Yumi Mas Driman
YU SAVE driman? Ating yu save driman, long wanem, yumi olgeta i save driman long taim yumi slip—maski yu tok olsem yu no save driman. Ol i tok inap olsem 95 pesen bilong ol driman i save lus long tingting bilong yumi. Yu save tingim wanem ol driman bilong yu? Yumi save tingim ol driman i kamap klostu long taim yumi kirap.
Ol man bilong skelim ol driman i bin kisim save olsem slip i gat narapela narapela hap bilong en; yumi save slip strong long ol namba wan aua bilong slip, na bihain isi isi i go yumi no wok long slip strong moa. Yumi save driman long ol hap taim bilong slip em ai i wok, ol i kolim dispela hap taim olsem slip REM. Dispela hap slip i save senis senis wantaim ol hap slip em ai i no save wok (slip i no gat REM). Ol dispela hap slip bilong ai i wok na ai i no wok (slip REM na slip i no gat REM) i save stap inap 90 minit, na narapela hap slip i bihainim narapela hap slip inap 5-pela o 6-pela taim long nait; laspela i save kamap klostu long taim yumi kirap.
Sapos yu ting kru bilong yu i no save wok tumas long taim yu slip, yu popaia tru. Ol i bin kisim save olsem kru i save wok strong moa long taim yumi driman, winim long sampela hap taim yumi no slip—sampela liklik sel tasol nogat. Ol dispela sel (neuron) i stap long as bilong kru na i bilong helpim yumi long putim gut yau na tingim gut wanpela samting. Long taim bilong slip REM i olsem ol i malolo. Tasol ol liklik sel bilong rop wailis long kru ol i no save malolo; oltaim narapela i wok long salim toksave i go long narapela.
Kru bilong yumi em i narakain hap tru bilong bodi. Em i gat ol bilion bilion liklik hap bilong en na long olgeta sekon ol i save salim wan handet i go inap 2 o 3 handet toksave i go. I gat planti moa liklik hap long kru bilong wanpela man, winim namba bilong ol manmeri i stap long graun. Sampela saveman i ting i gat 20 bilion i go inap 50 bilion samting. I hatwok tru long save long en, na dispela i strongim tok bilong wanpela man bilong raitim Baibel, em Devit, em i stori long bodi bilong yumi olsem: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.”—Song 139:14.
Pasin Bilong Driman
Long taim yumi no slip, ai, yau, nus, han, na maus bilong yumi i wok long givim kain kain save na piksa long kru, tasol long taim yumi slip, i no olsem. Nau kru yet i wokim ol piksa maski ai, yau, nus, han, na maus i no mekim sampela wok. Olsem na sampela taim, ol samting yumi lukim na mekim long ol driman bilong yumi i olsem tingting bilong yumi i paul nabaut. I olsem yumi inap mekim ol samting em yumi ol man i no inap mekim, olsem: flai wankain olsem Pita Pan o pundaun long wanpela maunten tasol yumi no kisim bagarap. Na ating taim i paul, olsem na yumi ting ol samting i kamap bipo i olsem i kamap long nau. O ating yumi laik ranawe tasol yumi no inap bosim lek bilong yumi—em i no bihainim laik bilong yumi. Ol samting i bin painim yumi na i pas strong long tingting long taim yumi no slip, ol dispela samting inap kam insait long ol driman bilong yumi. Planti man em ol i bin insait long pait na ol samting nogut tru i bin painim ol, ol i hatwok long lusim tingting long ol dispela samting; na sampela i no inap lusim tingting long raskol i bin mekim nogut long ol. Sapos ol kain samting nogut olsem i bin painim yumi long taim yumi no slip, em inap kamap klia long ol driman bilong yumi, na kamapim ol driman nogut. Na sampela samting bilong olgeta de em yumi tingting yet long en long taim yumi slip, dispela inap kamap insait long ol driman bilong yumi.
Sampela taim i gat wanpela hevi yumi wok long stretim, tasol rot bilong stretim dispela hevi i kamap long tingting bilong yumi long taim yumi slip. Ating dispela i soim olsem yumi no driman tasol long taim yumi slip—yumi tingting tu.
Wanpela buk i stori long ol driman na kru bilong yumi, em i tok: “Bikpela hap wok kru i save mekim long taim yumi slip em bilong tingting—i no bilong driman. Taim yumi slip na tingting i wok, i no gat piksa o stori samting yumi lukim o harim, na yumi no save tingim ol samting i narakain tru, nogat. Yumi save tingim ol liklik samting i bin kamap, planti taim em ol samting bilong i stap bilong yumi, bilong asde o bilong tumora, na tingting bilong yumi i save go raun tasol long ol dispela wankain samting—no gat sampela narapela samting i kamap long tingting.”
Sampela manmeri i pilim olsem i gat sampela bikpela insait bilong ol samting ol i driman long en. Ol i laik bai wanpela i ken kamapim insait bilong driman, olsem na ol i putim wanpela notbuk i stap klostu long bet bambai ol inap raitim driman long buk taim ol i kirap. Wanpela meri i raitim wanpela buk (The Dream Game) em i stori long ol buk ol man i raitim bilong traim kamapim insait bilong ol mak long driman, na em i tok: “Olgeta buk i stori long driman na i kamapim insait bilong ol stori na mak long ol driman, ol i no inap helpim yu, maski ol i bihainim ol stori na tingting bilong ples o tingting bilong ol saveman bilong nau.”
Yumi ken ting olsem kru yet i save kamapim ol driman, olsem na i no stret long ting olsem i gat sampela bikpela insait bilong ol driman bilong yumi. Yumi mas tingim ol driman olsem wanpela wok em kru i save mekim bilong lukautim kru na bai em i ken stap gutpela.
Tasol olsem wanem long ol manmeri ol i tok, ol i bin driman long wanpela wanblut o pren i dai na long de bihain ol i kisim save olsem dispela man o meri i dai tru? Ating dispela i makim olsem ol driman inap tokaut long ol samting bai kamap bihain? Orait long stori i kam bihain, bai yumi toktok long as tru bilong ol driman i makim ol samting bilong bihain.