Ol Niuspepa Long Rasia i Litimapim Nem Bilong Ol Witnes Bilong Jehova
LONG Jun 21, 1997, ol i dediketim brens-ofis bilong ol Witnes Bilong Jehova long Rasia. Long dispela brens-ofis i gat 7-pela haus slip, na bikpela Haus Kingdom, na bikpela rum kaikai, na wanpela traipela haus bilong ol ofis na hap bilong putim ol kago samting. Brens-ofis i stap longwe long Sen Pitasbek inap 40 kilomita long hap not-wes long ples Solnesnoye.
Planti man i kisim save long dispela bung bilong dediketim brens-ofis, long wanem, ol i singautim lain bilong raitim stori long ol niuspepa i kam long dispela bung. Wanpela bilong ol i raitim stori long wanpela nius bilong Mosko (Literaturnaya gazeta), em ol i save prinim inap 250,000 bilong en, na em i tok olsem: “Taim yu lukim dispela brens-ofis long namba wan taim yu bai kisim kain tingting olsem: Em nau, dispela em i stretpela rot long wokim ol samting!”—Lukim ol piksa i stap long pes 16 na 17.
Man bilong raitim stori, em Sergey Sergiyenko, i tok: “Olgeta samting i stap long hia ol dispela bilipman i wokim long han bilong ol yet: Ol manmeri bilong Finlan, Swiden, Denmak, na Jemani ol i mekim bikpela hap bilong wok. Ol i wokim ol klinpela rot long brik; na ol i katim gut gras; na ol haus i gat ol naispela rup, na ol bikpela windo, na ol dua ol i wokim long glas—dispela em i hetkota bilong oganaisesen bilong ol Witnes Bilong Jehova long Rasia.”
Ol Witnes i singautim sampela niusman bilong Mosko, na ol i stretim rot bilong ol long kam long dispela bung. Mosko i stap longwe long brens-ofis inap 650 kilomita long hap saut-is. Ol i kisim ol niusman i go raun na lukim brens-ofis, na bihain ol niusman inap kamapim sampela askim na lain bilong brens-ofis i bekim askim bilong ol, na long wankain taim ol i kisim sampela liklik kaikai. Ol samting Mista Sergiyenko i lukim i kirapim em long raitim stori olsem:
“Ol Witnes i gat pasin daun . . . Bilong senisim liklik wanpela hap tok ol Rasia i save mekim yumi ken tok long ol olsem, ‘taim ol Witnes i stap [long haus bilong ol] i kain olsem Jehova i holim ol na lukautim ol.’ . . . Ol Witnes i save mekim gutpela pasin long olgeta manmeri, na ol i save mekim gutpela pasin moa yet long ol brata bilong ol.”
Niusman S. Dmitriyev i raitim wanpela stori long nius Moskovskaya Pravda, em wanpela nius ol i save prinim inap 400,000 bilong en long olgeta de, na het-tok bilong stori bilong em i tok olsem: “Yu Mas Wokim Ples Yu Laik i Stap Long En Long Han Bilong Yu Yet Tasol,” na em i tok:
“Taim gavman i rausim tambu i stap long wok bilong oganaisesen bilong ol Witnes long Rasia [long 1991], ol Witnes i kirap toktok long wokim hetkota bilong ol yet. Ol i wok long painim wanpela hap graun bilong wokim dispela hetkota klostu long Mosko, tasol bihain ol i kisim save olsem sampela lain i laik salim wanpela kem bilong ol yangpela i stap klostu long Sen Pitasbek. Olsem na ol Witnes i baim dispela hap graun na ol i kirap wokim hetkota bilong ol. . . .
“Wanpela yia na hap i go pinis, long Janueri 1, 1996, dispela hetkota long ples Solnesnoye i kamap brens-ofis bilong dispela oganaisesen. Namel long mun Jun sampela niusman bilong Mosko ol i kam na stap sampela taim long Sen Pitasbek bambai ol i ken save ol Witnes Bilong Jehova ol i husat?”
Mista Dmitriyev i bekim dispela askim olsem wanem? “Ol i wankain olsem ol narapela manmeri.” Tasol ol i no wankain olgeta, olsem em i tok long pinis bilong stori bilong em: “Narapela i stap wanbel wantaim narapela, na ol i stap bel isi. Olsem wanem? Dispela em i wanpela driman? Yes. Tasol tu, em i samting i stap tru.”
Narapela niusman bilong Mosko, em Maksim Yerofeyev, em i save raitim ol stori long nius Sobesednik, ol i save prinim inap 300,000 bilong en, na em i tok: “Wanpela samting i mekim na olgeta manmeri i stap long dispela hap ol i save pas gut wantaim em i olsem: Ol i no save subim narapela long wok, tasol olgeta i laik wok.”
Taim em i stori long rum slip bilong kodineta bilong Komiti Bilong Brens, em Vasily Kalin, Mista Yerofeyev i tok: “Sampela niusman i gat tupela tingting, olsem na ol yet i laik makim rum slip bilong sampela narapela na go lukim ol dispela rum. Bikpela bilong rum slip na ol sia na tebol samting i stap long rum bilong Vasily Kalin, i klostu wankain olsem rum slip bilong ol narapela.”
Wanpela meri bilong raitim stori long niuspepa, em Anastasiya Nemets, em i raitim wanpela stori na het-tok bilong en i olsem: “Stap Bel Isi.” Liklik het-tok bilong dispela stori long nius Vechernyaya Moskva i olsem: “Ol Manmeri i Stap Long Wanpela Narapela Kain Ples Klostu Long Sen Pitasbek Ol i Lain Long Mekim Olsem.”
Taim em i stori long hap em brens-ofis i stap long en na brens-ofis i luk olsem wanem, em i tok: “Ol gutpela bus na ples i gat gras i raunim dispela hap. Galf Bilong Finlan i no stap longwe. I gat ol naispela haus ol i wokim long stail ol manmeri long Yurop i save wokim haus long en, na i gat ol klinpela rot ol i wokim long brik, na ol gaden plaua i gat kala kala.
“Ol bikpela bisnis i save wokim ol liklik ples olsem long ol maniman bilong Rasia. Tasol long dispela ples i gat ol manmeri i no gat planti samting bilong skin. . . . Ol i no sot long wanpela samting, na bikpela samting moa, ol i stap gut wantaim olsem pren. I gat 350 manmeri tasol i stap long dispela ples na ol i bilong olgeta hap bilong graun; na yu inap harim kain kain tok ples—tok ples Spen, Potugal, Finlan, na Swiden.
“Dispela ples i kain olsem wanpela liklik taun: Em i gat ol hap bilong wokim na stretim ol kain kain samting, olsem na dispela bikpela famili bilong planti tok ples i no sot long wanpela samting; na ol i gat klinik bilong ol tu.”
Tru tumas, ol 1,492 manmeri i kam long 42 kantri ol i amamas tru taim ol i stap long dispela bung bilong dediketim brens-ofis long Solnesnoye. Planti bilong dispela lain i kam bung em ol lapun i bin mekim wok bilong God inap longpela taim, em long taim gavman i bin tambuim wok bilong ol. Brens-ofis i stap long wanpela hap graun, bikpela bilong en i olsem 6.9 hekta na em i kain olsem wanpela paradais. Olsem wanem? Yu inap pilim bikpela amamas bilong ol dispela lapun taim ol i raun na lukluk long dispela naispela brens-ofis? Yumi no ken kirap nogut sapos ol i ting ol i driman.
[Ol Piksa long pes 10]
Ol niusman i raun long lukim brens-ofis
Lain long brens-ofis i bekim askim bilong ol niusman