Maunten Sainai—Naispela Samting Tru Long Ples Drai Nating
MI NO inap lusim tingting long bikpela amamas mi kisim long namba wan taim mi lukim wanpela maunten ol i ting em maunten Sainai bilong bipo. San i hat na teksi bilong mipela i ran long rot i gat planti das long en long hap bilong Poin Bilong Sainai long Isip. Bihain teksi i kamap long wanpela hap i op tru, em bikpela ples stret bilong Araka. Poret bilong maunten Sainai em samting bilong kirap nogut long en, em i go antap stret long dispela ples stret. Em i luk olsem naispela samting tru long ples drai nating. Man! Mi tingim dispela maunten na mi ting, nogut em dispela maunten Moses i bin kisim Lo bilong God long en!
Maski sampela i toktok yet long maunten Sainai bilong Baibel i stap long wanem hap tru, inap planti handet yia ol man i save kam long dispela hap, long wanem, ol i ting em dispela maunten. Bihain long yia 200 C.E. samting, ol man i save daunim olgeta laik bilong skin, ol i kam long dispela hap bambai ol i ken stap longwe long ol narapela man na tingim ol samting bilong lotu. Bihain long yia 500 C.E. samting, King Jastinian Namba Wan bilong lain Bisantin, em i tok ol i mas sanapim wanpela strongpela haus bruder long dispela hap bilong lukautim ol dispela man i save daunim olgeta laik bilong skin, na tu, bilong helpim ol Rom long bosim dispela hap. Dispela haus bruder i stap klostu long as bilong maunten Sainai, na long nau ol i kolim dispela haus bruder olsem Sen Katrin. Olsem wanem? Yu laik raun wantaim mi taim mi go lukim maunten Sainai?
Raun Long Maunten
Bihain long mipela i brukim ples daun i drai tru, draiva bilong teksi bilong mipela, em wanpela man Beduin, em i lusim mi na pren bilong mi daunbilo liklik long haus bruder. Long dispela hap ol ston i no gat gras o diwai samting, olsem na mipela i amamas long lukim banis bilong haus bruder i gat ol diwai i stap na gutpela gaden plaua. Tasol mipela abrusim dispela haus bruder, long wanem, namba wan samting mipela i laik mekim em long wokabaut i go antap long maunten Jebel Musa long hap saut bilong en na slip wanpela nait long en. Insait bilong dispela nem Jebel Musa i olsem “Maunten Bilong Moses,” na ol man i ting em maunten Sainai.
Mipela i wokabaut inap tupela aua na kamap long wanpela ples ol i kolim ples daun bilong Elaija, em wanpela liklik ples daun i save brukim kil bilong maunten Sainai, longpela bilong en i olsem 3-pela kilomita. Ol stori nating bilong ol tumbuna i tok, long wanpela hul insait long maunten em i stap klostu, Elaija i bin harim nek bilong God. (1 King 19:8-13) Mipela malolo aninit long wanpela diwai saipres i gat 500 krismas. Na tu, wanpela hul wara bilong bipo tru i stap long dispela hap. Mipela amamas long dring long dispela wara em wanpela man Beduin i givim long mipela. Wara i kol na i klin tru.
Mipela i bihainim rot ol turis i save bihainim na mipela i hatwok i go inap 20 minit moa bilong kam antap long maunten long rot bilong lata ston i gat 750 hap bilong putim lek. Long dispela hap mipela i lukim wanpela liklik haus lotu. Ol bruder i tok ol i wokim dispela haus lotu antap long ples stret em Moses i bin kisim Lo. Klostu long haus lotu i gat hul insait long maunten ston na ol i tok Moses i bin hait insait long en taim God i kam klostu long em na i go. (Kisim Bek 33:21-23) Tasol i no gat wanpela man i save tru tru long ples stret bilong ol dispela samting. Maski ol i no save, taim mipela sanap antap long maunten na lukluk nabaut, ol samting mipela i lukim i naispela tru! Mipela i lukluk i go long ples stret daunbilo i gat ol ston i stap nabaut nabaut long en na planti lain retpela maunten ston i go i go. Long hap bilong saut-wes i gat Jebel Katrina o maunten Katrin i go antap olsem 2,637 mita. Long dispela hap i no gat narapela maunten i winim longpela bilong dispela maunten.
Go Antap Long Ras Safsafa
Long narapela de rot i op bilong mipela i ken wokabaut i go antap long maunten Ras Safsafa. Dispela maunten i stap long wankain kil em maunten Jebel Musa i stap long en, em longpela bilong kil i olsem 3-pela kilomita. Ras Safsafa em maunten i stap long hap not bilong kil, na em i no bikpela olsem maunten Jebel Musa. Maunten Ras Safsafa em i go antap stret long ples stret bilong Araka. Ating long dispela ples stret ol Israel i bin wokim kem taim Moses i go antap long maunten bilong kisim Lo long Jehova.
