Ol Raskol Meri Bikpela Hevi
‘HATPELA pasin, redi long pait, lain nogut tru.’ Em ol tok nius The Globe and Mail i bin kamapim bilong makim ol raskol meri i stap long ol haiskul long Kanada. Ol i les long i stap insait long ol lain raskol man, olsem na planti meri i kamapim lain bilong ol yet. Wanpela polis bilong Toronto i tok, ol meri ‘i kamap lain nogut tru.’ Saveman Fred Mathews i tok, ol i gat laik long mekim wok long ‘ol gan na naip samting na paitim ol man nogut tru,’ na ‘planti taim ol i moa nogut long ol raskol man.’ (Nius Globe) Bilong wanem i olsem? Wanpela polis i tok, planti yangpela raskol meri i ting, sapos polis i holim ol, ‘ol bai kalabus sotpela taim tasol.’ Wanpela mausman bilong polis i tokim nius Globe olsem, ‘long ol haiskul, ol yangpela meri, sampela i gat 11-pela krismas tasol, ol i save stil na mekim wok bisnis long ol drak na ol gan samting.’
Saveman Mathews, em i save gut long ol kain hevi olsem, na insait long tenpela yia em i bin givim ol askim long ol raskol meri na kisim save olsem, ol i ‘belhat na bikhet, long wanem, famili bilong ol i bin mekim nogut long ol o famili i no pas gut wantaim.’ Wanem samting i pulim ol kain yangpela olsem long insait long lain raskol? Wanpela meri, bipo em i bin insait long lain raskol, em i tok, lain raskol i mekim na, ‘em i pilim olsem em i stap gut na sampela i laikim em.’ Tasol em i bin tokim nius, inap tupela taim em i laik kilim i dai em yet bambai em i no ken insait moa long dispela lain raskol, na em i tok moa: ‘Planti kain birua olsem ol yangpela i dai o ol i kilim i dai skin bilong ol yet, em ol lain raskol i mekim. Taim yu insait long lain raskol, yu helpim lain bilong yu yet, nogut narapela lain raskol i kilim wanpela. Tasol narapela i no inap lukaut long narapela long ol wanlain raskol bilong ol yet.’
Wanpela tisa bilong haiskul i tok: ‘Mipela i no save gut long pasin bilong ol bikhetmeri hia long skul, na wanem taim ol bai kirap na bagarapim ol narapela. Taim ol i belhat yu no save ol bai mekim wanem. Na sapos yu wanpela tisa em samting bilong pret long en.’ Baibel i tok profet long “taim bilong las de” olsem, “planti hevi nogut tru bai i kamap,” long wanem, ol manmeri, em ol yangpela tu, “bai i no bosim laik bilong bodi bilong ol, na ol bai i pait na bagarapim ol man nabaut.”—2 Timoti 3:1-5.