Hevi i Go Long Olgeta Hap

Liklik Robert i gat 11-pela krismas tasol taim ol i painim em aninit long wanpela bris. Skin i slip long graun na pes bilong em i go daun long graun. Baksait long het i gat 2-pela hul em katres i bin mekim. Ol i ting ol memba bilong lain raskol bilong em yet ol i bin kilim em i dai.

Alex i gat 15 krismas taim em i laik insait long wanpela lain raskol, na indai inap painim em tu long dispela rot taim em i yangpela yet. Tasol Alex i lukim wanpela pren i dai, na em i ting: ‘Mi no laik bai dispela samting i painim mi.’

OL LAIN raskol bilong pait na bagarapim man, em bipo ol man i save tingim ol i wankain long tupela lain raskol bilong Los Enjeles ol i kolim olsem Blut na Krip, ol i go kamap long olgeta hap bilong graun. Tasol maski ol lain raskol i stap we, planti pasin bilong ol i wankain tasol.

Bihain long 1950 samting, ol manmeri i kirap nogut long wanpela lain raskol bilong Inglan, em lain “Tediboi.” Wanpela nius bilong Landon (The Times) i tok, lain Tediboi i bin mekim wok long akis, naip, sen bilong wilwil, na sampela samting moa bilong “bagarapim nogut tru” ol man i no gat asua. ‘Ol i bin pait wantaim naip, na ol i bagarapim ol liklik haus kaikai samting.’ Ol i birua nogut long ol manmeri, stilim samting bilong ol, paitim ol, na kilim i dai sampela.

Wanpela nius (Die Welt) bilong Hambek, Jemani, i tok, long nau ol lain raskol i birua long ol yangpela taim “ol i wokabaut i go long disko o wokabaut i go bek long haus.” Ol raskol i holim “beisbal-bet, naip, na gan.” Wanpela nius bilong Munik (Süddeutsche Zeitung) i tok, wanpela lain raskol long Belin ol i kolim olsem skinhet, ol i save birua long ol man i olsem “ol i no gat strong​—⁠olsem ol man i no gat ples slip, o skin i bagarap liklik, o ol meri i lapun liklik.”

Wanpela man long Spen i save raitim stori bilong Kirap! em i tok, dispela hevi long ol lain raskol, em i wanpela nupela hevi long Spen, tasol hevi i wok long go bikpela moa. Nius ABC long Madrit i gat het-tok olsem: “Ol Skinhet​—⁠Nupela Pret Bilong Ol Rot.” Wanpela man bipo em i bilong lain skinhet long Spen, em i tok, ol i bin raun painim “ol man bilong narapela kantri, ol pamukmeri, na ol man i save mekim pasin sem wantaim man.” Na em i tok moa: “Sapos i no gat pasin bilong bagarapim man i kamap long wanpela nait, dispela nait i bin lus nating.”

Wanpela nius (Cape Times) i tok, planti pasin bilong bagarapim man i save kamap long Saut Afrika ‘ol lain raskol i nogut tru i as bilong en.’ Wanpela buk ol i bin wokim long Kep Taun i tok, long ol taun i stap rabis tru, ol lain raskol bilong Saut Afrika i kamap olsem lain “i hangamap nating long ol narapela na ol i no inap mekim wanpela gutpela wok,” olsem na ol i “hansapim ol man, na stil, na reipim ol meri maski ol i bilong taun bilong ol yet. Na ol i pait wantaim ol narapela lain raskol bilong bosim wanpela hap, ol maket, na ol meri.”

Wanpela nius bilong Brasil (O Estado de S. Paulo) i tok, ol lain raskol long Brasil i “kamap planti moa hariap hariap.” Nius i tok, ol lain raskol i save birua long narapela lain raskol, na long ol yangpela i gat gutpela sindaun liklik, na long ol man bilong narapela lain o skin, na long ol rabisman i kam long narapela kantri na wok leba. Na wanpela taim sampela lain raskol i wok wantaim na “stil long ol man i stap long nambis . . . , na ol yet i pait,” na wanpela bikpela rot long Rio de Janero i bin kamap olsem “ples bilong pait.” Narapela stori i kam long Brasil i tok, ol lain raskol i wok long go planti moa long ol taun olsem biktaun Sau Paulo na Rio de Janero, na long ol liklik taun tu.

