Sampela Tok i Kam Long Olgeta Hap
Stap Fri Long Lotu Long Kantri Grik
Wanpela nius (To Vima) bilong Atens i tok: “Gavman bilong kantri Grik i tingting long pasin bilong i stap fri long lotu—i stret olgeta man i ken stap fri long lotu o nogat, na gavman i skelim dispela wantaim konstitusen bilong kantri ol i no bin senisim yet. Wanpela komiti i stap aninit long wanpela dipatmen bilong gavman (Ministry of Foreign Affairs), em i skelim gen ol lo long pasin bilong stap fri long lotu, na ol lo bilong dikteta Metaxa i bin tambuim ol man long autim bilip bilong ol long narapela man, na ol samting ol liklik lotu i narapela kain long lotu Otodoks ol i mas mekim bilong wokim haus lotu na ples bung bilong ol.” Dispela nius i tok moa olsem, gavman i kirap mekim dispela wok, long wanem, ol Witnes Bilong Jehova long kantri Grik i bringim tok bilong ol i go planti taim long Yuropian Kot ov Human Raits.
Ol i Mekim Wok Yet Long Tok Latin
Tok Latin i stap yet olsem tok ples bilong Vatiken Siti, maski kirap long 1963 samting ol pris i no bin mekim wok moa long en taim ol i mekim ol pasin bilong lotu Katolik. Ol saveman i tanim ol pepa bilong pop na bilong lotu i go long tok Latin, tasol wan wan taim tasol ol man i mekim wok long tok Latin long Vatiken yet. Tasol long Novemba 1997, pop i tok, namba bilong ol man i save toktok long tok Latin i go daun, na em i kirapim ol man long mekim wok gen long en. Inap 8-pela yia, wanpela lain saveman bilong Vatiken ol i bin wokim wanpela dikseneri bilong tok Latin bilong nau. Ol i tanim long tok Latin sampela tok bilong nau olsem, ‘marasin spre,’ ‘ples balus,’ ‘supamaket,’ ‘teksi,’ na ‘planti ka i pas pas long rot.’ Long planti hap i gat telefon i no gat waia, na long tok Latin ol i kolim dispela kain telefon olsem telephonium cellulare. Ol man i laikim tok Latin ol bai amamas long save olsem, wanpela nius (The Times) bilong Landon i tok, wanpela pris long Rom i kamapim wanpela program long kompyuta Intenet i givim save long tok Latin.
Namba Tu Bilong Ol Piksa Tru Tru
Taim yia 2000 i kamap, ol piksa ol i bin sapim na ol i sanap long ol pak bilong Rom bai ol i no piksa tru tru, nogat; ol bai namba tu bilong en tasol. Bilong wanem em i olsem? Carla Benocci, em i bilong wanpela lain i skelim ol samting bilong bipo, em i tok: “I no gat narapela rot long lukautim ol piksa bambai ol i no bagarap olgeta, olsem na yumi mas wokim namba tu bilong ol.” Em i tok moa olsem, sampela bilong ol dispela piksa ol i bin sapim ol ‘i bagarap, long wanem, ol i bin stap longpela taim, o smok nogut bilong ka i bagarapim ol, o sampela man i brukim ol, o sampela i stilim bilong salim long ol man bilong baim.’ Ol man i mekim traim bilong save, ol i ken wokim namba tu bilong ol piksa long wanem samting bambai ol i wankain olsem ol piksa tru tru, na smok nogut na ol man i no inap brukim na bagarapim. Ol i wokim namba tu bilong sampela piksa long wanpela kain strongpela plastik, na sampela ol i wokim long simen na ol i penim das bilong ston mabel long ol. Benocci i tok: “Ol i wankain stret olsem ol piksa tru tru, olsem na ol stilman i ting ol i piksa tru tru na ol i katim na rausim het bilong wanpela bilong stilim na ol i traim kisim wanpela narapela piksa olgeta.” Na olsem wanem long ol piksa tru tru? Ol bai stap long ol haus tumbuna bambai ol man inap i go lukim ol, tasol ol i no inap bagarapim ol.
Ol Pikinini i Sot Long Kaikai Ol i Dai
Wanpela nius (Le Monde) bilong Frans i tok: “Namba bilong ol pikinini i dai, long wanem, ol i sot long gutpela kaikai, i winim namba bilong ol pikinini i dai long bikpela sik, o long bikpela win ren samting, o long pait. Ol man i tok, long olgeta yia klostu 7 milion pikinini i dai, long wanem, ol i sot long gutpela kaikai. Ripot bilong UNICEF (United Nations Children’s Fund) long 1997 i tok, long olgeta yia inap 12 milion pikinini i no kisim yet 5-pela krismas ol i dai, na 55 pesen bilong ol i dai, long wanem, ol i sot long gutpela kaikai. Dispela samting i no save bagarapim tasol ol pikinini, nogat; sot long gutpela kaikai i as na skin na tingting bilong planti pikinini i bagarap, na skin bilong ol i no gat strong long sakim ol sik. Long Saut Esia, long olgeta 2-pela 2-pela pikinini wanpela i sot long gutpela kaikai, na long Afrika, long olgeta 3-pela 3-pela pikinini wanpela i sot long gutpela kaikai. Tasol dispela hevi i stap long ol kantri i gat planti wok bisnis tu. Olsem: Lain UNICEF i tok, long Yunaitet Stets, long olgeta 4-pela 4-pela pikinini i no kisim yet 12-pela krismas, wanpela i sot long kisim kaikai em inap strongim skin bilong em.
