Via Ignasia—Wanpela Bikrot i Helpim Wok

WANPELA MAN LONG GRIK I RAITIM DISPELA STORI BILONG KIRAP!

LONG yia 50 C.E., em namba wan taim wanpela liklik lain misineri Kristen ol i kamap long Yurop. Ol i kam, long wanem, long samting olsem driman aposel Pol i harim wanpela singaut olsem: “Yu mas brukim solwara na yu kam long Masedonia na helpim mipela.” (Aposel 16:⁠9) Tok bilong Krais Jisas em aposel Pol wantaim ol poroman bilong em ol i bin autim long Yurop, em i kamapim bikpela samting.

Wanpela bikpela samting i bin helpim wok Kristen long kamap long Masedonia, em wanpela bikrot ol Rom i wokim long ston na ol i bin kolim Via Ignasia. Ol misineri i sua long Neapolis wanpela taun i stap long nambis (long nau em Kavala, Grik) long hap not bilong solwara Ijien. Ol misineri i bin wokabaut long dispela bikrot bilong kamap long Filipai, em nambawan biktaun bilong distrik Masedonia. Bihain Pol wantaim ol poroman bilong em, ol i bihainim dispela bikrot na ol i go kamap long Amfipolis na Apolonia na Tesalonaika.​—⁠Aposel 16:​11–17:⁠1.

Sampela hap bilong dispela bikrot bilong bipo i stap yet na ol man i save wokabaut long en long olgeta de. Nau ol man i tingting long wokim wanpela nupela bikrot i bihainim dispela bikrot bilong bipo na ol bai givim wankain nem long en.

Husat i wokim dispela bikrot bilong bipo? Ol i wokim long wanem taim na bilong wanem ol i wokim?

As na Ol i Wokim

Gavman Rom i wok long daunim ol kantri i go inap long hap bilong is, olsem na Masedonia i kamap wanpela provins bilong Rom long yia 146 B.C.E. Tasol dispela pasin bilong Gavman Rom i mekim na nau ol i gat laik long kisim nupela samting​—⁠em wanpela samting ol inap mekim wok long en bilong salim kwik ami bilong ol long ol nupela kantri ol i bosim. Via Apia o Rot Apia long Itali i lusim Rom na i go inap long solwara Edriatik long hap bilong saut-is. Tasol nau Gavman Rom i mas i gat narapela rot long hap bilong Bolkan na i wankain long Rot Apia. Em nau, ol i tingting long wokim Via Ignasia. Dispela bikrot i kisim nem bilong nambawan ensinia i bosim wok, em bikman Naius Ignasius.

Orait, Via Ignasia i kirap long nambis bilong taun Drekium long provins Ilirikum (long nau em Dures, Albenia), na i go longwe inap 800 kilomita na kamap long wanpela biktaun bilong bipo, em Bisantiam (long nau em Istanbul, Turki). Ol i kirap wokim dispela bikrot long yia 145 B.C.E. na ol i wok 44 yia bilong pinisim. Olsem ol Rom i bin ting, Via Ignasia i kamap wanpela gutpela samting ol inap mekim wok long en bilong kisim ol narapela kantri long hap bilong Is.

Em Ples Nogut Bilong Wokim Rot

Tasol em ples maunten na ples nogut, olsem na em bikpela wok tru long wokim dispela bikrot. Namba wan hap bilong rot i bungim raunwara Okrid na i go moa klostu long arere bilong raunwara long hap not bilong en. Nau bikrot i save baut baut namel long ol maunten, na i go moa long ol ples nogut long hap is na long sampela hap i gat ol maunten i no gat diwai, na i go moa long ol ples daun i gat planti raunwara, na bihain bikrot i kamap long ples stret insait long Masedonia.

Klostu long biktaun Tesalonaika, bikrot i kamap long wanpela ples stret. Tasol long hap is bilong biktaun i gat ol maunten. Orait, Via Ignasia i baut baut namel long ol dispela maunten na bihain em i go daun long ples i gat ol raunwara i gat tais. Orait rot i go moa na i baut baut long ol ples daun na ples tais na i go i go inap long wanpela taun bilong bipo, em Neapolis.

Orait, kirap long dispela taun bikrot i bihainim nambis bilong solwara Ijien long hap bilong is na i go moa inap long provins Treis. Bihain em i go moa long ples stret inap long pinis bilong en long Bisantiam.

