Pas Bilong Ol Man

Ol i Mekim Nogut Long Ol Pikinini Stori bilong yupela “Gutpela Samting Inap Painim Ol Pikinini Long Bihain?” (Janueri 8, 1995) em i tru na yupela i bin raitim gutpela tru. Taim mi kaunim stori bilong ol kain kain samting nogut na ol sik nogut na i stap bilong planti pikinini tu i nogut, em i mekim na mi sori tru. Tasol mi bin amamas tru long kaunim stori bilong ol gutpela samting inap painim ol pikinini, dispela bai kamap tru taim Kingdom bilong God i bosim ol man.

D. G., long Papua Niugini

Indai  Mi laik tokim yupela olsem mi bin amamas tru long kaunim dispela stori “Ol Yangpela i Laik Save . . . Bilong wanem Papa i Dai?” (Jun 8, 1995) Maski papamama bilong mi i stap yet, i no longtaim i go pinis na mi bin bel hevi tru taim tupela man mi laikim tru ol i dai. Dispela stori i bin mekim gut bel bilong mi na helpim mi long karim kain hevi olsem.

T. H., long Frans

Papa bilong mi i bin i dai long Haus Kingdom bihain long em i givim wanpela tok. Bihain long dispela mi bin kisim bikpela bel hevi na belhat. Mi ting i no stret long wanpela man em ol man i laikim em tumas na em i save givim bel long wok bilong Jehova em i dai wantu tasol. Taim mi kaunim ol dispela stori mi pilim olsem Jehova i putim han bilong helpim mi long karim hevi bilong mi.

S. A., long Naijiria

Papa bilong mi i bin i dai long sik kensa, na mi bin hatwok tru long karim dispela hevi. Mi kirap nogut long lukim olsem dispela stori i stret tru wantaim tingting bilong mi. Samting i givim hevi long mi, em olsem papa bilong mi i no stap bilong lukim olgeta samting mi mekim long nau. Mi kirap nau tasol long inapim wanpela mak mi bin tingting long winim: Wok bilong autim tok long olgeta de. Mi gat bikpela laik long em i lukim mi i mekim dispela wok. Sampela taim mi painim ol samting i hatwok tru long mi, long wanem, em i no stap bilong soim rot long mi na givim gutpela save long mi. Tasol taim mi tingim olsem i gat ol narapela i tingim mi, dispela i mekim gut bel bilong mi.

C. T., long Amerika

Toktok Long Lotu  Maski mi bin go bikpela long wanpela famili Kristen, mi save sem tru long givim bel olgeta long mekim wok autim tok long taim ol wanskul i stap. Ol gutpela tok yupela givim long stori “Ol Yangpela i Laik Save . . . Bilong Wanem Mi Mas Stori Long God?” (Ogas 8, 1995) i bin helpim mi long tingim gen bikpela as bilong wok bilong yumi. Bai mi tingim gut tok bilong yupela bilong strongim mi long kamap wanpela gutpela tisa long Tok Bilong God.

K. K., long Naijiria

Mi gat 12-pela krismas, na mi bin sem tru long tok olsem mi wanpela Witnes Bilong Jehova. Mi laik ol wanskul i no ken lukim mi taim mi autim tok. Dispela stori i bin helpim mi long save olsem, i no mi wanpela tasol i gat dispela hevi. Na em i bin helpim mi long winim dispela tingting kranki bilong mi long sem.

M. V. S., long Brasil

Kirapim Wok Bilong Ol Yet  Tenkyu tru long stori “Long Ol Kantri i No Gat Planti Wok Bisnis, Ol i Kirapim Ol Wok Bilong Ol Yet.” (Ogas 8, 1995) Long nau mi stap long skul na mi tingting long kamap wanpela painia (mekim wok autim tok long olgeta de) taim mi pinis long skul. Bikpela hevi em bilong painim wok. I kam inap long nau mi mi bin tingting long mekim wok long ofis samting bambai mi no ken taitim bun na hatwok tumas. Tasol mi sem taim mi kisim save olsem, ol brata Kristen bilong mi long ol hap i no gat planti wok bisnis ol i mekim kain kain wok maski em wanem kain wok. Maski mi mas mekim wanem kain wok bilong helpim mi long mekim wok painia, bai mi mekim.

Y. T., long Japan