Sampela Tok i Kam Long Olgeta Hap
Planti Sik Moa Long Olgeta Hap
Dokta David Heymann bilong Wol Helt Oganaisesen, em i tok: “Maski yumi stap klostu long yia 2000, ol sik i go bikpela na i kisim planti manmeri moa na inap 33 pesen bilong ol man i save dai long olgeta hap, ol i dai long ol dispela sik.” Sampela samting i as bilong ol dispela sik. Wanpela nius (The Journal of the American Medical Association) i tok, ol man i kamap planti tumas, wok bilong givim marasin sut long ol man i pundaun, ol man i no gat gutpela sindaun—ol i pas pas, sampela senis i bin kamap long graun na win na wara, na long olgeta hap ol wok bilong helpim ol sikman i laik bagarap—ol dispela samting i bin mekim na ol sik i go bikpela na kisim planti manmeri moa. Sampela samting moa i olsem: Ol man i mas lusim as ples na i go sindaun long ol narapela hap, ol refyuji, na planti man moa i raun long ol kantri olsem turis—ol dispela samting tu i mekim na ol sik i go bikpela long olgeta hap. Dokta Heymann i tok: “I no gat as tru na ol sik i go bikpela, long wanem, ol samting i stap bilong helpim ol man long abrusim ol dispela sik o pinisim olgeta.”
Ol Momon na Wok Politik
Nius Christian Century i tok, lotu Momon (The Church of Jesus Christ of Latter-day Saints) i bin kirapim lain bilong en long Yunaitet Stets long mekim sampela samting moa bilong insait long wok politik. I no longtaim i go pinis na nambawan kaunsil bilong lotu i raitim wanpela pas. Dispela pas i kirapim ol Momon long ‘redi long mekim wok olsem komiti bilong ol skul, na wok kaunsil long ol biktaun na distrik, na wok kot samting bilong gavman, na ol narapela wok i gat namba, maski ol man i vot long ol o ol i makim ol bilong holim dispela wok. Na ol i mas redi long mekim wok bilong helpim lain politik ol i save laikim.’ Pas i tok, misin yet i no save tokaut long wanpela lain politik o wanpela man ol i laik eleksen na makim em long holim wanpela wok, nogat. Nius i tok, taim lotu Momon i nupela, “ol Momon i abrusim ol wok politik na misin i bin wok long kamapim wok bilong bosim lain bilong ol yet, olsem wanpela liklik gavman bilong ol yet, long hap nau yumi kolim Uta.”
Hevi i As na i Gat Planti Bagarap Moa Long Ka
Wanpela lain long Jemani (Professional Association for Health Service and Social Welfare) i tok, tingting bilong man long wok bilong em i bikpela samting bilong bosim pasin bilong em long draivim ka. Wanpela nius (Süddeutsche Zeitung) i tok, sapos wok i mekim na tingting na bel bilong man i no stap isi, dispela man inap kamapim bagarap long rot. Nius i tok moa: “Sapos man i tingting nogut long bos o long ol wanwok bilong em na i holim dispela insait long bel bilong em, dispela inap mekim na em i no putim gut tingting long pasin bilong em long draivim ka.” Ripot bilong dispela lain i skelim hevi i tok, inap 75 pesen bilong ol man em ol yet i as bilong bagarap i kamap long rot taim ol i go o kam long ples wok, ol i tok asua bilong dispela i olsem: “Ol i no putim gut tingting long rot, o ol i hariap tumas long go i kam, o oltaim ol i mas kamap long wok long taim stret, o tingting na bel bilong ol i no stap isi.” Ripot i tok, planti man em tingting na bel bilong ol i no stap isi ol bai bam long narapela ka, tasol ol i kisim save tu olsem wankain samting i painim planti mama i gat ol liklik pikinini, winim ol man. Nius i tok: ‘Hevi bilong ol dispela mama i bikpela moa, long wanem, ol i mas kamap long taim stret bilong kisim pikinini bilong ol long pilai-skul o kukim kaikai long belo.’
