Baibel i Tok Wanem?

Olsem Wanem Yu Inap Pret Long Wanpela God i Gat Pasin Sori?

“MAN I SAVE PRET LONG BIKPELA . . . DISPELA MAN I KEN AMAMAS.”​—⁠Song 112:⁠1.

SAPOS “God yet em i as bilong pasin bilong laikim tru ol arapela” olsem Baibel i tok, bilong wanem yumi mas pret long em? (1 Jon 4:16) Ol man i save ting, pasin sori na pasin bilong pret i pait wantaim. Olsem na pasin bilong pret inap mekim wanem long pasin bilong yumi long pas gut wantaim God? Bilong wanem yumi mas pret long wanpela God i gat pasin sori? Taim yumi skelim olsem wanem Baibel i save mekim wok long dispela tok “pret,” dispela bai helpim yumi long kisim gutpela save long dispela samting.

Long klostu olgeta tok ples yumi lukim dispela pasin: Wanpela tok i gat narapela narapela insait bilong en. Olsem: Long sampela tok ples yu ken tok: “Mi laikim tru aiskrim” na tu yu ken tok, “Mi laikim tru ol pikinini bilong mi.” Tasol pasin bilong laikim dispela tupela samting i narapela narapela. Olsem tasol, Baibel i tok long narapela narapela kain pasin bilong pret. Taim em i tok man i mas pret na lotu long God, em i no tok long man i mas pret nogut tru o tingting planti long strafe em bai kisim. Nogat. Pasin bilong pret long God i kamapim ol gutpela tingting​—⁠olsem yumi pilim tru gutpela pasin bilong God, na yumi daun long em. Ol dispela gutpela tingting i bung wantaim pasin bilong laikim tru God, ol i no kirapim yumi long ranawe o hait long God.

Pasin bilong pret long God i rausim pasin bilong pret nogut tru. Man bilong raitim Song i stori long man i pret long God olsem: “Sapos em i harim nius bilong ol hevi i kamap, em i no save pret. Em i save bilip strong long Bikpela.” (Song 112:⁠7) Maski ol man nogut o Satan yet i laik bagarapim yumi, bai yumi daun yet long Jehova. (Luk 12:​4, 5) Na tu, yumi no ken pret long go klostu long God long rot bilong beten. Nogat. Sapos yumi laikim tru God, dispela bai “rausim pasin bilong pret.”​—⁠1 Jon 4:⁠18.

Ples Antap na Bikpela Namba Bilong God

King Devit bilong bipo em i man bilong pret long God. Taim em i tingim ol gutpela gutpela samting God i bin wokim na ol samting i narakain, em i tok: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.” (Song 139:14) Long nait em i lukluk long skai na em i tok: “Skai i soim yumi olsem God i nambawan tru.” (Song 19:⁠1) Olsem wanem? Yu ting dispela i kirapim Devit na em i pret nogut tru? Nogat tru. Dispela i kirapim em long mekim singsing bilong litimapim nem bilong Jehova.

Long nau ol man i kisim bikpela save moa long ol samting i stap antap na dispela i mekim na yumi kirap nogut moa yet long en. I no longtaim na ol saveman bilong glasim ol sta samting ol i bin mekim wok long wanpela masin bilong lukluk longwe (Hubble Space Telescope) bilong skelim gut ol samting i stap antap. Bipo ol man i no bin lukluk longwe olsem. Taim ol i bin makim wanpela hap bilong antap long wanpela kompas bilong lukluk longwe i stap hia long graun ol i lukim olsem i no gat wanpela samting long dispela hap. Bihain ol i makim dispela hap long masin Hubble Space Telescope na ol i glasim wanpela liklik hap tru bilong dispela hap. Piksa ol i kisim long en i no pulap long ol wan wan sta tasol, nogat, em i pulap long ol bikpela bikpela lain sta i gat planti bilion sta i stap insait long en​—⁠bipo ol man i no bin lukim kain samting olsem!