Taim mipela wokabaut i go bilong kamap long Ras Safsafa, mipela i brukim ol liklik maunten na ples daun, na mipela i abrusim ol liklik haus lotu, na ol gaden, na ol hul wara ol man i no save mekim wok long en long nau—em ol samting i makim olsem bipo inap 100 bruder na ol man i laik stap longwe long ol man, ol i stap long dispela hap insait long ol hul bilong maunten. Long nau i gat wanpela bruder tasol i stap long dispela hap.
Mipela bungim dispela bruder wanpis long wanpela gaden em bikpela banis waia i raunim. Em i larim mipela i kam insait long banis na em i tokim mipela em i bin wok long dispela gaden inap 5-pela yia, na em i save go daun long haus bruder wanpela taim tasol long olgeta wik. Dispela bruder i tokim mipela long rot i go long Ras Safsafa, na mipela wokabaut i go antap long rot i baut baut, na bihain mipela sanap antap long Ras Safsafa. Dispela maunten i antap long ol narapela maunten klostu. Daunbilo mipela inap lukim bikpela ples stret bilong Araka. Mi ting, nogut em dispela hap Moses i bin lusim kem bilong ol Israel na wokabaut i kam antap long maunten bilong sanap long ai bilong God. Long tingting bilong mi, mi lukim 3 milion Israel i bung i stap “klostu long maunten Sainai” long dispela bikpela ples stret. Na long tingting mi lukim Moses i wokabaut i go daun long wanpela traipela baret klostu, na long han em i karim tupela hap ston i gat rait bilong Tenpela Lo long en.—Kisim Bek 19:2; 20:18; 32:15.
Mipela i amamas hatwok bilong mipela long wokabaut i kam antap long maunten em i no lus nating, na taim san i go daun mipela wokabaut i go bek long haus sel bilong mipela. Long lait bilong liklik paia mipela kaunim sampela hap bilong Buk Kisim Bek i stori long ol samting i bin painim Moses long hia, na bihain mipela i slip. Klostu long belo long de bihain, mipela i paitim dua bilong haus bruder Sen Katrin.
Insait Long Haus Bruder
Ol i tok, Sen Katrin em i wanpela bikpela samting long ol lotu i holim nating nem Kristen. Ol bruder Grik Otodoks i lukautim Sen Katrin. Hap dispela haus bruder i stap long en, i no dispela tasol i gat nem, nogat, ol imis na laibreri bilong en tu i gat nem. Inap planti planti yia i no gat man i kamap long Sen Katrin, long wanem, em i stap longwe tumas long ol man. Olsem na wan wan taim ol man i kam, ol bruder i amamas. Taim ol man i kam, ol bruder i holim ol, na kis long ol, na wasim lek bilong ol tu. Ol man inap raun long laik bilong ol yet long ol planti haus i stap insait long banis bilong haus bruder, em banis i go antap olsem 13 mita samting. Planti taim ol bruder i tokim ol man: ‘Stap wanpela wik, o wanpela mun, o stap inap long laik bilong yupela yet.’ Tasol long nau, inap olsem 12-pela bruder tasol i stap long haus bruder na ol i hatwok tru long mekim gut long ol man. Long nau inap 50,000 manmeri ol i save kam lukim dispela haus bruder long olgeta yia.
Bikpela lain tru i kam, olsem na ol inap lukim haus bruder inap 3-pela aua tasol long wanpela de na ol inap kam long 5-pela de tasol long wik. Ol turis inap lukim sampela hap tasol bilong haus bruder, olsem: Ples bung i gat Hul Bilong Moses i stap long en (stori bilong ol tumbuna i tok long dispela hap Moses i bin bungim meri em i laik maritim), na haus lotu Church of the Transfiguration (planti man i ting i no gat narapela olpela haus lotu ol i mekim wok long en olsem dispela haus lotu), na wanpela stua bilong ol buk. Na tu, ol i soim ol turis Haus Lotu Bilong Diwai i Paia, na ol bruder i tokim ol turis olsem, long dispela ples stret em namba wan taim Moses i lukim sampela samting i makim olsem God i stap. Ol bruder i ting i no gat narapela ples holi long olgeta hap bilong graun olsem dispela, olsem na ol i tokim ol turis long rausim su bilong ol olsem God i bin tokim Moses long mekim.—Kisim Bek 3:5.
Mipela i bel hevi long ol i no larim mipela i lukim laibreri bilong haus bruder, em dispela laibreri i gat nem na nambawan bikpela samting mipela i laik lukim long dispela hap. Mipela i askim man i kisim mipela i go raun long larim mipela i lukim laibreri, tasol em i tok: “Yu no inap tru! Liklik taim na haus bruder bai pas.” Tasol bihain liklik, taim mipela i no stap klostu long lain turis, dispela man i toktok isi isi long mipela olsem: “Kam olsem!” Mipela go aninit long ol rop i banisim sampela hap, na wokabaut i go antap long ol lata, na mipela i abrusim wanpela bruder bilong Frans em pes bilong em i makim olsem em i kirap nogut long lukim mipela long dispela hap, na bihain mipela sanap long wanpela olpela laibreri bilong bipo i gat nem, winim planti olpela laibreri bilong graun! Winim 4,500 buk na rait i stap long dispela laibreri, em ol i stap long tok Grik, Arabik, Siria, na Isip. Long wanpela taim bipo, wanpela gutpela samting tru i bin stap long dispela laibreri, em olpela rait Codex Sinaiticus.—Lukim blok long pes 18.