Planti Pikinini i Driman Nogut
Klostu olgeta pikinini i save kisim driman i pretim ol. Wanpela lain (Central Institute for Mental Health) long Manhaim, Jemani, ol i tok, long olgeta 10-pela 10-pela pikinini, 9-pela i tok, taim ol i slip ol driman i bin kirapim ol. Planti driman ol pikinini i save kisim i olsem: Wanpela i raunim ol, o ol i stap long ples antap na ol i pundaun longwe, o pait o bagarap olsem guria samting i bagarapim ol. Planti driman olsem em hap tingting giaman na hap tingting long ol samting i bin kamap tru. Planti manki i no inap tingim bek samting ol i bin driman long en. Tasol ol pikinini meri i save toktok planti taim long driman bilong ol o ol i raitim stori long en. Wanpela nius (Berliner Zeitung) i kamapim tok bilong ol saveman i tok, bilong helpim ol pikinini na ol i no ken tingting planti long ol driman, em i gutpela sapos ol pikinini i stori long ol samting i bin kamap long driman, o wokim piksa bilong en, o mekim wanpela pilai i makim samting i bin kamap long driman. Sapos ol pikinini i bihainim ol dispela toksave, insait long sampela wik ol i no ken driman planti na ol i no ken pret long ol driman.
Ol Dokta i Kalabus Long Drak
Nius The Medical Post bilong Kanada i kamapim tok bilong wanpela lain bilong ol dokta long Briten, ol i tok, “long olgeta 15 dokta, wanpela i kalabus long dring o drak.” Bilong winim dispela hevi, sampela bikpela lain bilong ol dokta long Briten, ol i laik kirapim wanpela wok bilong makim nating sampela dokta bambai ol i ken glasim skin bilong ol bilong save husat dokta i mekim nabaut long dring o ol drak. Ol i ting, winim 9,000 dokta long Briten, em ol man na meri wantaim, ol i mekim nabaut long dring o ol narapela drak. Nius i tok, sampela dokta “i no kisim helpim, long wanem, ol i no save long wanem ol lain i stap bilong helpim ol.”
Hatim Gen Kaikai i No Save Kilim Ol Marasin Nogut
Wanpela nius (Tufts University Health & Nutrition Letter) i tok, abus i tan na i stap ausait long bokis ais inap 2-pela aua samting, yumi no ken kaikai. Tasol olsem wanem? Sapos yumi kukim gen dispela abus, dispela bai kilim ol marasin nogut insait long en o nogat? Dispela nius i tok: “Sapos yu hatim gen abus i no bin stap insait long bokis ais, dispela inap kilim ol jem i save kamap long skin bilong abus, tasol em i no inap pinisim ol marasin nogut bilong kamapim sik em sampela kain jem i as bilong en.” Wanpela marasin nogut i save kamap long binatang jem ol i kolim stafilokokas, em inap kamapim pen long bel, pekpek wara, bel i tanim na i laik traut, skin i guria na i kol, fiva, na het pen. “Na maski yu hatim tru kaikai, dispela i no inap pinisim dispela kain marasin nogut.”
Lukim Televisen Planti Taim
Wanpela lain (Audiovisual Media Institute of Greece) i skelim pasin bilong ol man long kantri Grik long lukim televisen na ol i kisim save olsem: Long dispela kantri i gat 3.5 milion famili na 3.8 milion televisen; na long olgeta 3-pela 3-pela famili, wanpela i gat video. Wanpela nius bilong Atens (To Vima) i tok, long 1996 ol Grik i bin lukim televisen inap 4-pela aua long olgeta de, tasol long 1990 ol i no bin lukim planti taim—inap 2-pela aua samting long olgeta de. Em nau, planti man i no kaunim buk moa. Na sampela save moa dispela lain i kisim i olsem: Long 1989, olgeta wan wan man long kantri Grik i bin kaunim 42 niuspepa, tasol long 1995 nogat ol i kaunim 28 niuspepa tasol. Na long ol dispela yia, namba bilong ol Grik i kaunim ol nius, em i go daun inap 10 pesen.
