Pas Bilong Ol Man

Gutpela Pren i Go Long Nupela Ples  Mi laik tok tenkyu tru long dispela stori “Ol Yangpela i Laik Save . . . Bilong Wanem Gutpela Pren i Go Long Nupela Ples?” (Janueri 8, 1997) Em i kamap long taim stret. Klostu nau bai wanpela pren bilong mi i go long nupela ples; em na man bilong em bai go mekim wok long wanpela kongrigesen i sot long ol man bilong autim tok. Maski mi amamas tru long em i go, mi save olsem mi bai sori tru, long wanem, mi no inap lukim em moa. Tenkyu long gutpela tok bilong yupela.

R. A., long Itali

Dispela stori i kirapim tru bel bilong mi taim wasman sekit bilong mipela, em wasman bilong raun, i lusim mipela bilong i go long nupela hap. Em i bin lukautim mi tru long ol samting bilong spirit na bilong bel. Olsem piksa insait long stori i soim, em bikpela hevi tru taim mi mas tok gutbai. Ol gutpela tok bilong yupela i kamap long taim stret na i helpim mi long karim hevi bilong i stap wanpis.

J. D., long Naijiria

Meri i Mas Daun Long Man Bilong Em  Mi tok tenkyu tru long dispela stori “Baibel i Tok Wanem? Meri i Mas Daun Olsem Wanem Long Man Bilong Em?” (Disemba 8, 1996) Man bilong mi i no stap long tok i tru, na sampela taim i hatwok tru long stap aninit long em. Mi laik soim ol gutpela gutpela pasin long em bambai mi inap helpim em long kam insait long tok i tru. (1 Pita 3:⁠1) Tasol mi laik stap strong long wok bilong mi long Jehova. Stori bilong yupela i strongim mi, na mi amamas long save olsem God i lukautim mi.

M. S., long Amerika

Mi laikim tru dispela stori. Nau ol hevi Satan i kamapim i go bikpela, olsem na yumi mas i gat dispela kain tok bilong strongim yumi long bilip. Mi amamas long stori bilong Abigel long Baibel, na long gutpela tok olsem meri i mas kamapim gutpela tingting na em i no ken pilim olsem em i gat asua sapos em i kirap na mekim wanpela samting.

D. M., long Amerika

Ol Pilai Bilong Kompyuta  Mi gat 15 krismas, na mi laik tok tenkyu long yupela long stori “Ol Yangpela i Laik Save . . . I Stret Mi Mekim Ol Pilai Bilong Kompyuta o Video?” (Septemba 8, 1996) Em i kamapim klia ol samting nogut bilong ol dispela pilai, na dispela bai helpim ol Kristen long skelim ol gutpela samting na ol samting nogut long pasin bilong mekim wok long ol.

F. R., long Indonisia

Mi gat 17 krismas, na mi bin laikim ol pilai bilong pait na kilim man i dai long kompyuta. Mi ting dispela i no inap bagarapim mi, tasol mi kalabus tru long dispela pilai, na mi kalabus moa yet long ol pilai pait na kilim man i dai, em ol dispela kain pilai yupela i kolim. Nau mi bagarapim olgeta disk bilong kompyuta bilong mi ol i gat ol samting bilong pait na kilim man i dai long en. Wanem gutpela samting i kamap? Mi pilim gutpela tru, na mi gat planti taim bilong stadi, lain, na toktok long ol man long God Jehova.

S. A., long Grik

Rausim Man  Mi amamas long stori “Baibel i Tok Wanem? Pasin Bilong Rausim Man Em Samting Bilong Helpim Man?” (Septemba 8, 1996) Mi yet mi bin raus long 1987 na dispela i lainim mi pinis, olsem na kongrigesen i kisim bek mi long 1988. Dispela gutpela pasin i helpim mi long senisim sampela pasin bilong mi na mi lusim ol poroman nogut. Em gutpela samting tru long yumi gat wanpela oganaisesen i bihainim ol lo bilong Baibel!

R. R., long Amerika

Kongrigesen i bin rausim mi tu. Long dispela taim mi pilim olsem dispela pasin i no stret na em i pasin nogut tru bilong mekim long wanpela man. Tasol mi popaia! Paslain long ol i rausim mi, ol elda bilong kongrigesen i wok strong long helpim mi long senisim pasin bilong mi na tanim bel. Tasol mi no amamas long samting ol i mekim bilong helpim mi long dispela taim. Taim ol i rausim mi dispela i lainim mi long pasin daun. Dispela i kirapim mi long save olsem, pasin pren bilong yumi wantaim Jehova em i bikpela samting.

B. T., long Amerika