Sampela Tok i Kam Long Olgeta Hap
Pasin Bilong Ol Yangpela Long Briten
Wanpela ripot bilong nau i tok, wok bilong ol misin long Briten long helpim ol yangpela long tingim stretpela pasin long ol samting bilong maritpasin i wok long pundaun. Landon Yunivesiti i askim 3,000 yangpela, ol i ting i stret sapos “man na meri i no marit tasol ol i pren wantaim longtaim pinis, ol i ken mekim maritpasin o nogat.” Olsem lain bilong yunivesiti i ting, klostu olgeta yangpela i tok ol i no save bilip long God o ol i bilip olsem God i no stap, ol i tok i no gat rong long dispela. Tasol inap 85.4 pesen bilong ol Katolik na 80 pesen bilong ol Angliken, ol tu i tok i no gat rong long dispela. Na planti yangpela bilong sampela lotu moa olsem ol Muslim, Juda, Hindu, na ol narapela, ol i mekim wankain tok. Nius The Times bilong Landon i tok, dispela ripot “bai givim bel hevi long ol man bilong ol misin em ol i wok long helpim ol man long bihainim ol lo bilong bipo long ol samting bilong maritpasin.”
Planti i No Go Moa Long Sios Bilong Inglan
Sios Bilong Inglan i tokaut olsem, wan milion manmeri i save go long haus lotu bilong ol long olgeta Sande. Tasol sampela pasto i gat bikpela namba ol i tok, ol i ting namba bilong ol man i go long haus lotu bilong ol em 750,000 tasol. Wanpela lain i bin skelim dispela samting ol i tok, em namba wan taim namba bilong ol man i strong long lotu, em ol man i kisim Komyunio, em i go daun—namba i no winim 500,000. I gat wanem as na ol pasto i redi long bilasim namba bilong ol man i go long lotu bilong ol? Ol i no laik misin i pasim haus lotu bilong ol. Taim dispela samting i kamap ol i save bungim wantaim ol man bilong lotu na i no gat wok moa long planti pasto. Nius The Sunday Times bilong Landon i tok, wanpela pasto i tok tru olsem: “Em pasin bilong mi long raitim bikpela namba moa long ol man i kam lotu. Mi save bel hevi taim liklik lain man tasol i kam, olsem na taim mi raitim bikpela namba, dispela i save strongim bel bilong mi.”
Man i Kotim Meri Long Pasin Bilong Smok
Winim 20 yia Richard Thomas em i krai long meri bilong em na askim em long lusim smok, tasol meri i no lusim. Olsem na em i kotim meri. Mista Thomas i tokim kot, em i laik bai gavman i helpim em na em i no ken lus long gutpela poroman bilong em, em meri em i save laikim tumas, na gutpela helpim bilong em. Mama bilong dispela man em i dai pinis long sik bilong klok, na bihain papa bilong em i kisim sik strok na em i mas slip long bet inap 7-pela yia. Papa na mama bilong em ol i bin smok oltaim, na em i tok, em i no laik meri bilong em i dai long nikotin, em wanpela samting i save kalabusim ol man na ol i mas smok oltaim. Tasol paslain long kot i mekim wanpela samting, Mista Thomas em i kam bek long kot na tokim ol long gutpela samting, olsem: “Meri bilong mi i orait long lusim smok.” Misis Thomas em i go insait long wanpela kain klinik bilong helpim ol man i kalabus long smok, na em i tok promis olsem em i no ken smok gen. Nius The New York Times i tok, taim Mista na Misis Thomas i lusim haus kot, tupela i holim han.
Ol Mama i Wok Mani
Long 1991, wanpela lain (National Association of Working Women) i tok, “long 1995 samting, inap 65 pesen bilong ol meri [bilong Amerika] em ol i gat liklik pikinini i no save go yet long skul, na inap 77 pesen bilong ol meri i gat pikinini i go long skul, bai ol i wok mani.” Olsem wanem? Tok bilong dispela lain i stret? Long 1996, nius The Washington Post i kamapim tok bilong wanpela lain sensus (U.S. Census Bureau). Nius i tok, inap 63 pesen bilong ol meri i gat pikinini i no kisim yet 5-pela krismas, ol i wok mani. Na inap 78 pesen bilong ol meri i gat pikinini i go long skul, ol i wok mani. Olsem wanem long Yurop? Ol ripot bilong wanpela lain (Statistical Office of the European Union) i tok, long 1995 long ol kantri bilong Yurop, namba bilong “ol meri i wok mani na pikinini bilong ol i gat 5-pela krismas i go inap 16 krismas” i olsem: Long Potugal inap 69 pesen i wok, long Ostria inap 67 pesen, long Frans inap 63 pesen, long Finlan inap 63 pesen, long Beljam inap 62 pesen, long Briten inap 59 pesen, long Jemani inap 57 pesen, long Netelan inap 51 pesen, long Grik inap 47 pesen, long Laksambek inap 45 pesen, long Itali inap 43 pesen, long Aialan inap 39 pesen, na long Spen inap 36 pesen.
