Patmos—Ailan Bilong Ol Driman Bilong Kamapim Tok Hait

WANPELA MAN LONG GRIK I RAITIM DISPELA STORI BILONG KIRAP!

OL MANMERI bilong Patmos inap lukluk i go long solwara Ijien long wanpela lait i save kamap wan wan taim long maunten bilong ailan Samos i stap klostu. Sampela i save tok dispela lait i kain olsem lait bilong klaut i bruk, tasol ol man bilong Patmos i givim bel long lotu, ol i no gat dispela tingting. Taim ol i lukim dispela lait ol bai siksti i go na tokim ol lain i stap klostu long haus bilong ol olsem ol i lukim mak bilong dispela man i gat biknem na i bin stap long Patmos long bipo tru. Inap olsem 1,900 yia i go pinis wanpela kot i bin rausim dispela man i go long dispela liklik ailan bilong kantri Grik klostu long nambis bilong Esia Maina.

Ol i ting Domisian, King bilong Rom, em i rausim dispela man i go long Patmos, long wanem, em i “autim tok bilong God, na [em i] autim tok olsem [em i] bilip long Jisas.” Na taim dispela man i stap pinis long Patmos em i harim nek bilong God i olsem “krai bilong biugel,” na God i tokim em olsem: “Mi tasol mi stap paslain tru na mi stap las tru. . . . Olgeta samting yu lukim, em yu mas raitim long buk.”​—⁠KTH 1:​8-11.

Dispela buk em i raitim, em i laspela hap bilong wanpela buk i stap namba wan long lista bilong ol buk ol man i save baim. Sampela i tok, i hatwok tru long kisim gut insait bilong ol tok bilong dispela buk, winim planti ol narapela buk​—⁠dispela buk em laspela buk bilong Baibel ol i kolim olsem Kamapim Tok Hait, o Revelesen. Man i raitim dispela buk em Jon, aposel bilong Jisas. Inap planti handet yia ol man i tingting long ol tok Jon i bin kisim long samting olsem driman, i tok long laspela bikpela bagarap bai kamap bilong pinisim ol pasin nogut bilong graun.a

Patmos Long Nau

Planti man i raun long dispela hap ol i wanbel long tok olsem Patmos​—⁠em wanpela bilong ol ailan Dodekanis na i stap long hap not tru​—⁠i gutpela hap tru bilong kamapim ol kain tok olsem Jon i bin raitim. Long dispela ples bilong strongpela san, i gat ol traipela ston bilong volkeno i stap na ol traipela baret i go daun tru na i tudak, na ol liklik maunten i gat gutpela gras na ol hap i gat ol kain kain plaua i kamap long en.

Bilong raun na lukluk long Patmos i stap olsem wanem long nau, mi kisim wanpela sip long Pireus, em nambawan pasis bilong kantri Grik ol sip i save sua long en. Bihain long biknait, ol i stiaim sip i go namel long ol maunten na kamap long nambawan biktaun na pasis bilong Patmos, em Skela, na ol klaut i tekewe na mun i lait gut tru long dispela hap.

Long moningtaim mi dring kopi ol i wokim long pasin bilong ol Grik, olsem i no gat suga long en, na nau mi redi long raun na lukim ailan. Em moning yet na mi lukim ol bubu meri, em ol i pasim ol blakpela klos tasol, ol i wok long lukautim ol liklik pikinini i ran i go nabaut. Wanpela mausgras man bilong kisim pis i kisim wanpela urita long spia na em i wok long paitim long pos simen bilong bris na bai mit bilong en i no ken strong tumas.

Mi no kalap long wanpela bot, nogat; mi tingting long wokabaut i go antap long maunten i stap baksait long taun Skela bilong lukluk long ailan olgeta. Ol samting mi lukim long dispela hap i gutpela tru. Ailan i luk olsem wanpela traipela mep i drip long solwara na i gat ol kala kala long en bilong makim ol maunten na baret samting. Patmos i olsem 3-pela ailan i gat liklik hap graun i stap namel long ol na i skruim ol wantaim. Wanpela liklik hap graun olsem i stap long Skela. Narapela i stap long hap saut bilong ailan i no gat ol man long en, nem bilong dispela ples em Tiakofti, insait bilong dispela nem i olsem “katim i go tupela hap.” Longpela bilong ailan Patmos i olsem 13 kilomita, na long wanpela hap braitpela bilong en i liklik tru.

