Pas Bilong Ol Man
Gutpela Piksa Mi kaunim stori long Kirap! bilong Jun 8, 1998, nem bilong en “Ol Yangpela i Laik Save . . . Husat i Mas Stap Olsem Gutpela Piksa Mi Ken Bihainim?,” na mi tingim ol stori kain olsem dispela na ol i bin mekim wanem bilong helpim tru mi. Taim famili bilong mi i bruk, mi kirap long pas wantaim ol poroman i gat wankain krismas olsem mi. Tasol bihain mi kirap long tingim ol manmeri i bin helpim gut mi—em ol lapun sista Kristen. Nau mi kirap poromanim ol olsem Pol i bin poromanim Timoti na Rut i bin poromanim Naomi. Nambawan gutpela pren bilong mi em wanpela sista i gat 50 krismas, na em i bin skulim mi long pasin bilong amamas, pasin bilong laikim ol narapela, pasin sori, gutpela pasin, na pasin bilong givim ol samting long narapela. Mitupela i wok wantaim na slip long wanpela haus na mipela i kirap pinis long mekim wok painia wantaim. Tenkyu tru long ol gutpela tok yupela i bin kamapim bilong stiaim tingting bilong mi.
C. F., long Amerika
Pasin Bilong i Stap Rabis Bai Pinis Tenkyu tru long ol stori “Klostu Nau Pasin Bilong i Stap Rabis Bai Pinis,” long Kirap! bilong Jun 8, 1998. Em i helpim mi long kisim stretpela tingting na i helpim mi long save long pasin bilong mi yet long toktok planti. Mi no gat wok mani na mi gat liklik hap mani tasol. Mi ting mi stap rabis. Tasol nogat! Dispela stori i kamapim klia olsem i gat sampela man ol i stap rabis olgeta, winim mi. Mi mas amamas long ol samting mi kisim pinis—kaikai, klos, skin i no gat sik, na bikpela samting tru—em Jehova. Mi wetim tru dispela taim pasin bilong i stap rabis bai pinis. Mi tingting strong long wok yet long painim Kingdom pastaim na lusim pasin bilong toktok planti.
C. W., long Nu Silan
Stap Singel Inap sampela yia pinis mi save kaunim ol nius bilong yupela. Mi no wanbel long wanpela tok yupela i kamapim long bilip bilong Misin Katolik long stori “Baibel i Tok Wanem? Stap Singel Em Wanpela Pasin Ol Wokman Kristen i Mas Bihainim?” (Jun 8, 1998) Misin Katolik i no tambuim ol pris long marit! Em laik bilong ol yet tasol long stap singel bambai ol inap mekim gut wanpela kain wok. Man i tok misin i subim em long stap singel na i no ken marit, em i tok giaman.
R. G., long Jemani
Mipela i ting i gat narapela narapela insait bilong dispela tok olsem, tambu long marit, na dispela tingting olsem ol i subim ol pris long i stap singel. Yumi ken tok piksa olsem: Sapos wanpela kampani i putim lo olsem ol wokman i mas pasim yunifom tasol, na kampani i kisim tasol ol wokman i laik bihainim dispela lo, na ol man i brukim dispela lo kampani i rausim ol, orait yumi ken tok kampani i subim ol man long bihainim lo bilong pasim yunifom. Em i wankain tasol long lain pris Katolik. I stret yumi tok misin i tambuim ol pris long marit. Tasol bikpela tok long stori bilong mipela i kamapim klia olsem Baibel i no tok olsem ol man i mas stap singel bambai ol ken kamap wanpela wokman Kristen. (1 Timoti 3:2) Dispela stori i no daunim man i laik stap singel oltaim, nogat; stori i tok, man i laik stap singel em “bai kisim ol gutpela samting long en na em bai amamas long i stap bilong em long ol samting bilong spirit.”—Edita.
Mi Makim Wanpela Bilong Tupela Papa Mi kisim save long tok i tru bilong God long rot bilong wanpela pren long skul taim mi gat 14 krismas. Papamama bilong mi i no laik mi stadi long Baibel, na papa i birua tru long mi. Gutpela tru, em i no truim tok bilong em long rausim mi long haus. Mi stap strong na kisim baptais inap 5-pela yia i go pinis. Olsem brata long dispela stori (Jun 8, 1998), mi laik bai papamama bilong mi tu i ken kisim wankain bilip olsem bilip bilong mi, em long i stap long nupela taim Jehova bai kamapim i gat stretpela pasin long en.
W. S. L., long Brasil
Aiwara i kamap long ai bilong mi taim mi kaunim dispela stori. Papa bilong mi i save strong tru long tok pait long ol bilip bilong mi. Maski sampela taim mipela i toktok gut wantaim, sapos wanpela tok bilong Baibel o long ol Witnes Bilong Jehova i kamap, mi save pret long belhat bilong em. Em i bin paitim mi sampela taim. Tasol dispela stori i strongim mi long sanap strong, maski kain hevi olsem i kamap.
I. H., long Jemani
Mi pilim tru dispela stori. Mi go bikpela insait long wanpela famili i no stap wanbel long lotu, na mi inap pilim bel hevi bilong dispela yangpela man long em i mas mekim wanpela samting em i hatwok long mekim.
A. M., long Itali