“Yupela i Stori Long Samting i Kamap Long Mi!”
Inap planti yia, Kirap! i bin kamapim stori bilong planti kain kain sik. Tru, Kirap! i no wanpela nius bilong helt, olsem na em i no strongim wanpela rot bilong stretim sik na daunim narapela. Tasol taim em i stori long wanpela sik, dispela nius i laik stori gut long dispela sik, na wanem ol samting i save kamapim dispela sik, na em i kamapim ol gutpela tok na tok bilong Baibel bilong helpim ol sikman na ol man i lukautim ol.
Stori “Understanding and Living With Fibromyalgia” long Kirap! (tok Inglis) bilong Jun 8, 1998, i bin kirapim planti man long olgeta hap bilong graun long mekim sampela tok. Tru tumas, inap planti mun bihain long dispela stori i kamap, planti man i salim pas bilong tok tenkyu long dispela stori. Wanpela meri i tok: “Mi pilim olsem ol i rausim wanpela maunten i bin stap antap long mi.” Narapela meri i tok: “I olsem yupela i stori long samting i kamap long mi!” Na em i tok moa, “nau mi save olsem wanem mi inap karim hevi bilong dispela sik.”
Ol saveman tu i bin amamas long dispela stori. Namba tu presiden bilong wanpela lain (Arthritis Foundation) i skelim ol sik samting long Amerika, em i tok: “Mi ting dispela stori long sik faibromaialjia i kamapim ol tok long stretpela pasin, na i stori gut long olgeta samting bilong sik, na i gutpela stori. Mi amamas tu long ol tok bilong Baibel yupela i kamapim, na long yupela i soim olsem bilip i bikpela samting long ol man i gat dispela sik o sampela narapela sik.”
Mipela i kisim planti narapela pas tu. Ol tok i stap daunbilo i kam long ol dispela pas mipela i kisim.
“Dokta bilong mi i bin kirapim mi long kaunim olgeta buk samting mi inap painim i stori long dispela sik. Stori bilong yupela i winim olgeta narapela stori mi bin kaunim.”—L. R.
‘Planti manmeri i bin askim mi long ol samting bilong sik bilong mi. Planti taim mi save givim wanpela liklik nius long ol. Nau mi inap tokim ol long kaunim dispela stori bilong Kirap! I no gat narapela samting inap mekim gut bel bilong mi olsem ol tok bilong dispela stori!’—K. K.
‘Dispela stori i helpim mi long save olsem ol samting mi mekim i no lus nating na Jehova i save tingim mi tru.’—D. C.
“Mi pilim olsem em namba wan taim ol narapela i kisim stretpela save long hevi bilong mi.”—C. H.
‘Taim yumi save olsem ol narapela tu i karim wankain hevi olsem yumi, dispela i save mekim gut bel bilong yumi.’—C. A.
‘Mi bel hevi tru long mi no inap mekim ol samting mi bin mekim long bipo. Bai mi putim dispela nius klostu long bet bilong mi, na bai mi inap kaunim gen long taim mi mas kisim samting bilong strongim bel bilong mi.’—K. B.
‘I kam inap long nau, mi no save tingting long pen mi save kisim, na mi save mekim planti wok, na bihain mi pundaun. Ol tok yupela i kamapim i soim gutpela rot moa mi ken bihainim.’—M. C.
“Nau mi gat 14-pela krismas, na long taim mi gat 12-pela krismas ol i painimaut olsem mi gat sik faibromaialjia. Mi krai taim mi tingim olsem Jehova i save tingim tru yumi. Plis, raitim yet ol gutpela stori olsem bilong strongim bel bilong mipela!”—K. A. M.