Mekim Wok Tru Bilong En

Via Ignasia i kamap wanpela gutpela rot bilong helpim ol man long lusim Rom na i go stret long ol kantri Rom i bosim long hap is bilong solwara Edriatik. Bikrot i mekim na i no hatwok long ol lain i stap long ami ol i sindaun long ol taun bilong Masedonia na Rom i bosim ol. Na bikrot i bin helpim tru wok bisnis bilong dispela hap, na ol samting ol i bin mekim long graun, na sindaun bilong ol tu. Dispela bikrot i mekim na ol man i no hatwok long karim bras, kolta, silva, pis, wel, wain, sis, na sampela samting moa bilong wok bisnis long en.

Ol man long sampela taun klostu long dispela bikrot olsem Tesalonaika na Amfipolis, ol i kisim gutpela sindaun tru long ol dispela kain wok bisnis, na ol dispela taun i kamap ol nambawan taun long hap bilong Bolkan. Tesalonaika i kamap wanpela biktaun tru i gat planti mani na bisnis long en, na ol i bin mekim planti kain kain samting olsem ol pilai na wokim piksa na ol kain kain wok bilong kamapim pasin bilong ples. Tru, ol lain i sindaun klostu long dispela bikrot ol i mas lusim mani bilong lukautim rot, tasol ol i kisim planti samting, long wanem, ol inap wok bisnis wantaim ol narapela kantri.

Rot i Helpim Wok Kristen

Tasol Via Ignasia i helpim ol lain i sindaun klostu long en long kisim wanpela samting i winim tru mani kago. Yumi ken tingim wanpela bisnismeri i gat gutpela sindaun, em Lidia. Lidia i bin stap long Filipai​—⁠em namba wan biktaun long Yurop ol man i bin harim Pol i autim gutnius long en. Long yia 50 C.E., Pol wantaim ol poroman bilong em ol i kam sua long Neapolis na bihain ol i wokabaut longwe inap 16 kilomita long Via Ignasia bilong kamap long Filipai long hap bilong not-wes.

Luk i tok: “Long de Sabat mipela i go ausait long dua bilong banis bilong taun, na mipela i go long wanpela wara. Mipela i ting klostu long dispela wara i gat ples bilong mekim prea. Na long dispela wara mipela i lukim sampela meri ol i bung i stap, na mipela i sindaun toktok wantaim ol.” Wanpela meri i bin harim tok bilong Pol em Lidia. Long dispela de stret, em na ol wanhaus bilong em ol i kamap Kristen.​—⁠Aposel 16:​13, 14.

Pol wantaim ol poroman bilong em, ol i lusim Filipai na ol i bihainim Via Ignasia na ol i kamap long Amfipolis na Apolonia na bihain ol i kamap long Tesalonaika; ol i wokabaut longwe inap 120 kilomita. (Aposel 17:⁠1) Bilong autim gutnius long Tesalonaika, Pol i go long haus lotu bilong ol Juda long de Sabat. Olsem na sampela Juda wantaim bikpela lain bilong ol Grik ol i bilip.​—⁠Aposel 17:​2-4.

Na long nau tu, ol Witnes Bilong Jehova long Albenia na Grik, ol i save mekim wok long sampela hap bilong dispela bikrot inap long ol i ken painim ol manmeri i sindaun long ol dispela hap. Wok bilong ol em long autim gutnius long Kingdom bilong God olsem aposel Pol wantaim ol poroman misineri bilong em ol i bin mekim bipo. (Matyu 28:​19, 20; Aposel 1:⁠8) Tru tumas, Via Ignasia i wanpela bikrot bilong ol Rom i bin helpim tru wok bilong God long i go bikpela long taim bilong ol aposel i kam inap long nau!

[Ol Mep long pes 20, 21]

(Bilong save ol dispela rait i stap we long pes, lukim buk o magasin)

BRITEN

YUROP

AFRIKA

BOLKAN PENINSULA

MASEDONIA

GRIK

Drekium, Ilirikum (Dures, Albenia)

Tesalonaika

Apolonia

Amfipolis

Filipai

Neapolis (Kavala)

Bisantiam (Istanbul)

SOLWARA BLAKSI

SOLWARA BILONG MARMARA

TREIS

SOLWARA IJIEN

Troas

TURKI

[Kredit Lain long pes 20]

Mountain High Maps® Copyright © 1995 Digital Wisdom, Inc.

[Piksa long pes 20]

Rot i go long Neopolis

[Piksa long pes 21]

Rot i go long Filipai