Bilong Wanem Yumi Mas Stadi Long Baibel?
BILL em i yangpela man i gat bikpela strong na em i gat save na em i gat mani inap long lukautim em. Tasol maski em i gat ol dispela samting, em i no i stap amamas. Em i bel hevi tru, long wanem, i stap bilong em i no gat as bilong en. Em i laik save i gat wanem as bilong i stap bilong em, olsem na em i skelim ol narapela narapela lotu, tasol em i no kisim samting em i wok long painim. Long 1991, em i bungim wanpela Witnes Bilong Jehova na dispela Witnes i lusim wanpela buk long em i stori long ol tok Baibel i kamapim long as bilong i stap bilong ol man. Em i stretim rot long mekim Baibel-stadi wantaim Bill na bai Bill inap kisim save long dispela samting na ol narapela samting tu.
Bill i tok: “Mipela i mekim namba wan stadi na planti taim mipela i skelim ol tok bilong Baibel, olsem na mi save olsem em dispela samting tasol mi wok long painim. Mi amamas tru long ol bekim i stap long Baibel. Bihain long dispela stadi, mi draiv i go antap long ples maunten na mi kam ausait long ka bilong mi na mi krai strong, long wanem, mi kisim bikpela amamas tru. Mi amamas tru olsem nau mi wok long kisim save long ol bekim bilong ol askim bilong mi.”
Tru, i no olgeta man i painim tok i tru bilong Baibel ol i save krai bilong kamapim amamas bilong ol. Tasol planti man i save amamas tru taim ol i kisim save long bekim bilong ol bikpela askim long i stap bilong man. Ol i save kisim wankain amamas olsem dispela man long tok piksa bilong Jisas em i bin painim wanpela bokis mani ol i bin haitim long wanpela gaden. Jisas i tok: “Em i amamas tru, na em i go salim olgeta samting bilong en na i go baim dispela gaden.”—Matyu 13:44.
Rot Bilong Mekim i Stap Bilong Yu i Gat As Bilong En
Bill i bin tingim tingim wanpela bikpela askim, Yumi stap bilong mekim wanem? Inap planti tausen yia, ol saveman na ol tisa bilong lotu na ol saientis i bin wok strong tru long painim bekim bilong dispela askim. Ol man i bin raitim planti buk bilong bekim dispela askim. Tasol hatwok bilong ol i lus nating na planti man i tok olsem i no gat rot bilong bekim dispela askim. Tasol i gat bekim i stap. Maski em i wanpela bikpela tok, em i no paul nabaut. Baibel i kamapim klia dispela bekim. Rot bilong i stap amamas na mekim i stap bilong yu i gat as bilong en i olsem: Yumi mas pas gut wantaim Jehova, em Man bilong wokim yumi na Papa bilong yumi long heven. Olsem wanem yumi inap pas gut wantaim em?
I gat tupela samting i narapela narapela kain bilong helpim yumi long i go klostu long God. Ol man i go klostu long God ol i mas pret long em na laikim em. Yumi ken skelim tupela skripsa i strongim dispela tok. Bipo tru, gutpela King Solomon i bin skelim gut i stap bilong ol man na em i raitim ol save em i kisim long Buk Saveman long Baibel. Em i stori long ol save em i kisim na em i tok: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em.” (Saveman 12:13) Planti handet yia bihain taim ol i askim Jisas long wanem lo insait long lo God i givim long Moses i winim olgeta narapela lo, Jisas i bekim tok olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Olsem wanem? Yu ting em i narapela kain samting long yumi mas pret long God na laikim em? Yumi ken skelim olsem wanem em i bikpela samting long yumi mas i gat pasin bilong pret na laikim narapela na olsem wanem dispela tupela pasin bai helpim yumi long pas gut wantaim God.
Pasin Bilong Pret Long God i Makim Wanem Samting?
Sapos yumi laik lotuim God long pasin em i laikim, orait em i bikpela samting long yumi mas i gat pasin bilong pret na i stap aninit long em. Baibel i tok: “Sapos man i laik kamap saveman em i mas pret long Bikpela.” (Song 111:10) Aposel Pol i tok: “Na yumi mas lotu long em long pasin em yet i laikim. Na yumi mas litimapim nem bilong em na pret long em na aninit long em.” (Hibru 12:28) Na tu, wanpela ensel i flai i go namel long skai na i autim gutnius em aposel Jon i bin lukim long piksa olsem driman, em i tok: “Yupela i mas pret long [God] na litimapim nem bilong em.”—Kamapim Tok Hait 14:6, 7.
