Baibel i Tok Wanem?
Stap Singel Em Wanpela Pasin Ol Wokman Kristen i Mas Bihainim?
DISPELA tok ‘stap singel’ i makim olsem ol i no marit. Tasol wanpela buk (The New Encyclopædia Britannica) i tok, ‘planti taim ol i mekim wok long dispela tok bilong makim wok em man singel i save mekim olsem bikman bilong lotu, o saveman bilong lotu, o man i givim bel olgeta long lotu.’ Dispela tok ‘stap singel’ i makim ‘ol man i no marit, long wanem, ol i bin mekim tok promis bilong lotu long stap olsem, o ol i bilip olsem pasin bilong i stap singel i gutpela moa long man i holim wanpela wok bilong lotu o man i ting lotu i bikpela samting.’
Long bipo, sampela bikpela lotu i kirap bihainim dispela tok olsem ol pris pasto bilong ol i mas stap singel na i no ken marit. Tasol pasin bilong i stap tambu long marit i bikpela samting long Misin Katolik, winim ol narapela lotu i gat nem Kristen. Long nau, planti tok pait i save kamap long pasin bilong Misin Katolik long tambuim ol pris long marit. Nius The Wilson Quarterly i tok, ‘long taim bilong yumi ol i bin skelim skelim dispela tambu long no ken marit na ol i kisim save olsem, dispela tambu ol i kamapim long yia 1150 samting na tambuim ol pris long marit, em i as na misin i hatwok long kisim ol nupela pris na long pasim ol olpela pris na ol i no ken lusim misin.’ Saveman Richard A. Schoenherr i tok, ‘ol samting i bin kamap bipo na ol bikpela senis i wok long kamap long sindaun bilong ol man, dispela i mekim na ol man i ting i no stret long larim ol singel tasol i kamap pris long Misin Katolik.’ Baibel i tok wanem long pasin bilong stap singel na i no ken marit?
Marit o Stap Singel?
Kirap long bipo yet na i kam inap nau, planti planti man na meri bilong ol narapela narapela lotu, ol i bin stap singel na i no marit, long wanem, em laik bilong ol yet. Long wanem, planti i bilip olsem ol samting bilong skin i “as bilong pasin nogut tru.” Em nau, dispela i kamapim tingting olsem, man inap stap klin long ol samting bilong spirit sapos em i no mekim ol samting bilong maritpasin. Tasol dispela tingting i no stret wantaim tok bilong Baibel. Baibel i tok, marit em i wanpela presen i kam long God na i klin na holi. Buk Stat i stori long ol samting God i bin wokim na i kamapim klia olsem marit em i “gutpela” samting long ai bilong God na i no wanpela samting bilong pasim man long stap klin long ol samting bilong spirit na pas gut wantaim God.—Stat 1:26-28, 31; 2:18, 22-24; lukim tu Sindaun 5:15-19.
Aposel Pita na sampela gutpela wokboi moa em God i orait long ol, ol i gat namba long kongrigesen Kristen bilong pastaim na ol i man marit. (Matyu 8:14; Aposel 18:2; 21:8, 9; 1 Korin 9:5) Tok aposel Pol i givim long Timoti bilong makim ol man long kamap wasman bilong kongrigesen, o “bisop,” i kamapim klia dispela samting. Em i tok: “Wanpela bisop i mas bihainim ol stretpela pasin tasol, bai ol man i no inap lukim wanpela rong long em. Em i mas i stap man bilong wanpela meri.” (1 Timoti 3:2, Baibel bilong ol Katolik, Revised Standard Version) Em nau, i no gat wanpela tok i makim olsem i no stret sapos “wanpela bisop” i marit. Pol i tok olsem, “wanpela bisop” i no ken kisim planti meri; sapos em i marit, orait em i mas marit long wanpela meri tasol. Na wanpela buk (Cyclopedia of Biblical, Theological, and Ecclesiastical Literature, bilong McClintock na Strong) i tok: ‘I no gat wanpela tok long N[upela] T[estamen] ol inap mekim wok long en bilong tambuim ol pris pasto long marit.’