Kamel Bilong Bus Long Ostrelia
Inap planti yia i go pinis ol i bringim ol kamel i kam long Ostrelia bilong helpim wok bilong putim waia bilong salim ol telegram samting na kamapim rot bilong ol tren. Tupela samting hia ol i mas wokim i go longwe long ol ples nogut bilong bus long dispela kantri. Taim ol trak i kisim ples bilong ol dispela strongpela animal, papa bilong ol—em ol man bilong Afganistan—ol i larim ol i ranawe long bus—ol i no laik kilim ol. Ol kamel i kamap planti long ples drai bilong sentral Ostrelia, na long nau i gat inap olsem 200,000 i stap long dispela hap. Nius The Australian i tok, long nau sampela man i bilip olsem ol kamel inap kamap wanpela bikpela samting bilong helpim kantri. Ol i bin salim mit bilong kamel na sampela man i baim, na ol i tok, mit bilong kamel i malumalum olsem mit bilong bulmakau, tasol i no gat planti gris. Na ol i mekim wok long skin, susu, na gras bilong kamel, na long gris bilong en ol i wokim sop na sampela samting bilong penim long pes. Na planti man i laik kisim kamel. Peter Seidel bilong wanpela kampani (Central Australian Camel Industry), em i tok: “Planti banis bilong ol animal long olgeta hap, na ol pak i gat animal na ol turis i save raun long en, ol i laik kisim ol kamel bilong Ostrelia, long wanem, lain kamel bilong mipela ol i no gat sik.”
Pasin Nogut Bilong Painim Pis
Planti pis i wok long pinis nau, olsem na ol kampani i wok bisnis long painim pis, ol i baim masin samting bilong kisim ol pis long as bilong solwara. Bilong bungim ol pis em bipo ol i no gat laik long kisim, ol i putim masin i go daun tru insait long solwara inap 1,200 mita na pulim masin long as bilong solwara. Nius Science News i tok, tasol dispela masin bilong ol i kisim planti tru bilong ‘ol liklik snek, na ol mosong, na sampela kain samting bilong solwara i gat nil, na kain kain liklik pis samting em ol i stap daunbilo tru long solwara,’ na ol i ‘tromoi ol dispela pis samting olsem ol i pipia tasol.’ Pasin bilong bagarapim ol dispela liklik samting bilong solwara i mekim na ol pis i no planti, long wanem, ol dispela liklik samting i save givim kaikai na haus long ol liklik pis. Elliott Norse, em dairekta bilong wanpela lain (Marine Conservation Biology Institute) long Retmon, Wosington, Yunaitet Stets, na em i tok, pasin bilong bagarapim ples tru bilong ol pis long dispela kain rot bilong kisim pis, em i wankain long pasin bilong “katim na rausim bikbus olgeta.”
Planti Moa i Tokaut Olsem Ol i No Inap Bekim Dinau
Nius Newsweek i tok, long 1996 “inap 1.2 milion manmeri bilong Amerika i askim kot long tokaut olsem ol i no inap bekim dinau bilong ol; dispela i winim namba bilong ol man i bin mekim wankain tokaut long 1994 inap 44 pesen. Planti man i mekim olsem na nau dispela samting i no olsem samting nogut long ai bilong ol man.” I gat wanem as na dispela hevi i go bikpela moa? Nius Newsweek i tok, wanpela as i olsem: “Planti man moa i orait long dispela samting; ol i ting em narapela pasin bilong nau long man i ken bihainim laik bilong em yet. Ol kampani samting i bin givim dinau long ol man i tok, dispela kain tingting i mekim na ol man i mekim nabaut long en na tokaut nating olsem ol i no inap bekim dinau. Wanpela ripot i tok, inap 45 pesen bilong ol man i askim kot long tokaut olsem ol i no inap bekim dinau bilong ol, ol inap bekim bikpela hap bilong en.” Tasol ol i no mekim wanpela samting bilong kamapim klia olsem ol i laik long bekim dinau bilong ol, na ol i no pilim sem liklik, nogat; planti i tok, ‘Ol i mas lusim dinau bilong mi na mi ken kirap gen na mekim nupela wok.’ Planti man na bisnis moa ol i wok long stretim hevi bilong ol long rot bilong kot olsem askim kot long tokaut olsem ol i no inap bekim dinau bilong ol. Na tu, tok gris bilong ol loya i stiaim tingting bilong ol olsem, ‘stretim hevi bilong yu long dinau long rot i kwik na i no gat hatwok!’ Maski wok bisnis bilong planti kantri i gutpela, planti man moa i askim kot long tokaut olsem ol i no inap bekim dinau, olsem na ol saveman i pret taim ol i tingim ol hevi inap kamap sapos stok-maket i no gat strong moa o bikpela hevi long mani i kamap.
Bagarap Long Asenik
Wanpela nius (The Times of India) i tok: “Klostu 15 milion manmeri bilong Banglades na 30 milion manmeri bilong Wes Bengol—Kalkata tu—ol i gat hevi long gip bilong asenik.” Dispela hevi i kamap long wanpela samting ol i mekim bilong helpim ol long kamapim planti nupela kain kaikai. Taim ol i digim graun bilong wokim ol hul wara i daun tumas bilong kisim wara bilong putim long ol gaden kaikai, asenik i stap insait long graun i kamap long wara, na bihain dispela asenik i bin kamap long ol hul wara ol man i mekim wok long en bilong dring. I no longtaim i go pinis na saveman Willard Chappel bilong Yunivesiti Bilong Kolorado, Yunaitet Stets, em i go long ol hap i gat dispela hevi na em i stori olsem: “Long olgeta hap bilong graun i no gat bikpela hevi i winim dispela na planti man wantaim i kisim bagarap long gip bilong wanpela samting.” Winim 200,000 manmeri ol i kisim pinis sik long skin bilong ol, em wanpela samting i makim olsem ol i kisim bagarap long gip bilong asenik. Wanpela man bilong gavman long Banglades, em Ishak Ali, em i tok: “I olsem pasin bilong wokim planti nupela kain kaikai i helpim yumi long pinisim hangre, tasol dispela i kamapim bikpela bel hevi moa.”