Yu Save Tingim?
LONG nau i gat planti handet lotu na planti ol liklik lotu i kamap nabaut. Olsem wanem yu ken save long lotu God i orait long en? Ating i olsem wok yu mas mekim bilong painim wanpela nil insait long sampela gras i drai na i hip i stap, a? Tasol olsem wanem? Yu mas glasim olgeta wan wan gras bilong painim nil? Nogat. Na i wankain tu long lotu—i no olsem yu mas glasim olgeta wan wan lotu. Baibel i save helpim yu long save long dispela ‘wanpela bilip’ tru.—Efesus 4:5.
Long narapela “Kirap!” i gat het-tok “Yu Save Tingim?” (Novemba 8, 1994, pes 13), mipela i bin stori long bilip bilong planti lotu olsem man i gat tewel. Mipela i kamapim tok bilong Baibel olsem man i no gat tewel i save kisim gutpela blesing o kisim bikpela pen taim man i dai pinis; nogat tru. (Saveman 9:5, 10; Esekiel 18:4) I no hatwok long save long dispela tok tru bilong Baibel, olsem na yumi no gat wok long skelim ol lotu i tok man i gat tewel. Em nau, i no gat planti lotu yumi mas skelim bilong save long lotu God i orait long en. Orait, i gutpela sapos yumi skelim sampela askim moa wantaim tok bilong Baibel olsem i stap daunbilo na yumi ken save wanem lotu God i orait long en.
1. Yu ting lotu i tru bai litimapim nem o givim biknem long ol bikman bilong lotu, na givim bikpela namba long ol, em Baibel i no as bilong en?—Song 96:5-7; Matyu 23:6-12; 1 Korin 3:5-9.
2. I stret lotu i tru i gat ol bikpela wok bisnis bambai ol bikman bilong en inap kisim gutpela sindaun tru?—Matyu 6:19-21; Jems 2:1-4; 5:1-3.
3. I stret yumi ken tok wanpela bilip tasol bilong lotu inap makim em olsem em i lotu tru (olsem Baptis, Pentikostal), o kantri lotu i bin kamap long en (olsem Rom, Sauten, Sios Bilong Inglan), o wanpela man bilong graun i as bilong en (olsem Luter, Kalvin, Wesli), o lo bilong en (olsem ol Presbitirian, Episkopal, Kongrigesenal)?—Aisaia 43:10, 12; Aposel 11:26.
4. Yu ting lotu i tru bai haitim nem bilong God o givim narapela nem long em, tasol Baibel yet i tokaut long dispela nem?—Aisaia 12:4, 5 NW; Matyu 6:9; Jon 17:26.
5. (a) Lotu i tru i mas ting olsem wanem long Baibel? (Song 119:105; Luk 24:44, 45; Rom 15:4; 2 Timoti 3:14-16) (b) Em i mas ting olsem wanem long wanpela bilip ol i tok i kamap long rot bilong driman samting bihain long taim ol i bin raitim Baibel?—Galesia 1:8, 9.
6. Ol man i save lotu tru long God i tok wanem samting na husat i rot bilong kisim bek yumi?—Song 27:1; Matyu 6:33; Rom 16:25-27; 1 Korin 15:27, 28; KTH 11:15.
7. Ol bilip bilong lotu i tru i mas kamapim wanem ol kain pasin long lain bilong en?—Matyu 22:37-40; Efesus 4:23-29; skelim Galesia 5:19-21 wantaim na 5:22, 23.
8. Yu ting lain brata i save lotu tru long God, em ol i stap long olgeta hap, bai ol i insait long wok politik i save brukim ol man i stap narapela narapela lain, na bai ol i litimapim ples o kantri?—Daniel 2:44; 7:14; Jon 18:36; Rom 16:17; 1 Korin 1:10.
9. Yu ting lotu God i orait long en bai larim ol wanbilip i insait long ol bikpela pait o pait bilong kilim i dai man bilong narapela skin o lain?—Kisim Bek 20:13; Aisaia 2:2-4; Jon 13:34, 35.
10. Long nau husat long olgeta hap i save kamapim pasin Kristen tru bilong laikim narapela? Husat em wok politik, o lain o kantri bilong ol, i no save brukim ol? Husat ol i no save litimapim nem bilong ol bikman? Husat ol i no mekim nogut long wanpela man bilong kisim mani o namba bilong em? Husat ol i no insait long ol bikpela pait? Lotu bilong husat i gat nem em Baibel i as bilong en? Husat ol i save tok, Kingdom bilong God i rot bilong stretim ol hevi bilong ol man?—Aisaia 43:10, 12.