Baibel i litimapim marit, tasol Baibel i no tok, man i no ken stap singel sapos em laik bilong em yet. Baibel i tok, pasin bilong i stap singel i gutpela long sampela. (1 Korin 7:7, 8) Krais Jisas i tok, sampela man na meri i laik long stap singel. (Matyu 19:12) Bilong wanem? I no olsem marit i samting doti na dispela bai pasim ol long kamap strong long ol samting bilong spirit, nogat. Ol i laik stap singel inap long ol i ken tingting tasol long bihainim laik bilong God, long wanem, ol i bilip olsem taim i sot pinis.
Samting i Mekim na Ol i Tambuim Marit
Tasol inap sampela handet yia bihain long Krais ol samting i senis. David Rice, bipo em i wanpela pris Dominiken na em i lusim wok pris bambai em i ken marit. Em i tok, inap 300 handet yia bihain long taim bilong Krais “i gat ol marit na ol singel i mekim wok olsem pris pasto.” Bihain, ol man i tok ol i Kristen ol i larim sampela samting i pulim tingting bilong ol. Wanpela man bilong raitim ol tok bilong lotu i tok, “ol i bungim tingting bilong ol Grik wantaim tingting bilong Baibel” na ol i kisim tingting kranki long maritpasin na marit.
Tasol sampela i bin stap singel bambai ol “i ken stap fri olgeta long givim bel [bilong ol] long wok bilong kingdom bilong God.” Na sampela i kisim ol tingting haiden na dispela i kirapim ol long stap singel. Wanpela buk (The New Encyclopædia Britannica) i tok: “Wanpela bilip i bin kamap [long lotu i tok i Kristen], olsem maritpasin i samting doti na i no stret wantaim pasin holi, na dispela bilip i bikpela samting bilong kirapim ol long bihainim pasin bilong i stap singel na i no ken marit.”
Rice i tok, long yia 350 samting, misin i “tambuim pris i marit long mekim maritpasin long nait paslain long em bai mekim Komyunio.” Taim misin i kamapim Komyunio long olgeta de—nau ol pris marit i no inap tru long mekim maritpasin. Bihain, misin i tambuim ol pris long marit. Olsem na man i laik stap pris long misin, em i mas stap singel na i no ken marit.
Aposel Pol i toksave olsem dispela samting bai kamap. Em i tok: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol. Ol dispela man bai i tambuim ol manmeri long ol i no ken marit.”—1 Timoti 4:1, 3.
Krais Jisas i tok: “Ol wok bilong God i soim olsem save bilong en em i samting tru.” (Matyu 11:19) Pasin bilong lusim ol lo bilong God em pasin longlong na ol hevi i kamap long dispela pasin i kamapim klia dispela samting. David Rice em i givim sampela askim long planti pris long olgeta hap long dispela pasin olsem ol pris i mas stap tambu na i no ken marit. Sampela pris em i bin toktok wantaim ol i tok: ‘Pris i save stap insait long lain pris, na inap long skel bilong em, em i helpim ol man, na long pasin hait em i save slip wantaim ol meri i givim bel long lotu na i laikim em na ol i orait long mekim maritpasin.’
Rice i kamapim tok bilong Matyu 7:20 na em i tok: “Jisas i tok, ‘Yupela i mas lukim pasin bilong ol yet na bai yupela i save long ol.’ ” Na em i stori long ol bikpela hevi i bin kamap, long wanem, ol pris i mas stap singel na i no ken marit: “Ol samting i kamap long pasin bilong tambuim ol long marit i olsem: Planti tausen man i mekim stretpela pasin long ai bilong ol man, tasol ol i save hait na mekim sampela pasin nogut, na i stap bilong planti tausen meri i bagarap, na planti tausen pikinini i no gat papa, long wanem, papa bilong ol i pris na em i sakim ol, na tingting na bel bilong ol pris i bagarap.”
Marit tru tru em i wanpela gutpela samting i kam long God. Pasin bilong tambuim ol pris long marit i mekim na ol i bagarap long ol samting bilong spirit. Pasin bilong i stap singel i no wanpela pasin man i mas bihainim bilong i stap holi o bilong kisim laip, tasol sapos man yet i laik stap singel na “em inap,” em bai kisim ol gutpela samting long en na em bai amamas long i stap bilong em long ol samting bilong spirit.—Matyu 19:12.
[Piksa Kredit Lain long pes 26]
Life