Pilai Laki—Samting Ol Man Long Nau i Kalabus Long En
WANPELA kamera i kisim piksa. Dispela piksa i kamap long tupela pes olgeta bilong wanpela niuspepa bilong Sande, em piksa bilong wanpela traipela bakstua—ai bilong yu i no inap lukim kirap o pinis bilong en—bikpela bilong en inap sampela tausen skwea mita. Tasol em i no wanpela bakstua moa, nogat; nau em i wanpela haus bingo, na planti man—ol yangpela na ol lapun na ol man bilong kain kain skin—olgeta i stap na pilai laki. Yu lukim pes na ai bilong ol? Pes i makim olsem skin i les, na ai bilong ol i ret olgeta. Dispela i makim olsem ol i bin pilai pilai i go inap planti aua; no gat malolo liklik. Ol i tingting planti taim ol i wetim man i kolim ol namba, na nau long dispela nait ating ol i no ken lus moa, ol bai win.
Orait, opim narapela pes bilong niuspepa. Yu lukim pes bilong ol dispela man i holim kas? Ol i tingting planti—ol i pret long lus. Long planti pilai kas olsem, wanpela man inap winim o lusim planti tausen kina. Tasol yu no ken tingim piksa tasol, tingim samting i kamap tru. Yu lukim han bilong ol? Tuhat i kamap, long wanem, ol i no stap isi. Yu harim klok bilong ol? Klok i meknais hariap. Yu harim beten bilong ol? Ol i beten long bel na askim God long helpim ol long win na ol narapela i ken lus.
Orait, wokabaut i go insait long ol ples laki, em ol i stap insait long ol nambawan hotel na long ol nambawan bot i raun long wara. Ating bai yu kirap nogut long ol planti planti masin bilong pilai laki em ol i gat kala kala, a? Man! Taim ol man i pulim han bilong ol masin laki na ol wil bilong laki i tantanim, pairap i no liklik! Tasol maski ol man i win o lus, dispela kain pairap i olsem musik long yau bilong ol. Bos bilong wanpela haus laki i tok: ‘Ol i save amamas, long wanem, ol i tingim samting em inap kamap taim ol i pulim gen han bilong masin.’
Nau, wokabaut namel long ol planti planti man i sindaun klostu long ol tebol i gat wanpela kain wil bilong laki na em i save tantanim. Wil i gat ol retpela na blakpela kala na em i no save isi taim em i tantanim—em i pulim tru ai bilong yu. Na narapela samting bilong dispela wil i save pulim ai bilong yu, em wanpela liklik bal i kalap kalap. Orait, wil i tantanim i go i go na namba i kamap long en, em i makim man i win o em i lus. Sampela man i save lusim planti tausen kina long wanpela pilai tasol.
Orait, yumi ken bungim planti tausen kain piksa olsem i bin kamap long dispela niuspepa, na yumi ken tingim planti tausen kain samting yumi bin stori long en long ol haus laki. Na planti milion man i kam bilong pilai laki long planti tausen haus laki olsem. Ol i kam long balus, tren, bas, na sip. Ol i go long olgeta hap bilong graun bilong inapim bikpela laik bilong ol long pilai laki. Dispela pasin bilong pilai laki oltaim, ol man i save kolim olsem ‘wanpela sik i stap hait; wanpela samting ol man long nau i kalabus long en.’ Wanpela saveman bilong skelim pilai laki (Durand Jacobs) em i tok: ‘Mi bilip olsem, long taim bilong yumi, ol gavman bilong olgeta hap bai orait long kain kain pilai laki.’
Long 1993 long Amerika, planti man, olsem 92 milion, ol i bin go long ol haus laki, winim ol man i go lukim ol bikpela pilai beisbal. Na nau ol i wokim planti haus laki moa. Ol man bilong bosim ol hotel long hap bilong Is, ol i amamas tru. Ol i tok: ‘Ol hotel i no inap long ol 50,000 man i save kam long olgeta de bilong pilai laki.’
I no longtaim i go pinis na long ol provins bilong saut, ol man i ting pilai laki em i wanpela pasin nogut. Tasol long 1994, long planti provins bilong saut, ol man i amamas long en na ting em i wanpela samting bilong helpim ol. Wanpela nius (U.S.News & World Report) i tok: ‘Ating nau yumi mas senisim nem bilong saut na givim nupela nem long en. Yumi no ken tok moa olsem Hap Bilong Baibel, nogat; yumi mas tok Hap Bilong Kas. Nau long olgeta hap bilong Misisipi na Luisiana i gat ol haus laki. Ol i wokim sampela long ol bot i trip long wara, na ol i wokim sampela long graun. Na ol i pasim tok long wokim sampela haus laki moa long hap bilong Florida, Teksas, Alabama na Akansas.’ Long nau sampela bikman bilong lotu i senisim tru tingting bilong ol long pilai laki; nau ol i no ting em wanpela pasin nogut. Olsem: Long 1994, taim taun kaunsil bilong Nu Olins, Luisiana, i givim nem long namba wan haus laki ol i wokim long wanpela bot na em bai trip long wara Misisipi, wanpela pris i beten. Em i tok tenkyu long God long ‘ol i gat save long pilai laki, em wanpela gutpela samting God i givim long taun olsem blesing.’