Planti Taim i Gat Ol Senis i Kamap

Kirap long taim ol namba wan lain bilong Esia i bin kam sindaun long Patmos inap 4,000 yia i go pinis, dispela ailan i stap olsem wanpela ples holi bilong ol. Ol dispela lain bilong pastaim i bin makim nambatu bikpela maunten bilong wokim haus lotu bilong Artemis, em god meri bilong painim abus long bus.

Long yia 96 C.E., em yia ol i ting olsem ol i bin rausim Jon i go long Patmos, Rom i bosim dispela ailan. Long yia 300 samting Patmos i stap aninit long Gavman Bisantin, em lain bilong en i bin kamap olsem “Kristen.” Bihain, namel long ol yia 600 i go 900 samting ol lain i bihainim lotu Islam i bosim Patmos.

Isi isi ol samting i senis na Patmos i kamap olsem ples nating i no gat man. Tasol long pinis bilong yia 1000 samting, wanpela man Grik bilong misin Otodoks i kirap na wokim wanpela haus bruder bilong “Santu” Jon long hap ol haiden i bin wokim haus lotu bilong Artemis long en long bipo. Isi isi ol man i kam bek gen long Patmos na wokim ol waitpela haus long taun Hora, em i stap long hap stret bilong dispela haus bruder.

Long yia olsem 1870 samting, dispela ailan i kisim biknem long sotpela taim, long wanem, i gat wanpela lain sip bilong karim kago i save kisim bikpela mani long dispela hap bilong Mediterenian, na ol dispela sip em bilong sampela man i stap long ailan. Dispela lain sip i mekim na i gat narapela senis i kamap long Patmos. Long yia 1975 samting, sampela maniman bilong ol narapela hap bilong graun i luksave olsem ailan Patmos i gutpela na i no gat bikpela pe long baim ol haus o graun samting long en, i olsem inap longpela taim ol man i no tingim dispela ailan. Olsem na ol i baim na stretim ol bikpela haus bilong ol bosman bilong ol dispela kago sip long bipo, na dispela samting wantaim ol nupela bris bilong ol sip i mekim na Patmos i kamap olsem ples bilong ol turis.

Sampela ailan bilong Grik i laik kisim bagarap, long wanem, planti turis tumas i raun long ol. Tasol Patmos i no gat dispela hevi. Tupela bikpela as bilong dispela samting i olsem Patmos i no gat ples balus, na ol bruder i strong olsem dispela hap i mas stap olsem wanpela ples holi.

Stori Bilong Bipo na Pasin Tumbuna

Man i wok long haus kaikai i helpim mi long makim ol samting i gutpela long lukim taim mi raun long ailan, na em i tokim mi long bihainim wanpela olpela rot ston i stap 400 yia pinis ausait long taun Skela. Rot i go namel long hap i gat ol diwai pain long en na i go antap moa long wanpela hul ston ol i ting olsem Jon i bin stap long en, na tu, rot i go long dispela haus bruder bilong “Santu” Jon. Ausait long taun mi lukim wanpela tok i no longtaim wanpela i bin penim long banis ston, i tok olsem: “Ohi sto 666” (Was gut long namba 666), em wanpela namba long Kamapim Tok Hait planti man i paul long insait bilong en.

Long yia 1090 ol i wokim Haus Bruder Apokalips i gat liklik ples lotu bilong “Santu” An long en, ol i bin wokim bilong pasim hul bilong ston em stori bilong ol tumbuna i tok Jon i bin stap long en na kisim ol driman. Mi stap na lukim wanpela meri i brukim skru na pasim wanpela tama (ofa) long imis bilong “Santu” Jon. Ol man i givim bel long Lotu Otodoks na bilip olsem dispela imis inap wokim ol mirakel, ol i givim ofa olsem tamata long en​—⁠em ol liklik hap ain sampela lain i wokim na i luk olsem wanpela man o meri, o wanpela hap bilong bodi, o haus, o ka, o bot. Long Korin, long tempel bilong Asklipias, em god-dokta bilong ol Grik long bipo tru, mi bin lukim ol wankain ofa ol i wokim long wanpela kain graun. Olsem wanem? Tupela lain i kisim nating wankain pasin bilong wokim ol ofa?