“Diwai Laki”
Nius South China Morning Post i tok, sampela man bilong ples klostu long Bankok, Tailan, ol i kros na ol i tok ol bai mekim nogut long ol man i wok bisnis long kisim mani long ol man i putim bet, long wanem, ol i ting ol dispela man i traim long kukim “diwai laki” bilong ol. Dispela “diwai laki” i gat nem long olgeta hap bilong kantri olsem wanpela diwai i givim toksave long pasin bilong win long laki, olsem na ol man bilong ples i no amamas taim ol i kisim save olsem wanpela man i traim long kukim diwai. Wanpela meri (Dongmalee) i tok: “Mi belhat stret. Dispela diwai i bin helpim mi yet long winim mani na long kisim winmani long ol man mi helpim ol long save long rot bilong kisim toksave long diwai.” Ol i tok, kirap long dispela taim ol i laik bagarapim diwai, wanpela spirit i stap long en, em i bel nogut. Na ol man bilong ples i tok, nau spirit i no givim toksave bilong laki long diwai. Nius i tok, ol man bilong ples i laik bringim ol bruder bilong lotu Buda i kam long diwai bilong kirapim spirit bilong diwai long kirap gen long givim toksave bilong laki long diwai.
Ol De Bilong Amamas Long Brasil
Wanpela nius (Nando.net) i tok: “Ol de bilong amamas i mekim na Rio de Janero i gat nem, tasol nau planti man moa long Brasil i les long en.” Planti man long olgeta hap, ol i ting ol lain bilong Brasil i wetim ol dispela de bilong amamas i save kamap long olgeta yia. Tasol wanpela lain (Brazil’s Institute for Social Research) i kamapim klia olsem, dispela tingting i no stret. Dispela lain i kisim save olsem, inap 63 pesen bilong ol man bilong Brasil ol i no insait long ol dispela de bilong amamas, na inap 44 pesen bilong ol man i tok “ol i les” long dispela samting, na inap 19 pesen bilong ol man i tok, ol i “nolaik tru long ol dispela de bilong amamas.” Nius Jornal do Brasil i tok, long dispela yia, nambawan televisen-stesin bilong kantri i no bin kamapim piksa long wanpela kain danis ol Brasil i save mekim long dispela taim na ol i danis bilong kisim prais. Tasol planti tausen turis i save go long Brasil bilong lukim ol dispela de bilong amamas. Na long Brasil, planti manmeri moa yet i gat sik AIDS, olsem na long ol dispela de bilong amamas wanpela lain (Health Ministry) i bin tilim nating planti milion kondom long ol man.
Ol Lapun i Sot Long Gutpela Kaikai
Wanpela nius bilong Frankfet, Jemani (Nassauische Neue Presse), i tok: “Ol lapun i no save kaikai planti, olsem na planti bilong ol i kisim sik.” Wanpela lain i tok olsem taim ol i glasim pinis 2,500 man na meri i winim 70 krismas, em ol i stap long 10-pela kantri long Yurop. Planti man i ting skin bilong ol lapun i no gat wok long kisim planti kaikai, tasol sapos ol i no kisim planti kalori i stap insait long kaikai, dispela inap mekim na skin bilong ol i no gat strong long sakim sik. Tasol planti kaikai bilong ol lapun i no gutpela tumas, long wanem, ol i save kukim bikpela hap kaikai na larim hap i stap inap long ol i ken kaikai long ol narapela de. Na tu, planti lapun i no save kaikai planti prut na kumu samting, na ol i bihainim moa yet dispela pasin sapos i no taim bilong ol dispela samting. Dispela lain i tok, i gutpela sapos ol dokta i tokim ol lapun long “kaikai gut na kaikai long olgeta taim.” Na ol i tok, em i gutpela sapos ol i helpim ol lapun long kisim sampela eksasais moa, long wanem, eksasais bai kirapim laik bilong skin long kaikai.