Mipela Lusim Dispela Hap
Raun bilong mipela i pinis taim mipela i go lukim haus matmat ausait long banis bilong haus bruder. Long dispela haus, bun bilong ol lain bruder na ol man i laik stap longwe long ol narapela man ol i hip i go antap—bun bilong lek i hip long wanpela hap, na bun bilong han long narapela hap, na bun bilong het long narapela hap, i go i go olsem. Ol bun bilong het i hip i go antap klostu long sparen bilong haus. Bilong wanem ol i ting ol i mas i gat kain ples nogut olsem dispela? Ol bruder i gat wanpela liklik ples matmat tasol. Olsem na taim wanpela i dai, em pasin bilong ol long rausim ol bun long wanpela olpela ples matmat bambai ol i ken planim man i dai nupela. Olgeta bruder i save, bihain bun bilong ol bai stap wantaim bun bilong ol wanwok bilong ol long haus matmat.
Olsem na laspela samting long raun bilong mipela i no samting bilong amamas. Tasol maski i hatwok, mipela i amamas long kam long dispela ples. Mipela amamas long lukim ol gutpela maunten na ples stret samting, na haus bruder i gat nem. Tasol taim mipela i lusim dispela hap mipela i pilim tru ol samting, olsem ating mipela i bin wokabaut long wankain rot Moses na lain Israel i bin wokabaut long en inap 3,500 yia i go pinis hia long maunten Sainai—em wanpela naispela samting tru long ples drai nating.—Wanpela man i salim dispela stori i kam.
[Blok long pes 18]
Ol i Painim Bikpela Samting
Long yia 1859, wanpela saveman bilong Baibel, em Konstantin von Tischendorf bilong Jemani, em i painim wanpela olpela rait bilong Baibel long tok Grik long haus bruder Sen Katrin. Dispela rait ol i bin raitim bihain long yia 300 samting, na long nau ol man i kolim dispela rait olsem Codex Sinaiticus. Planti buk bilong Ol Skripsa Hibru ol i bin kisim long Baibel Grik Septuagint, na olgeta buk bilong Ol Skripsa Grik, ol i stap long dispela olpela rait. Ol i no save long narapela olpela rait tru bilong olgeta buk bilong Ol Skripsa Grik olsem dispela rait.
Tischendorf i bin kolim dispela olpela rait olsem “nambawan gutpela samting” na em i laik prinim ol tok bilong en. Tischendorf i tok, em i bin tokim ol bruder olsem ol i mas givim dispela olpela rait long king bilong Rasia. Dispela king em i man bilong lukautim Misin Grik Otodoks, olsem na em inap mekim ol samting bilong helpim haus bruder.
Long banis bilong haus bruder i gat wanpela pas Tischendorf i bin lusim wantaim ol bruder na ol i bin tanim tok bilong en long tok Inglis. Long pas Tischendorf i tok promis olsem, ‘namba wan taim Lain Holi Bilong Maunten Sainai i askim em long kisim dispela olpela rait i kam bek, em bai bringim i kam na i no gat sampela bagarap long en.’ Tasol Tischendorf i ting ol bruder i no tingim gut dispela olpela rait olsem em i wanpela bikpela samting o i gat wok long prinim tok bilong en. Dispela rait em i no go bek yet long Sen Katrin. Bihain ol bruder i orait long kisim mani olsem 7,000 rubel long gavman bilong Rasia olsem pe bilong dispela rait, tasol inap long nau ol bruder i gat tupela tingting long ol saveman i laik painim ol gutpela samting bilong ol olsem ol rait samting. Bihain dispela rait Codex Sinaiticus em i kamap long Haus Tumbuna Bilong Briten, na long nau ol man inap lukim dispela rait long dispela haus.
Long 1975, aninit long banis not bilong Sen Katrin, ol i painim 47 bikpela bokis i gat ol imis na ol olpela rait ol i wokim long skin bilong animal samting. Long ol dispela samting ol i painim, i gat inap olsem 12-pela pes bilong rait Codex Sinaiticus, em ol i bin lus. Inap long nau ol man i no inap lukim ol dispela pes, sampela saveman tasol inap lukim.
[Ol Mep long pes 17]
Maunten Sainai
[Ol Kredit Lain]
Poto bilong NASA
Mountain High Maps® Copyright © 1997 Digital Wisdom, Inc.
[Piksa long pes 16, 17]
Ples stret bilong Araka, na maunten Ras Safsafa
[Kredit Lain]
Pictorial Archive (Near Eastern History) Est.
[Ol Piksa long pes 18]
Maunten Jebel Musa na haus bruder Sen Katrin
[Ol Kredit Lain]
Pictorial Archive (Near Eastern History) Est.
British Museum i orait long mipela i kisim dispela poto