Taim yumi skelim ol samting bilong antap, olsem ol bikpela bikpela sta i pulap tru na i narakain, yumi kirap nogut long en. Tasol ol dispela narakain samting i kamapim liklik hap tasol bilong namba na strong bilong Man bilong wokim olgeta samting. Baibel i tok, God Jehova em i “Papa i bin mekim kamap olgeta lait bilong skai” na “em i makim pinis namba bilong ol sta, na em i save kolim nem bilong ol sta wan wan.”​—⁠Jems 1:17; Song 147:⁠4.

Ol samting i kamap long ples antap em i save helpim yumi long save olsem ples antap i bikpela moa moa yet. Taim ol i mekim wok long masin Hubble Space Telescope ol i kisim piksa long ol lain sta na ol i lukim olsem lait i bin lusim ol dispela lain sta em i raun pinis long ples antap inap planti bilion yia! Yumi ol man i no bin stap longpela taim na yumi liklik samting tasol, olsem na taim yumi skelim yumi yet wantaim bikpela skai i bin stap longpela taim tru, yumi kirap nogut na yumi laik daun long Man i bin wokim ol sta, a? (Aisaia 40:​22, 26) Taim yumi kisim save olsem, dispela God i bin wokim olgeta samting em i save ‘tingting long mipela na was gut long mipela,’ dispela i kirapim yumi long givim biknem long Man bilong wokim yumi, na yumi laik save long em na amamasim em. (Song 8:​3, 4) Baibel i tok, dispela kain pasin bilong daun tru na pilim tru pasin bilong God i makim olsem man i pret long God.

God Bilong Lusim Rong

Yumi olgeta i gat sin. Maski yumi laik mekim pasin i stret, yumi save popaia. Olsem wanem? Taim yumi popaia, yumi save pret na ting God i no laikim yumi moa? Man bilong raitim Song i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela, olsem na mipela i mas pret long yu.” (Song 130:​3, 4) Man bilong wokim yumi, em i save mekim gut long yumi na lusim rong bilong yumi, na dispela i kirapim ol man i lotu long em long pilim tru pasin bilong em na daun long em.​—⁠Aisaia 54:​5-8.

Pasin bilong pret long God i kirapim yumi long mekim gutpela pasin, na abrusim pasin God i no laikim. Yumi pas gut wantaim Papa bilong yumi i stap long heven, kain olsem wanpela gutpela papa long graun i save pas gut wantaim ol pikinini bilong em. Sampela taim ol pikinini i no tingim gut, i gat wanem as na papa i tambuim ol long pilai long rot. Tasol taim ol i laik raunim bal i go long rot, ol i tingim tok bilong papa na ol i no go long rot​—⁠dispela inap mekim na ol i no kisim bagarap na i dai. Olsem tasol, taim man i pret long Jehova, dispela inap kirapim em long abrusim ol pasin em inap bagarapim laip bilong em yet na bilong ol narapela man.​—⁠Sindaun 14:⁠27.

Pret Long Kot Bilong God

Tasol man em maus bilong bel bilong em i no tokim em long abrusim ol pasin God i no laikim, em i mas pret long God long narapela kain rot. Olsem ol gavman bilong graun i givim strafe long ol man nogut, i stret God i givim strafe long ol man i mekim pasin nogut long laik bilong ol, na ol i no tanim bel. God i larim pasin nogut i stap inap liklik taim, olsem na sampela man ol i strong long mekim pasin nogut. Tasol Baibel i kamapim klia, klostu nau em bai rausim olgeta samting nogut long dispela graun. (Song 37:​9, 10; Saveman 8:11; 1 Timoti 5:24) I gat as na ol man nogut i no tanim bel ol i mas pret long strafe God bai givim long ol. Tasol Baibel i no kirapim yumi long pilim dispela kain pasin bilong pret.

Taim Baibel i stori long pasin bilong pret long Jehova, em i stori long ol gutpela samting​—⁠olsem singsing, amamas, bilip, gutpela tingting, stap laip longpela taim, gutpela sindaun, tingim gutpela samting yumi bai kisim bihain, bel isi, na sampela samting moa.a Sapos oltaim yumi pret long Jehova, bai yumi amamas long ol dispela blesing inap oltaim oltaim.​—⁠Lo 10:​12-14.

[Futnot]

[Piksa Kredit Lain long pes 26]

Kisim long Anglo-Australian Observatory, poto bilong David Malin