Dispela pasin bilong pret long God em i bikpela samting tru bilong mekim i stap bilong yumi i gat as bilong en. Tasol dispela pasin bilong pret long God i no wankain olsem pasin bilong pret nogut tru olsem pret long wanpela man nogut, nogat. Ating yumi bai pret sapos wanpela raskol i laik bagarapim yumi. Tasol pasin bilong pret long God i makim olsem yumi tingim bikpela strong bilong em na yumi daun olgeta long em olsem Man bilong wokim olgeta samting. Na tu, em i makim olsem yumi gat gutpela pasin bilong pret long mekim ol samting God i no inap amamas long en, long wanem, em i Nambawan Jas na God i Gat Olgeta Strong na em inap tru long givim strafe long ol man i sakim tok bilong em.
Pret na Pasin Bilong Laikim Narapela i Wok Wantaim
Tasol Jehova i no laik bai ol man i pret long em na long dispela as tasol ol i mekim wok bilong em. Jehova em i God bilong pasin bilong laikim ol narapela. Aposel Jon i tok: “God yet em i as bilong dispela pasin bilong laikim ol arapela.” (1 Jon 4:8) God Jehova i laikim tru ol man na em i bin mekim gut tru long ol, na em i laik bai ol man tu i mas laikim em. Tasol olsem wanem na dispela kain pasin bilong laikim ol narapela i stret wantaim pasin bilong pret long God? Sampela samting bilong dispela tupela pasin i wankain. Man bilong raitim Song i tok: “God em i pren tru bilong ol manmeri i save stap aninit long em.”—Song 25:14.
Tingim pasin bilong pikinini long daun na pret long papa em i strongpela man na em i gat gutpela tingting. Papa i laikim pikinini, olsem na pikinini tu bai laikim papa bilong em. Pikinini bai bilip long papa na em bai askim papa long skulim em, long wanem, em i bilip tru olsem ol tok bilong papa bai helpim em. Olsem tasol, sapos yumi laikim Jehova na pret long em, yumi bai bihainim ol tok bilong em bilong stiaim yumi na dispela bai helpim yumi. Tingim tok Jehova i mekim long ol lain Israel: “Mi laik bai ol i tingting olsem oltaim, na bai ol i mas aninit long mi na bihainim olgeta lo bilong mi oltaim. Olsem bai olgeta wok samting bilong ol na bilong ol tumbuna pikinini bilong ol i ken kamap gutpela oltaim.”—Lo 5:29.
Yes, pasin bilong pret long God i no inap kalabusim yumi na mekim yumi i stap bel hevi, nogat. Em bai helpim yumi long stap fri na i stap amamas. Aisaia i tok profet long Jisas olsem: “Dispela pasin [bilong pret] bai i mekim em i amamas moa yet.” (Aisaia 11:3) Na man bilong raitim Song i tok: “Wanem man i save pret long Bikpela na i laikim tumas long bihainim ol lo bilong en, dispela man i ken amamas.”—Song 112:1.
Tasol yumi no inap pret long God o laikim em sapos yumi no save long em. Long dispela as na em i bikpela samting tru long stadi long Baibel. Dispela kain stadi bai helpim yumi long save gut long ol pasin bilong God na bai yumi pilim tru olsem em pasin bilong gutpela tingting sapos yumi bihainim ol tok bilong em bilong stiaim yumi. Taim yumi go klostu long God, yumi laik mekim laik bilong em na bel bilong yumi i kirap long bihainim ol lo bilong em, long wanem, yumi save olsem ol lo bilong em bai helpim yumi.—1 Jon 5:3.
Yumi bai amamas taim yumi save olsem yumi bihainim stretpela rot. Dispela samting i kamap tru long Bill, em yumi stori long em long kirap bilong dispela stori. Nau em i tok: “Nau 9-pela yia i go pinis kirap long taim mi bin mekim namba wan Baibel-stadi bilong mi, na pasin bilong mi long pas gut wantaim Jehova i bin kamap strong moa. Dispela amamas bilong mi long pastaim i bin kamapim bikpela amamas long i stap bilong mi. Olgeta taim mi save ting olsem ol gutpela samting bai kamap. Ol wok samting mi mekim long nau i gat as bilong en na i no olsem mi wok hat nating long painim amamas. Mi tingim Jehova olsem wanpela man i stap tru, na mi save olsem em i tingim tru i stap bilong mi.”
Long stori i kamap bihain long dispela, yumi bai stori long olsem wanem save yumi kisim long Jehova i save kamapim amamas na helpim ol man i bihainim dispela tok.
[Rait long pes 5]
Bilong i Go Klostu Long God, Yumi Mas Laikim Em Na Pret Long Em
[Piksa long pes 6]
Jisas i amamas moa yet long pasin bilong pret long Jehova