Mipela i Pas Gut Wantaim
TRESI em wanpela blakpela dok labrado i gat 10-pela krismas na em dok bilong was long mi. Mi amamas long Tresi, long wanem, em i helpim mi long mekim planti samting. Tresi i stap, olsem na mi no stap wanpis na em i save mekim gut bel bilong mi. Olsem na mi save laikim em tru na mipela i pas gut wantaim.
Sampela taim, ol man i save popaia long sampela samting ol i no bin tingting long mekim, tasol Tresi i no inap popaia olsem. Wanpela taim mi lusim Tresi long haus na mi go wokabaut wantaim wanpela pren. Mipela amamas long toktok i go na wantu mi pundaun long graun. Pren bilong mi i lusim tingting olsem mi aipas, na em i no bin tokim mi i gat liklik baret i stap arere long rot. Dispela samting i no ken painim mi sapos Tresi i bin stap wantaim mi.
Wanpela taim Tresi i bin helpim mi na mi no bagarap. Wanpela taim mi wokabaut long rot na wantu tasol wanpela trak i sut nabaut nabaut long rot na ran i kam long mi. Mi harim krai bilong ensin bilong trak, tasol mi no save trak i ran i kam long mi. Tresi i lukim dispela samting na em i save bagarap inap painim mi; kwiktaim em i bringim mi i go long narapela hap.
Mi Aipas, Tasol i Olsem Mi Lukluk
Mama i karim mi long hap saut bilong Swiden long 1944, na kirap long dispela taim mi aipas. Ol i salim mi i go long wanpela skul bilong ol pikinini i aipas, em wanpela skul ol pikinini i save slip long en. Long skul ol i lainim mi long kaunim na raitim Brel (rait bilong ol aipas). Musik i bin kamap olsem bikpela samting long i stap bilong mi, na mi laik tru long paitim piano. Taim mi pinis long haiskul mi go long Yunivesiti Bilong Guteborg bilong stadi yet long sampela tok ples na musik.
Tasol i stap bilong mi i senis olgeta taim tupela Witnes Bilong Jehova i kam long ples slip bilong mi long yunivesiti. Kwiktaim mi kirap na go long ol miting bilong ol Witnes na autim tok long ol narapela long ol samting mi lain long en. Long 1977 mi kisim baptais bilong makim olsem mi dediket long God Jehova. Maski mi aipas, long rot bilong Baibel-stadi mi kisim samting i nambawan tru—ai bilong mi i op long ol samting bilong spirit.
Long nau mi ting i stap bilong mi i winim i stap bilong ol man em ai bilong ol i op, tasol long spirit ol i aipas. (Skelim wantaim Jon 9:39-41.) Mi amamas olsem long tingting bilong mi, mi inap lukim klia tru nupela taim God bai kamapim, na olsem em i tok promis, long dispela taim ai bilong ol aipas bai op, olgeta sik bai pinis, na ol daiman bai kirap bek!—Song 146:8; Aisaia 35:5, 6; Aposel 24:15.
Mi singel na mi aipas, tasol Tresi i gutpela poroman i stap gut long mi, olsem na mi no gat planti hevi. Mi laik stori long olsem wanem Tresi i helpim mi na mi inap wok mani na autim tok olsem wanpela Witnes Bilong Jehova. (Matyu 24:14; Aposel 20:20; Hibru 10:25) Tasol pastaim, yu mas save liklik moa long Tresi.
Makim Em Bilong Mekim Wok
Taim Tresi i gat 8-pela mun tasol, ol i bin traim em inap long ol i ken save, em inap kamap wanpela dok bilong was long aipas o nogat. Tresi i dok bilong stap isi, na ol i no hatwok long skulim em, na taim ol bikpela pairap i kamap wantu tasol, em i no pret tumas. Olsem na ol i putim Tresi wantaim wanpela famili bambai em i ken save long sindaun bilong famili. Bihain, taim em i bikpela liklik, ol i bin salim em i go long wanpela skul bilong ol dok bilong was long aipas.
