Yu Ting Olsem Wanem Long Ol Man Bilong Narapela Skin?

‘Ol skinhet bilong Amerika i wankain long ol strongpela lain skinhet bilong Yurop​—em ol yangpela lain waitskin. Mipela i no laik tru long ol lain nogut olsem ol maniman na komyunis ol i wok long bagarapim mipela lain waitskin. Lain Juda nogut i as bilong dispela hevi bilong mipela.’

DISPELA tok i stap long wanpela liklik pepa bilong wanpela lain yangpela man long Sikago (Amerika). Ol i save kolim olsem skinhet, long wanem ol i save sevim gras bilong het na skin bilong het i stap ples klia olsem kela. Ol i save pasim kain klos olsem ol yangpela bikhetman i save pasim, i gat mak bilong ol Natsi bilong Jemani long en, na ol i litimapim pasin bilong pait, na ol i save harim ol musik i litimapim nem bilong ol waitskin olsem ol i holim bikpela strong, na ol i birua long ol Juda na ol blakskin na ol narapela liklik lain.

Bos bilong wanpela lain olsem, nem bilong ol Givim Bel long Pait, em i mekim tok long wanpela bung na em i tok, lain bilong em i man bilong pait, na em i tok, ‘Mi man bilong pait. Mi givim bel tru long ol waitskin, na sapos yu givim bel tru long wanpela samting, bai yu kamap man nogut bilong pait, winim olgeta narapela man.’

Ol dispela lain ol i kolim skinhet ol i no planti. Ol i gat tingting nogut tru long ol narapela lain. Tru i no planti man long nau i kamapim long ples klia olsem ol i bel nogut tru long ol man bilong narapela skin. Tasol long bel bilong ol, planti man i gat tingting nogut long ol lain bilong narapela skin. Ol i save lukim ai bilong ol i olsem wanem, na skin bilong ol i wanem kala, na ol i skelim ol long dispela. Tasol olsem wanem? I gat as na ol i ken mekim olsem? Sampela lain i gat save na sampela i no gat save? Sampela lain i gat ol gutpela pasin olsem pasin isi samting na sampela lain nogat? Bilong save long bekim bilong ol dispela askim, pastaim yumi mas skelim ol kain kain tingting ol man i bin kisim long dispela samting long bipo na i kam inap long nau.