skin bilong ol i no ken hat tumas taim ol i draiv planti aua long bikpela san.
Ol i Kisim Gutpela Samting Long Pasin Sekan?
Wanpela nius bilong Frans (Valeurs Actuelles) i tok: ‘Olsem wanem long “gutpela pe” bilong pasin sekan?’ Pasin birua namel long Is na Wes i pinis, na nau planti gavman i no save tromoi bikpela mani long baim ol samting bilong pait na ami samting. Olsem na nau ol man i ting ol inap mekim wok bilong helpim ol rabisman na daunim ol bikpela sik long hap bilong dispela bikpela mani em bipo ol i bin tromoi long ol samting bilong pait. Nius i stori long wanpela ripot (UN Human Development Report) em nau tasol ol i kamapim, na ripot i tok, long 7-pela yia i go pinis i kam inap nau, mani ol gavman i no bin tromoi long baim ol samting bilong pait i winim 935 bilion kina. Tasol ol i no tromoi sampela mani moa bilong helpim sindaun bilong ol man. Na ripot i tok, planti kantri i wok yet long tromoi bikpela mani long baim ol samting bilong pait, winim inap 3-pela o 4-pela taim mani ol i save tromoi long skulim ol man na bilong stretim sik.
Planti Man i Lusim Misin
Lain bilong wanpela nius (Yomiuri Shimbun) i givim sampela askim long ol man na ol i kamapim ripot olsem: Nau long Japan planti man i no givim bel moa long lotu. Kirap long 1979 i kam inap nau long olgeta 5-pela 5-pela yia, lain bilong dispela nius i bin skelim tingting bilong ol man long lotu. (Survey of National Awareness on Religion) Nau ol i kisim save olsem, long olgeta 4-pela 4-pela man, wanpela tasol i save bilip long wanpela lotu; bipo i no olsem. Bilong wanem planti man long nau i no givim bel long lotu? Dispela lain i givim askim long ol man na 47 pesen i tok ol i no amamas, long wanem, ‘ol lotu i strong tumas long kisim mani.’ Na sampela i tok, ‘taim ol lotu i autim tok, ol i mekim olsem ol i tok pait,’ na ‘ol i givim bel tumas long wok politik,’ na ‘pasin bilong ol pris pasto i mekim na mipela i no inap litimapim nem bilong ol.’ Tasol ‘44 pesen bilong ol dispela man i ting God o Buda “i stap.” ’
Man Inap Baim Blesing
Misin Otodoks Bilong Rasia i sot long mani, olsem na planti pris i wok long baim ol blesing i go long ol man. Tasol i no olgeta pris i wanbel long mekim dispela wok bisnis long ples klia. Nius Moscow Times i kamapim tok bilong wanpela pris bilong Misin Otodoks Bilong Rasia na em i tok: ‘Planti lain bilong misin i sot long mani bilong stretim haus lotu bilong ol.’ Olsem na sapos man i laik pris i kam na blesim stua, o haus, o ples dring, o haus laki bilong em, em i mas baim pris. Na ka tu inap kisim blesing. Pris i raun long hap i gat ples bilong baim ol sekenhen ka, bai tingim em wanem kain ka na em bai makim pe papa bilong ol ka i mas givim. Em nau, ka i ken kisim blesing. Pe bilong ol blesing i olsem K15 i go inap K25. Pris bai beten, tromoi paura bilong kamapim gutpela smok smel, na tromoi “wara holi” long ka.
Was Gut Long Draiva Nogut
Wanpela draiva i siksti stret na abrusim ka bilong yu. Taim em i kam long hap rot ka bilong yu i ran long en, klostu em i bamim yu. O em i opim na pasim lait bilong ka bilong toksave olsem yu mas go long arere bilong rot. O taim em i abrusim yu em i kros na brukim han long yu. Sampela saveman i tok, sapos yu no bihainim gutpela tingting em inap kilim yu i dai. Olsem na dispela ol saveman i kamapim tingting bilong ol long wanpela buk (Reader’s Digest bilong Saut Afrika). Ol i tok: Stap isi; no ken tingting long resis wantaim narapela draiva. Lukluk i go tasol, no ken lukluk stret long ai bilong narapela draiva. Long olgeta 3-pela i go inap 10-pela sekon lukim ol glas bilong ka. Sapos yu lukim ka baksait na yu ting hevi bai kamap, orait go isi isi na ka inap abrusim yu na go pas, o yu ken putim liklik lait i save kirap i dai bilong toksave olsem yu laik go long narapela hap rot. Na nius i tok: ‘Sapos yu bihainim gutpela tingting long samting yu mekim long wanpela draiva i kros, dispela inap lukautim yu na yu no ken bagarap.’
Pilai Soka na God
Nius Jornal da Tarde i tok: ‘Em namba 4 taim Brasil i laik winim Wol Kap long pilai soka. Olsem na ol i orait long mekim kain kain samting bilong lotu paslain long pilai, namel long en, na bihain long en. Bebeto bilong Brasil i tok: ‘Mi ting God bai kamap wanpela man Brasil long dispela Wol Kap.’ Tim Brasil i win na tok tenkyu long God, olsem na kadinal Dom Lucas Moreira Neves i tok: ‘Long planti man i insait long Wol Kap, sapos ol inap winim, dispela inap helpim ol yet, na famili, na sindaun bilong ol man olsem: Nau ol i no man nating, na ol i save ol inap mekim wok bilong ol, na em i mekim gut bel bilong ol, na em i litimapim kantri bilong ol.’ Tasol wanpela hapman stret bilong pilai soka, em Mauro Silva, em i tok: ‘Mi no gat wankain tingting olsem sampela long tim bilong Brasil, mi no ting God i bin helpim mipela long winim Wol Kap. God i no save tingim wanpela tim na narapela nogat, na em i no save tingim pilai soka.’
Hevi Bilong Ol Sotpela Man
Wanpela nius (Süddeutsche Zeitung) i tok: Long Jemani ol man i no winim 1.5 mita, ol inap kamap memba bilong wanpela klap bilong ol sotpela man (Association of Short People). Wanpela meri bilong dispela klap (Sabine Popp) i tok, em i nolaik tru taim ol man i kolim em ‘sotpela meri.’ Em i tok: ‘Mipela i man tru, mipela i no olsem man o meri insait long stori bilong ol tumbuna.’ Tasol ol sotpela man i ken hatwok tru, long wanem, ol baten bilong eleveta na lait, na ol samting bilong opim dua, ol i antap tumas. Tasol ol sotpela man i no karim hevi bilong skin tasol, nogat. Siaman bilong dispela klap, em Harald Berndt, em i tok, ol man i no luksave long ol gutpela samting ol sotpela man inap mekim. Em i tok: ‘Maski ol i sotpela tru, ol inap mekim gutpela wok.’