Ol man i ting, taim yia 2000 i kirap, 95 pesen bilong ol man long Amerika i no ken stap longwe tumas long wanpela haus laki. Bai ol inap raun 3-pela o 4-pela aua tasol bilong kamap long wanpela haus laki. Wanpela nius i tok, gavman bilong Amerika i orait long ol retskin bilong Amerika i mekim bikpela wok bisnis long pilai laki. Long olgeta hap bilong Amerika ol i save bosim 225 haus laki na haus bingo. Long ol dispela haus bingo, ol man i save betim bikpela mani.—U.S.News & World Report.
Taim yumi tingim pilai kas, na betim mani long husat bai win long kikbal samting, na betim mani long hosres na dokres, na pilai bingo long haus lotu, na ol narapela samting bilong laki, na gavman i orait long en, yumi ken save bilong wanem long 1993 ol Amerika i bin tromoi 394 bilion kina long pilai laki. Em bikpela mani tru—17.1 pesen antap long ol mani ol i bin tromoi long 1992. Ol man i no save laikim pasin bilong pilai laki ol i tingting planti. Dairekta bilong wanpela lain (Council on Compulsive Gambling) em i tok: ‘Ol lotu na gavman i nambawan samting bilong helpim ol man, tasol nau ol tu i insait long wok bisnis bilong pilai laki.’ Wanpela nius bilong Amerika i tok, Amerika em wanpela “Kantri Bilong Pilai Laki,” na em i “pasin tru bilong ol Amerika long painim amamas.”
Kirap long 1826 i kam inap long nau, i no gat pasin bilong winmoni long Inglan, nau tasol ol i kirapim gen, na planti man i baim laki-tiket. Nius The New York Times i tok, nau long Inglan planti man i givim bel long pilai bingo. Nius i tok moa: ‘Nau long Mosko i gat planti planti haus laki na ol i mekim bikpela wok bisnis long en. Na ol man bilong pilai laki long Lebanon, ol i no pret long birua bai painim ol taim ol i go pilai long ol haus laki long hap bilong Wes Berut. Sampela man bilong ami na sampela bilong lotu ol i no laikim ol dispela haus laki, olsem na taim man i winim bikpela mani, ol sekyuriti bilong haus laki, em ol i karim masin-gan, ol i mas kisim em i go bek long haus bilong em.’
Wanpela man bilong Kanada i save was long pasin bilong pilai laki, em i tok: ‘Ol Kanada i no ting ol i man tru bilong pilai laki, tasol long sampela kain pilai laki, ol Kanada i winim ol Amerika.’ Nius The Globe and Mail i tok, ‘long 1994, ol Kanada i tromoi 10 bilion kina long betim mani long wanpela samting—dispela mani i winim klostu 30 taim mani ol i bin tromoi long go lukim ol piksa wokabaut. Na long Kanada ol i stretim moa yet dispela bikpela wok bisnis bilong bingo, na winmoni, na putim bet long hosres, winim tru Amerika long bipo na long nau.’
Wanpela nius bilong Saut Afrika i tok: ‘I no gat wanpela man i save hamas man tru long Saut Afrika i kalabus long pilai laki, tasol ol i ting em “sampela tausen.” ’ Tasol gavman bilong Spen i save long hevi bilong ol Spen long pilai laki, na nau planti man moa i wok long pilai. Spen i gat 38 milion manmeri, na gavman i tok, insait long wanpela yia tasol, planti bilong ol i bin tromoi nating 25 bilion kina long pilai laki. Olsem na Spen em i winim klostu olgeta narapela kantri i gat planti man tru i save pilai laki. Papa bilong wanpela lain bilong helpim ol man i save pilai laki, em i tok: ‘Long bipo na i kam inap long nau, olgeta taim ol Spen i save pilai laki. Ol i putim bet long hosres, betim mani long husat bai win long soka, baim laki-tiket, pilai long ol wil bilong laki, pilai kas, pilai bingo, na pilai long ol masin bilong laki, em ol masin i save pinisim tru mani bilong ol.’ Nau tasol Spen i bilip olsem, ol man i save pilai laki oltaim, ol i gat hevi long tingting bilong ol—ol i pilim olsem ol i mas pilai pilai i go, maski ol i lus.
Na ol samting i kamap long Itali i makim olsem ol man long dispela hap tu i givim bel long pilai laki. Ol i tromoi planti bilion kina long laki-tiket bilong winmoni, betim mani long husat bai win long kikbal samting, ol pilai bingo i save kamap long niuspepa, na pilai laki. Ripot bilong wanpela lain, em gavman i laik bai ol i skelim dispela samting, i tok: ‘Pilai laki i bosim olgeta samting ol man i mekim.’ Wanpela nius (The New York Times) i tok: ‘Bipo yumi ting planti man i no inap pilai laki olsem nau ol i mekim. Maski em man bilong gavman o em wanpela pris, olgeta i resis long kisim winmani long rot bilong pilai laki.’
Tru tumas! Planti taim, pilai laki i save bosim olgeta samting long i stap bilong ol man, na stori i kamap bihain long dispela bai kamapim klia dispela samting.
[Rait long pes 4]
Bipo em wanpela pasin nogut—nau em samting bilong helpim ol
[Rait long pes 5]
Pilai laki i kamap bikpela long olgeta hap