Baibel i Tok Wanem?
Yu Ting Ol Driman i Kam Long God?
OL MAN i tok olsem saveman Elias Howe i kisim save long wokim masin bilong samap long rot bilong wanpela driman. Man bilong raitim musik, em Mozart, i tok em i kisim ol bikpela tok bilong ol musik em i raitim long rot bilong ol driman. Saveman Friedrich August Kekule von Stradonitz i tok, em i kisim save long samting bilong molekul i stap long bensin long rot bilong wanpela driman. I gat planti kain stori olsem. Kirap long bipo yet na i kam inap long nau, planti lain i ting ol strongpela spirit i as bilong ol driman. Sampela lain i ting olsem ol samting yumi driman long en i tru, wankain olsem ol samting i painim yumi taim yumi no slip.
Baibel i gat planti stori i kamapim olsem ol driman em i wanpela bikpela rot bilong kisim ol tok—wanpela rot bilong God long toktok wantaim ol man. (Hetman 7:13, 14; 1 King 3:5) Olsem: God i bin toktok wantaim Abraham, Jekop, na Josep long rot bilong ol driman. (Stat 28:10-19; 31:10-13; 37:5-11) God i givim ol driman long King Nebukatnesar bilong Babilon bilong kamapim tok profet. (Daniel 2:1, 28-45) Olsem na yu ting i gat as na yumi ken ting olsem long nau tu God i save givim ol toksave long rot bilong ol driman?
Ol Driman God i Kamapim
Long Baibel, i gat as na God i kamapim ol driman. Tru, sampela taim man i kisim driman i no inap save kwik long mining bilong en. Planti taim Man bilong “kamapim as bilong ol samting i hait” em yet i save kamapim as bilong ol driman bambai ol man i ken save long mining bilong en. (Daniel 2:28, 29; Amos 3:7) Ol driman God i givim i gat as bilong ol na i no wankain olsem ol driman nating ol man i save kisim.
Sampela taim God i save yusim ol driman bilong lukautim ol man em ol i gat bikpela wok bilong kamapim laik bilong em. I no olgeta man i kisim ol kain driman olsem ol i wokman bilong God. Olsem: Herot i laik kilim i dai Jisas na em i tokim ol saveman i go lukim pikinini Jisas long ol i mas i go bek lukim Herot, tasol ol i no go bek. Bilong wanem ol i no mekim olsem? Long wanem, ol i kisim wanpela tok lukaut long rot bilong driman. (Matyu 2:7-12) Olsem na Josep em waspapa bilong Jisas, em i gat taim long bihainim ol tok em i kisim long rot bilong driman, na ranawe i go long Isip wantaim famili bilong em. Long dispela rot pikinini Jisas i abrusim bagarap.—Matyu 2:13-15.
Sampela handet yia paslain, wanpela king bilong Isip i driman long 7-pela bikpela het bilong rais na 7-pela patpela bulmakau, na bihain em i driman long 7-pela het bilong rais i liklik tru na 7-pela bulmakau i bun nating. God i helpim Josep long kamapim stret mining bilong ol dispela driman: Inap 7-pela yia Isip bai gat planti kaikai tru, na bihain bai gat 7-pela yia bilong bikpela hangre. Ol i kisim save long dispela bikpela hangre paslain long em i kamap, olsem na ol Isip inap redi na bungim kaikai long ol bakstua. Long dispela rot, ol lain tumbuna bilong Abraham i abrusim bagarap na ol i go sindaun long Isip.—Stat, sapta 41; 45:5-8.
King bilong Babilon, Nebukatnesar, em tu i bin kisim wanpela driman. Dispela driman i tok profet long ol bikpela gavman bilong graun bai kamap na pundaun, na dispela bai mekim sampela samting long ol manmeri bilong God. (Daniel 2:31-43) Bihain, em i kisim narapela driman i tok profet long em bai kamap longlong na bihain em bai orait gen. Dispela driman i olsem tok profet i gat bikpela truim bilong en, na i makim Kingdom bilong God long han bilong Krais bai kamap, na long rot bilong dispela Kingdom God bai kamapim laik bilong em.—Daniel 4:10-37.
Olsem Wanem Long Ol Driman Long Nau?
Yes, God i bin toktok wantaim sampela man long rot bilong ol driman. Tasol Baibel i kamapim olsem dispela samting i bin kamap wan wan taim tasol. Ol driman i no nambawan rot bilong God long toktok wantaim ol man. Planti gutpela wokman bilong God ol i no bin kisim sampela tok i kam long God long rot bilong ol driman. Yumi ken tok olsem pasin bilong God long yusim ol driman bilong toktok wantaim ol man i wankain olsem samting em i mekim bilong brukim solwara Retsi long tupela hap. Yumi save olsem em i bin mekim olsem inap wanpela taim tasol, tasol em i no save mekim olsem long olgeta taim long ol lain bilong em.—Kisim Bek 14:21.
Aposel Pol i tokaut olsem long taim bilong em spirit bilong God i stap long ol wokman bilong em na ol i mekim planti narakain samting. Pol i tok: ‘Long wanpela man spirit holi i givim strong bilong autim gutpela tingting long ol arapela. Na long narapela man dispela wanpela spirit tasol i givim strong bilong autim sampela kain save bilong God long ol manmeri. Na narapela man i kisim strongpela bilip long dispela wanpela spirit tasol. Na long dispela wanpela spirit tasol narapela i kisim strong bilong mekim orait ol sikman. Na narapela i kisim strong bilong wokim mirakel. Na narapela i kisim strong bilong autim tok profet. Na narapela i kisim save bilong skelim ol kain kain spirit. Na narapela i kisim save bilong mekim tok long kain kain tok ples. Na narapela i kisim save bilong tanim ol dispela tok ples.’ (1 Korin 12:8-10) Tru, ol i no mekim sampela tok long ol driman God i givim long ol Kristen, tasol yumi ken ting olsem sampela Kristen i bin kisim ol driman i kam long God, olsem wanpela presen i truim tok bilong Joel 2:28.—Aposel 16:9, 10.
Tasol aposel Pol i tok long ol dispela gutpela presen olsem: “Wok bilong autim tok bilong God olsem profet, em bai i pinis. Na ol kain kain tok ples bai i pinis. Na olgeta kain save bilong ol man, em tu bai i pinis.” (1 Korin 13:8) Olsem na yumi ken save olsem sampela rot God i save yusim bilong toktok wantaim ol man ol tu “bai i pinis.” Taim ol aposel i dai pinis, God i no givim moa ol dispela narapela kain gutpela presen long ol wokman bilong em.
Long nau, ol saveman i wok yet long traim long kisim save long ol samting bilong pasin bilong driman, na tu, ol i laik save ol driman inap helpim yumi o nogat. Baibel i no stori long dispela samting. Tasol Baibel i givim wanpela tok lukaut long ol man i laik kisim ol tok i kam long God long rot bilong ol driman. Long Sekaraia 10:2, Baibel i tok: “Sampela man i save autim as bilong driman, na ol tu i giamanim yupela.” God i givim tok lukaut tu long pasin bilong glasman. (Lo 18:10-12) Ol Kristen long nau i tingim ol dispela tok na ol i save olsem God i no inap givim tok long ol long rot bilong ol driman. Tasol ol i save olsem ol driman i wanpela samting i save kamap taim man i slip.