Was Gut Long Marasin Bilong Kilim Pen
Wanpela nius (Health) i tok: “Man i dring planti marasin bilong kilim pen na i gat marasin acetaminophen insait long en, olsem marasin Tylenol, Excedrin, na planti marasin moa ol man inap baim nating long haus marasin, dispela inap bagarapim lewa bilong em. Na sapos em i dring bia samting wantaim dispela marasin, bikpela sik bai painim em,” na em inap i dai. Wanpela saveman bilong marasin long wanpela Yunivesiti (University of Texas Southwestern Medical Center), em William Lee i tok: “Planti man i ting, maski long bihainim stret toksave bilong marasin na ol i winim skel bilong marasin inap 2-pela o 3-pela taim na ol i ting dispela i no inap nogutim ol. Tasol dispela marasin acetaminophen em inap nogutim ol.” Taim bel i wok long brukbrukim marasin acetaminophen, dispela marasin yet i kamapim wanpela marasin i save bagarapim lewa. Lewa i save kamapim wanpela marasin glutathione i save daunim strong bilong dispela marasin nogut, na long dispela rot lewa i no bagarap. Tasol sapos man i dringim planti tumas marasin i gat marasin acetaminophen insait long en, dispela inap daunim strong bilong lewa long lukautim em yet. Bia samting i save pinisim marasin glutathione i stap insait long lewa, olsem na bikpela sik inap kamap sapos man i dringim marasin bilong kilim pen bihain long em i bin kisim bia samting. Na marasin acetaminophen i stap insait long 300 narapela narapela marasin bilong kilim pen, olsem na man i dringim marasin bilong kilim pen em inap winim skel bilong marasin acetaminophen na em i no save em i mekim olsem.
Ol Pikinini i Skul Long Pasim Man Long Stilim Ol
Ol pikinini long Taiwan i skul long nupela samting—ol i lain long mekim ol samting bilong pasim man long stilim ol. Wanpela nius (Asiaweek) i tok: ‘Namba wan kantri ol man i save stilim planti pikinini em Filipin, na namba tu em Taiwan. Long olgeta 2-pela 2-pela de ol man i stilim wanpela pikinini long Taiwan.’ Pasin nogut i wok long go bikpela, na ol papamama i tingting planti, nogut ol man i stilim pikinini bilong ol, olsem na ol i askim skul long mekim dispela kain kos. Dispela kos i lainim ol pikinini long was gut taim ol i stap wanpis na wokabaut, na taim ol i laik i go insait long lift, na taim ol i raun long PMV samting. Ol i lain long was gut long man ol i gat tupela tingting long em, na ol i ken mekim wanem sapos man i stilim ol. Maski dispela kos i stori long samting nogut, ol tisa i wok strong long helpim ol pikinini long tingting gut long i stap bilong ol.
Ol i No Pinis Olgeta
Ol man i bin ting wanpela kain tarangau bilong nait i pinis olgeta, long wanem, ol i no bin lukim wanpela bilong dispela kain tarangau inap long 113 yia. Tasol nau ol man i bin lukim na kisim piksa long en long wanpela bus klostu long Sahada, India, long hap not-is bilong Mumbai. Longpela bilong dispela braunpela pisin i olsem 20 sentimita na ai bilong en i bikpela, na nus, lek, na han bilong en tu i bikpela. Pamela Rasmussen, em i wok long wanpela haus tumbuna long Wosington (National Museum of Natural History), na em wantaim tupela wanwok i kisim ol dispela piksa. Rasmussen i tok: ‘Dispela em i wanpela pisin bilong India ol man i no save gut long en. Ating mipela i no inap lukim na kisim piksa bilong dispela pisin long narapela taim.’ I gat tupela narapela kain pisin bilong India ol man i no save gut long en olsem ol i pinis olgeta o nogat. Wanpela em wanpela kain pato, het bilong en i retpela liklik, na laspela taim ol man i bin lukim dispela pato em long 1933 samting, na narapela em ol pisin bilong maunten (Himalayan mountain quail). Ol man i no bin lukim ol inap long 100 yia.
Wanpela Drak i No Gat Bikpela Kik Long En
Inap planti handet yia ol man i bin litimapim nem bilong sokolat i save kirapim skin bilong man, na daunim bel hevi, na kirapim laik bilong skin long mekim maritpasin. Wanpela nius (Le Monde) bilong Frans i stori olsem, save ol man i kisim long nau i makim olsem tru tumas, sokolat i mekim na ‘man i no tingting planti tumas, na em i stap bel isi, na em i gat laik long ol samting bilong maritpasin.’ Ol saveman i kisim save olsem sokolat i gat marasin i wankain liklik olsem marasin ol i kolim amfetamin i save mekim man i spak, na narapela marasin ‘i save daunim bel hevi bilong man.’ Na nupela save ol saveman i kisim i kamapim klia olsem, sokolat i gat wanpela marasin (anandamide) i save mekim wankain samting olsem drak kanabis i mekim, olsem bel i ‘kirap nating long amamas.’ Sokolat inap mekim ol dispela samting, tasol marasin nogut insait long en i liklik, olsem na dispela nius i tok: ‘Sokolat i save kirapim skin na tingting bilong man long mekim wok, na givim strong long em na mekim em i amamas, tasol sokolat i no save nogutim skin bilong man, nogat; na man i no kalabus tumas long en, olsem na sokolat em i wanpela drak i save wok isi long skin na i no gat bikpela kik long en.’