Pas Bilong Ol Man
Ol Sabwe Bilong Mosko Nau tasol mi kaunim stori “Ol Naispela Tren—Stesin Insait Long Graun Long Mosko.” (Mas 8, 1995) Oltaim mi save tingting long raun long ol narapela hap bilong graun, na taim mi kaunim dispela stori, tingting bilong mi i stap pinis long dispela hap.
J. H., long Nu Silan
Mi bin go raun long Mosko long taim mi go long kibung bilong ol Witnes Bilong Jehova. Mi lusim bikpela hap taim long raun long Metro. Long dispela taim mi no bin ting dispela tren—stesin insait long graun em i wanpela bilong ol nambawan bikpela na naispela sabwe bilong dispela graun. Olsem na mi bin amamas tru long kaunim dispela stori.
P. M., long Finlan
Tok Pait Long Haus Sik Mi gat 12-pela krismas. Mi bin kaunim dispela stori “Ol i No Majikman o Wanpela God.” (Janueri 8, 1995) Mi bin amamas taim mi kaunim stori bilong wanpela yangpela Kristen wankain olsem mi, em i sanap strong na tokaut strong long ol dokta bilong haus sik na dokta bilong katim man, olsem em i no laik kisim blut.—Aposel 15:20.
P. M. H., long Amerika
Mi gat 19 krismas. Taim mi kaunim ekspiriens bilong Mercy Uwasi dispela i bin strongim tru bilip bilong mi! Nau mi save, bilong stap gut long Jehova i no olsem yumi mas i gat bikpela krismas, nogat; yumi mas laikim tumas Jehova. Dispela i mekim na nau mi tingting strong moa yet long stap gut long Jehova.
S. M., long Saut Afrika
Pen Wok mani bilong mi em long rapim ol masol bilong sikman. Mi laik tok tenkyu long yupela long ol stori “No Gat Pen Moa—Kain Samting Olsem Inap Kamap?” (Mas 8, 1995) Mi kirap nogut tru long ol dispela stori; ol i no stori nating. Yupela i bin skelim gut tru dispela hevi long pen na kamapim stret ol samting long en. Ol dispela stori bai helpim gut ol bikpela dokta, ol sikman, na sampela man moa. Mi wok yet long helpim ol sikman em skin bilong ol i pen, tasol mi save, aninit long Kingdom bilong God, dispela kain pen i save stap oltaim long man bai pinis. Mi save wetim dispela de.
D. T., long Denmak
Ol dispela stori i mekim gut bel bilong mi. Mi bin kamapim ol stori long sampela narapela man; olsem mi, ol tu i save karim pen long olgeta de.
M. G., long Amerika
Musik Mi amamas tru long kaunim stori “Bipo Mi Raun Olsem ‘Hipi’—Nau Mi Wok Misineri Long Saut Amerika.” (Disemba 8, 1994) Tasol i gat wanpela samting long dispela stori mi tingting planti long en. Olsem: Richard Fleet i tok, long Septemba 1973, em i laik go long Livapul na harim musik bilong wanpela lain bilong singsing (The Beatles). Mi bin ting dispela lain bilong singsing i mekim laspela singsing bilong ol long 1969, na long 1970 ol i bruk.
C. S., long Jemani
Sori long dispela popaia. Richard Fleet i laik tok, em i go long Livapul bilong lukim wanpela klap em bipo dispela lain bilong singsing (“The Beatles”) i bin singsing long en.—Edita.