Ol Samting Bilong Bipo na Ol Olpela Rait

Taim mi go insait long banis bilong haus bruder bilong “Santu” Jon, wanpela man i lusim haus na kam ausait, na em i mekim pasin pren long mipela. “Papa Nikos” (Pater Nik) i amamas long soim mi na sampela ol narapela turis ol gutpela gutpela samting bilong haus bruder i dia tumas. Dispela haus bruder i gat planti mani samting na bikpela nem, winim planti narapela haus bruder bilong kantri Grik, na bikpela hap graun bilong Patmos i bilong en.

Mipela go insait long wanpela liklik haus lotu ol smok bilong kandel i bin mekim na banis bilong en i blakpela. Matmat bilong man i bin kamapim dispela haus bruder i stap long en. Bihain mipela go long Haus Lotu Bilong Virgo, ol i bin wokim hap bilong en long ol ston bilong haus lotu bilong Artemis. Long haus tumbuna mipela lukim planti gol na ol ston i dia tumas em sampela king bilong Rasia i bin givim; wanpela pepa bilong yia 1000 samting i makim olsem ailan em bilong ol bruder, na i gat nem bilong King bilong Bisantin, Aleksias Namba 1 Kamnenas, i stap long en; na wanpela naispela hap tru bilong olpela rait bilong Gutnius Mak i raitim, em ol i bin raitim long skin bilong pikinini bulmakau i gat blupela kala long en, na ol i raitim ol tok long en long silva. Na tu, i gat planti ol narapela olpela rait bilong Baibel i stap na ol rait bilong ol tisa bilong lotu.

Ol Samting Bilong Ailan Yet

Ailan yet i gutpela long lukim. Sampela kilomita ausait long Skela long hap saut i gat wanpela gutpela nambis long wanpela pasis em win i no strong tumas long en. Nambis i stret tasol, na namel long en i gat wanpela traipela ston tru i gat planti ol hul long en, na bikpela bilong ston i go antap olsem 20 mita samting, ol i kolim dispela ston, Keliketsu, insait bilong dispela nem i olsem “pisin bilong solwara.”

Pasin bilong raun tasol i nambawan rot bilong lukim ol samting bilong Patmos. Ating yu bai amamas long sindaun long Kasteli, na lukim ol pipia ston samting i stap yet bilong dispela biktaun bilong ol Grik bilong bipo tru na larim strongpela san i hatim skin bilong yu taim yu putim yau long krai bilong belo bilong ol sipsip na wisil bilong man i lukautim ol. O long sampela apinun taim sno bilong solwara Ijien i wok long karamapim skai, ating yu bai amamas long sindaun na lukim ol bot, i olsem ol i go antap long skai taim ol i lusim nambis na sno i karamapim ol.

Long apinun tru long laspela de mi stap long Patmos, naispela retpela san i lait long taun i stap daunbilo. Long pasis ol man bilong kisim pis i mekim wok long lam na raun long ol liklik bot i no gat mota long en, ol i save kolim olsem gri-gri, em makim ol liklik pato, long wanem, wanpela sip i pulim ol long wanpela lain.

I olsem ailan olgeta i lait. Win na biksi i wok long sakim ol gri-gri. Sampela aua bihain, mi lukim ol dispela bot i stap longwe long nambis inap tupela kilomita samting taim sip mi stap long en bilong go bek long Pireus i abrusim ol. Ol i mekim wok long ol lam i lait gut tru bilong pulim ol pis i kam. Mi stap long sip na lukluk long ol bot bilong kisim pis na ailan Patmos i go i go na bihain mi no inap lukim ol moa. Na long tingting i olsem mi lukim Jon, em dispela aposel ol i rausim em i kam long Patmos, em i stap na raitim tok bilong ol driman em i bin kisim.

[Futnot]

[Piksa long pes 11]

Haus bruder bilong “Santu” Jon

[Piksa Kredit Lain long pes 10]

© Miranda 2000