Long dispela skul Tresi i bin lain long ol samting wanpela dok bilong was i mas mekim, olsem helpim aipas long painim dua, lata, dua bilong banis, na rot. Em i lain tu long wokabaut long ol rot i gat planti man i wokabaut i go i kam long en, na em i lain long brukim ol rot. Na ol i lainim em long sanap long ol liklik baret arere long rot, long bihainim ol trafik-lait, na long abrusim ol samting nogut. Em i lain inap 5-pela mun na bihain em i redi long mekim wok. Em nau, ol i bringim Tresi i kam long mi.
Samting Tresi i Save Mekim Bilong Helpim Mi
Long olgeta moningtaim Tresi i save rausim mi long bet inap long mi ken givim kaikai long em. Bihain, mipela save redi long go long wok. Mipela mas wokabaut inap 20 minit bilong kamap long ofis bilong mi. Mi save long rot, tasol wok bilong Tresi em long helpim mi long abrusim ol ka, ol manmeri, ol lait-pos, na ol narapela samting na kamap gut long ofis. Taim mipela kamap long ofis, em i sindaun aninit long tebol bilong mi. Long belo, mitupela i save raun.
Long apinun taim mipela kam bek long haus, nau gutpela samting i kamap. Tresi i save soim rot long mi na mipela i go long haus bilong ol man na autim tok, na long haus bilong ol man mi save mekim Baibel-stadi wantaim ol. Planti manmeri i amamas long Tresi, ol i paitim isi skin bilong em o holim em, na sampela taim ol i givim liklik kaikai long mi bilong givim long em. Na mipela i save go long ol miting Kristen long olgeta wik. Bihain long ol miting ol pikinini i amamas long tok gude long Tresi na holim em, na Tresi i save amamas long dispela.
Mi save Tresi em i wanpela dok tasol na em bai dai, olsem na bihain mi mas kisim narapela dok bilong was long mi. Tasol long nau, mipela i wok gut wantaim na narapela i save helpim narapela. Taim Tresi i no stap klostu long mi, bel bilong mi i no stap isi, na Tresi tu, em i no stap bel isi taim em i no inap soim rot long mi.
Mas Kisim Save
Ating yu kirap nogut long save, sampela taim ol man i traim long brukim mipela. Ol i ting Tresi em i dok nating o wanpela dok mi save lukautim—em tasol; ol i no save mipela i pas gut wantaim. Ol dispela man i mas save, Tresi em i bikpela samting long mi olsem wilsia i bikpela samting long man i no inap wokabaut. Taim ol i brukim mipela, i olsem ol i tekewe ai bilong mi.
Sapos ol man i kisim save long i stap bilong mi na Tresi olsem mipela i pas gut wantaim, i no gat planti hevi bai kamap. Ol man i no tingim tumas wilsia, tasol sori tru, i no olsem long dok bilong was. Sampela man i pret long dok, o ol i no save laikim dok.
Wanpela lain (Swedish Association for the Visually Handicapped) i bin wokim wanpela liklik buk i stori long ol dok bilong was na sampela gutpela tok bilong buk i olsem: “Dok bilong was i wanpela samting bilong helpim aipas long wokabaut. Na i no dispela tasol. Em i wanpela helpim i stap laip. . . . Em i wanpela pren i no inap tru long lusim yu.”
Tru tumas, Tresi i olsem ai bilong mi long tudak, na em i save helpim mi long nau long mekim planti samting. Tasol mi bilip olsem, klostu nau long nupela taim God i bin tok promis long en, mi bai lukim ol gutpela samting God i bin wokim. Olsem na long nau, mi tingting strong long lukautim i stap bilong mi long ol samting bilong spirit.
Het bilong Tresi i slip long lek bilong mi na nau mipela i redi long harim kaset i kamapim ol tok bilong nupela Wastaua.—Em stori bilong Anne-Marie Evaldsson.