Long 1995, nius Maclean’s bilong Kanada i tok, ol polis i ting inap olsem 8-pela lain raskol i mekim wok nogut bilong ol long Winipek, Kanada. Na ol nius long Amerika i kamapim piksa bilong ol raskol, em ol i bin kisim klos na rait nogut bilong lain bilong ol i go long ol Indian long ol liklik ples ol Indian i sindaun long en long hap Saut-Wes bilong Amerika.

Long Nu Yok Siti long yia i go pinis, insait long sotpela taim planti pasin nogut i kamap em lain raskol i as bilong en. Ol i ting, ol raskol bilong lain Blut na Krip, em tupela lain raskol i gat nem bipo long Los Enjeles, ol i insait long ol dispela pasin nogut. Bikman bilong Nu Yok i tok, kirap long Julai i go inap Septemba, ol polis i holim 702 man i bin insait long sampela pasin bilong ol lain raskol.

Dispela hevi i no wanpela hevi bilong ol biktaun tasol, nogat. Wanpela nius (Quad-City Times) ol i wokim long wanpela provins long namel bilong Amerika i tok, “pait na bagarapim man i go bikpela moa namel long ol yangpela, na planti i kisim ol drak na tingting planti olsem i no gat wanpela samting ol inap wetim.”

Bikpela Hevi Tru

Ol i tok, bipo wanpela lain raskol ol i wanpela lain pren tasol; bihain ol i kamap raskol. Tasol taim bos bilong ol i wok long kisim nem, pasin nogut bilong ol i wok long go bikpela. Bos bilong dispela lain raskol i sindaun wantaim bubu meri bilong em long haus bilong em, na long olgeta taim sampela lain i sutim katres long haus, maski bubu meri i stap insait. Wanpela nius i tok, haus i gat planti hul, winim 50. Narapela lain raskol i tok, lain raskol bilong bubu pikinini man i gat asua, olsem na ol i sutim ol katres bilong bekim nogut long ol. Na brata bilong bos bilong dispela lain raskol em i stap long kalabus, long wanem, em i bin mekim pasin raskol, na kasen bilong em​—⁠em wanpela man i bin go sindaun long narapela hap bilong abrusim ol pait samting​—⁠ol i kilim em i dai taim em i kam bek long ples bilong raun tasol.

Long Los Enjeles, sampela raskol i sutim gan long wanpela ka na kilim i dai wanpela pikinini i gat 3-pela krismas. Mama bilong em na boipren bilong mama, ol i popaia na kisim ka i go long wanpela rot ol i no laik go long en. Wanpela katres i sut i go long wanpela skul na bagarapim tisa i wok long helpim ol sumatin long stretim sampela samting long i stap bilong ol na mekim i kamap gutpela. Na planti moa i bin dai long han bilong ol raskol tasol ol i no insait long wanpela lain raskol. Wanpela mama long Bruklin, Nu Yok, i kisim nem olsem wanpela mama i bel hevi stret long dispela hap​—⁠ol 3-pela yangpela pikinini man bilong em i dai long han bilong ol lain raskol.

Wanem samting i mekim na pasin bilong pait na bagarapim man ol yangpela i save mekim long nau i go bikpela long olgeta hap? Yumi ken mekim wanem bilong lukautim ol gutpela pikinini bilong yumi na dispela pasin i no ken bagarapim ol? Ol lain raskol i kamap olsem wanem? Bilong wanem planti yangpela i insait long ol lain raskol? Ol stori i kamap bihain long dispela bai toktok long ol dispela askim.

[Piksa Kredit Lain long pes 3]

Scott Olson/Sipa Press