Yu Save Tingim? Baibel i Bekim
Daunbilo em sampela tok bilong Baibel mipela i raitim bilong bekim ol askim long pes 12:
1. “Ol i save laik long kisim ol namba wan sia long ol bikpela kaikai, na ol namba wan ples bilong sindaun long ol haus lotu. Ol i laikim tumas long ol manmeri i mas givim gude long ol long ol ples bung, na ol i laik bai ol man i mas kolim ol ‘Tisa.’ Tasol ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. . . . Bikman bilong yupela em i mas i stap wokman bilong yupela. Man i litimapim nem bilong em yet, nem bilong en bai i go daun. Na man i daunim em yet, em bai i kisim biknem.”—Matyu 23:6-12.
2. “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting . . . Tasol yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting . . . Long ples ol gutpela samting bilong yu i stap long en, long dispela ples tasol laik bilong yu tu bai i stap.” (Matyu 6:19-21) “Mi gat tok long yupela ol manmeri i gat planti samting. Yupela i mas tingting long ol bikpela hevi i laik kamap long yupela, na yupela i mas krai na singaut nogut. Olgeta kago na bilas bilong yupela, ol i sting pinis. Na olgeta laplap samting bilong yupela, ol binatang i kaikai pinis. Gol wantaim silva bilong yupela, ol i ros pinis, na dispela ros bai i mekim ol sin bilong yupela i kamap ples klia, na em bai i kukim bodi bilong yupela olsem paia.”—Jems 5:1-3.
3. “Yupela i witnes bilong mi. Mi bin makim yupela bilong i stap wokman bilong mi. Olsem bai yupela inap save long mi na bilip long mi na bai yupela i save gut olsem mi wanpela tasol mi God tru.” (Aisaia 43:10) “Long Antiok ol disaipel i kisim nem Kristen namba wan taim.”—Aposel 11:26.
4. “Kolim nem bilong Bikpela [Jehova] na singaut long em na tok tenkyu long em. Tokaut long olgeta lain manmeri long ol bikpela wok em i bin mekim, na tokim ol long em i gat biknem. . . . Tokim olgeta lain manmeri.” (Aisaia 12:4, 5) “Papa bilong mipela, yu stap long heven, nem bilong yu i mas i stap holi.”—Matyu 6:9.
5. (a) “Taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu. Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:15, 16) (b) “Sapos mipela yet i autim gutnius long yupela o sapos wanpela ensel bilong heven i autim, na sapos dispela gutnius i no wankain olsem dispela gutnius bipo mipela i bin autim long yupela, orait man i mekim dispela pasin, em i ken lus.”—Galesia 1:8.
6. “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.”—KTH 11:15.
7. “ ‘Yupela i mas laikim God . . . long bel . . . na long spirit . . . na long tingting bilong yupela.’ Dispela lo em i bikpela, na em i namba wan tru. . . . ‘Yu mas laikim ol [arapela, NW] olsem yu laikim yu yet.’ Dispela tupela lo i as bilong olgeta tok bilong lo na bilong ol profet.” (Matyu 22:37-40) “Holi Spirit i save kirapim yumi long mekim ol gutpela pasin olsem, pasin bilong laikim tru ol arapela na . . . amamas na . . . stap bel isi na . . . i no belhat kwik na . . . helpim ol man na mekim gutpela pasin long ol na . . . wokabaut stret oltaim na . . . stap isi na . . . daunim laik bilong olpela bel. I no gat wanpela lo i tambuim ol dispela kain pasin.”—Galesia 5:22, 23.
8. “Jisas i bekim tok olsem, ‘Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.’ ”—Jon 18:36.
9. “Yupela i no ken kilim i dai ol arapela manmeri.” (Kisim Bek 20:13) “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. . . . Dispela bai i soim olgeta man olsem, yupela i disaipel bilong mi.”—Jon 13:34, 35.
10. “Yupela i witnes bilong mi. Mi bin makim yupela bilong i stap wokman bilong mi. Olsem bai yupela inap save long mi na bilip long mi na bai yupela i save gut olsem mi wanpela tasol mi God tru. . . . Yupela i witnes bilong mi. Mi wanpela tasol mi God.”—Aisaia 43:10, 12.