50 Yia Bihain—Mipela i Ranawe Long Ol Bom!
“Klostu nau ol bom bai pairap long hia. Yupela i go long ples hait.”
WANPELA polis i tok olsem long mi na man bilong mi, na mipela i mas lusim haus na go long wanpela ples hait i stap klostu em ol i bin wokim long simen. Mipela i kirap nogut long dispela toksave, long wanem, mipela i no stap long wanpela hap ol man i save pait long en; mipela i go lukim ol pren i stap long wanpela naispela liklik ailan bilong ol ailan Masal, long Maikronisia.
Mipela i kam long liklik ailan Tarawa bilong stap wantaim wanpela pren na man bilong em inap wanpela wik. Long dispela ailan dispela meri tasol em i wanpela Witnes Bilong Jehova, na mipela i laik helpim em long autim tok long ol manmeri i stap long dispela hap.
Ol manmeri bilong ol ailan Masal i gat gutpela pasin na ol i amamas long toktok long Baibel. I no longtaim i go pinis na Sosaiti Wastaua i bin wokim buk Yu Inap i Stap Oltaim Long Paradais Long Graun, long tok ples bilong ol man long dispela ailan, na mipela i tilim pinis sampela buk long ol man. Ol manmeri i kisim dispela buk ol i tok promis olsem ol bai kaunim buk, na ol bai no mekim wok long en olsem ken karawan, o olsem samting bilong rausim ol spirit nogut. Wanpela pasin bilong ol em olsem: Ol i save putim wanpela pes bilong Baibel insait long botol na hangamapim dispela botol long sparen bilong haus o long wanpela diwai i stap klostu, na ol i ting dispela bai rausim ol spirit nogut.
Inap sampela de pinis mipela i amamas long stap long dispela hap, tasol long Sarere mipela i luksave olsem senis bai kamap. Long moning taim mipela i go subim wara long solwara i klia na i hat liklik. Taim mipela i wokabaut i kam bek long nambis, mipela i lukim wanpela narapela kain sip i wok long kam klostu. I no longtaim na mipela i save bilong wanem dispela sip i kam. Wanpela polis i tokim mipela olsem 7-pela man bilong ami bilong Amerika ol i kam bilong pairapim ol olpela bom i stap long dispela ailan. Bilong ol manmeri i stap gut na ol i no kisim bagarap, ol i mas lusim haus bilong ol na stap wanpela de long ol ples hait ol Japan i bin wokim long taim bilong Namba 2 Pait.
Taim ol manmeri i kam long ailan Tarawa, wantu ol inap lukim ol dispela ples hait em ol i tokaut klia long ol samting nogut i bin kamap long bipo. Taim yu stap longwe na lukluk i go long dispela ailan em i luk olsem wanpela paradais, tasol taim yu kam klostu long en, yu inap lukim olsem wanpela pait i bin kamap 50 yia i go pinis na em i bin bagarapim sampela hap bilong dispela ailan. Bipo bikpela ples balus bilong ami bilong Japan i stap long dispela hap, na ailan i pulap long ol samting bilong Namba 2 Pait. Long olgeta hap i gat ol samting bilong pait i wok long ros—ol balus bilong pait, ol bikpela gan, na ol bom samting—na ol plaua na bus i karamapim ol.
Tasol ol dispela bom bilong bipo i mekim na ol man i tingting planti. Long taim bilong pait, ami bilong Yunaitet Stets i bin tromoi 3,600 ton bilong ol kain kain bom nogut na ol roket long ailan Tarawa, na ami bilong Japan tu ol i gat ol bom na gan samting bilong ol yet long dispela ailan. Ol man i ting ol bom i stap 50 yia pinis ol i no inap pairap, tasol ol inap kamapim sampela hevi, olsem na kirap long yia 1945 taim pait i pinis, ol lain bilong rausim ol bom ol i bin kam long dispela ailan inap 5-pela taim.
Mipela i laik save dispela toksave i tru o nogat, olsem na mipela i wokabaut i go long hap dispela lain bilong rausim ol bom i sua long en na toktok wantaim ol. Ol i tok dispela toksave em i tru, na insait long wanpela aua ol bai kirap pairapim ol bom! Ol i tokim mipela olsem sapos mipela i no go long ples hait, mipela i mas lusim ailan wantu tasol.
Pren bilong mipela i laik stap long ailan Tarawa, na em i go wantaim sampela narapela famili long wanpela bikpela ples hait bipo ol masin-gan i stap long en. Bihain em i stori long mipela olsem ol hul em bipo ol soldia i bin sutim gan long en ol i olsem windo bilong dispela ples hait, olsem na insait long ples hait i hat nogut tru na ol manmeri i pas pas. Taim ol i stap insait long dispela ples hait pren hia i tingim dispela pait bilong bipo, na em i tok olsem taim em i liklik pikinini em i amamas long harim pairap bilong ol bom, tasol nau em i pret taim ol i pairap.
Long wanpela liklik bot i gat moto, man bilong pren bilong mipela i kisim mipela i go long ailan Wolet i stap klostu inap 8-pela kilomita samting. Mipela i ran long bot inap sampela minit tasol, na mipela i harim bikpela pairap. Mipela i lukluk long ailan Tarawa na mipela i lukim bikpela smok i go antap klostu long hap ol haus i stap long en. I no longtaim na mipela i harim narapela pairap, na bihain namba tri pairap i bikpela tru.
Long dispela de mipela i autim tok long ailan Wolet, na planti taim mipela i harim ol bom i pairap. Long sampela mun i go pinis, ol i bin painim na makim ol olpela bom. Ol i painim ol dispela bom long kain kain ples—long nambis, klostu long ples balus, na long ol gaden klostu long haus bilong ol man! Lain bilong rausim ol bom i bungim sampela liklik bom na pairapim ol long wankain taim bambai ol i no ken pairapim ol bom planti taim.
San i laik go daun taim mipela i go bek long ailan Tarawa. Taim mipela i kam klostu long ailan, mipela i luksave olsem smok bilong ol paia bilong kukim kaikai i no stap. Mipela i save sampela samting i no stret. Wantu wanpela liklik bot i spit i kam long mipela, na ol i toksave olsem mipela i no ken go klostu long ailan. Wanpela bikpela bom ol i mas pairapim i stap yet aninit long solwara klostu long rip. Orait em i klostu tudak na mipela i go longwe liklik long nambis, na mipela i lukim wanpela samting planti manmeri i stap long nau ol i no bin lukim—aninit long solwara ol i pairapim wanpela bom bilong Namba 2 Pait, na dispela i mekim na planti wara na smok i sut i go antap inap planti handet mita!
Mipela i amamas, long wanem, i no gat wanpela man long ailan Tarawa i kisim bagarap long dispela de. Olsem wanem? Dispela lain bilong rausim ol bom i rausim pinis olgeta bom i stap long ailan? Ating nogat. Man i go pas long dispela lain bilong rausim ol bom em i ting ol manmeri bilong ailan bai painim yet sampela olpela gan na bom samting. Dispela em i wanpela bikpela tok mipela i stori long en wantaim ol man taim mipela i autim tok long ailan Tarawa. Mipela i amamas tru long stori long ol manmeri bilong dispela ailan olsem Kingdom bilong Jehova bai “mekim i dai pait long olgeta hap graun.”—Song 46:9.
Em stori bilong Nancy Vander Velde
[Piksa long pes 25]
Wanpela bom i no pairap yet