Askim

Nau i gat bikpela hevi long mani na planti man na kampani i askim kot long tokaut olsem bisnis bilong ol i bagarap na i no inap bekim dinau. Baibel i orait long Kristen i mekim olsem o nogat?

Bekim bilong dispela askim i kamapim klia gutpela tingting Baibel i givim long yumi long ol pasin bilong nau. Long planti kantri i gat lo long kot i ken tokaut olsem bisnis bilong wanpela man o kampani i bagarap na i no inap bekim dinau. I no wok bilong kongrigesen Kristen long givim tingting long ol man long lo bilong gavman, tasol nau yumi ken stori long lo bilong dispela samting.

Wanpela as na ol gavman i orait long dispela pasin, em olsem: Em i helpim ol man i bin givim mani o dinau na bai ol inap kisim bekim sapos man (o kampani) i no bekim. Ol inap askim kot long tokaut olsem bisnis bilong man (o kampani) i bagarap, na nau kot i ken tilim ol samting bilong em long ol olsem hap bekim bilong dinau.

Na dispela pasin i helpim man (o kampani) i gat dinau sapos tru em i no inap bekim. Em inap tokim kot long tokaut olsem mani bilong em i pinis, na nau ol man em i dinau long ol i ken kisim sampela samting bilong em. Tasol ating lo bai orait long em i holim haus na sampela samting bilong em, na bihain em i no ken pret moa long ol man bipo em i dinau long ol bai kisim samting bilong em.

Em nau, yumi ken save ol dispela lo i bilong lukautim man i givim dinau na man o kampani i kisim dinau. Tasol nau yumi ken tingim gutpela tok Baibel i givim long yumi long dispela samting.

Taim yumi kaunim Baibel yumi inap save, Baibel i no kirapim ol man long kisim dinau. I gat ol toksave long Baibel olsem i stap long Sindaun 22:7: “Ol maniman i save bosim ol man i sot long ol samting. Na ol man i gat dinau, ol i stap olsem wokboi nating bilong ol man i givim dinau.”

Tingim tu tok piksa bilong Jisas long Matyu 18:​23-34 i stori long wanpela wokboi nating i gat bikpela dinau tru. “King i tok long ol i mas salim dispela man wantaim meri pikinini bilong en . . . [na] olgeta samting bilong en,” tasol bihain king i sori long em na lusim dinau bilong em. Bihain dispela wokboi i no sori long wanwok bilong em na king i “putim em long han bilong ol man bilong givim pen long em, inap em i bekim olgeta dinau bilong en.” Olsem na yumi save, i gutpela sapos yumi no dinau.

Ol wokboi bilong God long Israel bipo i save mekim wok bisnis, na sampela taim ol i kisim dinau o givim dinau. Jehova i givim wanem lo long ol long dispela? Sapos man i laik dinau bilong kirapim wanpela wok bisnis o bilong mekim wok bisnis bilong em i go bikpela, na wanpela Israel i givim dinau long em, dispela Israel i save kisim winmani taim man i bekim dinau na lo bilong God i orait long dispela. Tasol God i kirapim lain bilong em long mekim pasin sori taim ol i givim dinau long wantok i sot tru; ol i no ken kisim winmani long em. (Kisim Bek 22:25) Lo 15:​7, 8 i tok: “Sapos wanpela wantok . . . i sot long wanpela samting, orait yupela . . . i mas sori long em na givim em ol samting em i sot long en.”

Kain pasin sori olsem i kamap klia long ol lo i tok ol man i givim dinau i no ken kisim samting bilong man em bilong helpim em long i stap laip. Bilong bekim dinau, ol i no ken kisim ston bilong wilwilim rais samting, o bikpela laplap bilong karamapim skin long nait.​—⁠Lo 24:​6, 10-13; Esekiel 18:​5-9.

Tasol sampela Juda i no bihainim gutpela pasin sori i as bilong ol dispela lo bilong Bikpela Jas na Man bilong givim ol lo long yumi. (Aisaia 33:22) Sampela Juda i mangalim mani na ol i mekim hatpela pasin long ol brata bilong ol. Long nau tu ating sampela man i mekim hatpela pasin na ol i no isi liklik long man i dinau long ol. Ating ol i mekim olsem long Kristen tu, em taim nogut i painim em tu na em i no inap bekim dinau. (Saveman 9:11) Sapos kain samting olsem i painim Kristen na ol man bilong graun i strong tumas long em i mas bekim dinau, ating bai em i tingting long lukautim em yet. Em i ken mekim wanem? Sampela man bilong graun bai orait tasol long em i bihainim pasin bilong askim kot long tokaut olsem bisnis bilong em i bagarap, o mani bilong em i pinis. Olsem na sapos Kristen i no mangalim mani o les long bekim dinau, ating em i ken bihainim dispela pasin.

Tasol yumi mas tingim tu pasin bilong Kristen. Ating em i kisim dinau, long wanem, em i no bosim gut skin na em i no skelim gut ol samting em i mas baim, o hamas mani em i mas tromoi, o em i no tingim gut pastaim ol samting em i mas mekim long wok bisnis bilong em. Orait, yu ting em i ken ting dinau i samting nating na em i kirap kwik askim kot long tokaut olsem bisnis bilong em i bagarap na em i no inap bekim dinau? Sapos em i mekim olsem, bai em i givim hevi long ol narapela na pasin kranki bilong em yet i as bilong dispela. Baibel i no orait long em i mekim nabaut olsem. Baibel i tok, taim wokboi bilong God i tok ‘Yes’ long wanpela samting, em i mas truim tok bilong em. (Matyu 5:37) Na Jisas i tok, taim wanpela man i laik wokim haus, em i mas tingim gut pe bilong wokim pastaim. (Luk 14:​28-30) Olsem na sapos Kristen i laik kisim dinau, em i mas tingting gut pastaim; em i mas tingim ol samting nogut inap kamap. Na sapos em i kisim dinau, em i mas pilim tru wok bilong em long bekim mani long man o kampani i bin givim dinau long em. Sapos planti man i lukim olsem Kristen i mekim nabaut na ol i no inap bilip long em, dispela bai bagarapim gutpela nem ating em i bin wok strong long kisim, na bai em i no gat gutpela nem moa long ol ausaitman.​—⁠1 Timoti 3:​2, 7.

Song 15:4 i stori long kain man Jehova i save amamas long em. Dispela man “i save inapim ol promis em i bin mekim, maski dispela pasin i givim bikpela hevi long em.” God i laik bai ol Kristen i mekim gutpela pasin long man i givim dinau, wankain olsem ol i laik bai dispela man i mekim long ol.​—⁠Matyu 7:12.

Olsem na sapos bikpela hevi tru i painim Kristen, Baibel i no tambuim em long kisim helpim long rot bilong kot sapos em i no inap bekim dinau. Tasol ol Kristen i no ken giaman liklik; ol i mas mekim stretpela pasin na bai ol narapela inap bilip long ol. Ol i mas laik tru long bekim ol dinau bilong ol na wok strong long mekim.