Pas Bilong Ol Man
Maus i Pilim Swit Bilong Kaikai Pikinini meri bilong mi gat 13 krismas, na kirap long taim em i bin bebi yet em i no laik traim ol nupela nupela kaikai. Olsem na mi tenkyu long stori “Maus i Pilim Swit Bilong Kaikai—Em Presen Bilong Man i Wokim Yumi.” (Septemba 8, 1998) Mi amamas tru long ol tok yupela i mekim bilong helpim ol pikinini long kisim pasin bilong traim ol nupela kaikai na pilim swit bilong en. Mi kirap long tokim pikinini meri bilong mi long helpim mi long putim ol samting bilong mekim kaikai i swit long sampela kaikai em i no save laikim bipo. Tok bilong yupela i tru! Nau em i save kaikai ol kaikai i save givim strong long skin—pastaim em i no save laikim ol dispela kaikai.
B. M., long Polan
Putim Asua Long Satan? Mi gat 17 krismas, na i no longtaim i go pinis mi kaunim Kirap! long namba wan taim. Nau mi save laikim tru long kaunim! Dispela nius i gat ol gutpela tok long en, olsem: “Baibel i Tok Wanem? Yu Ting Satan i Gat Asua Long Ol Sin Bilong Yumi?” (Septemba 8, 1998) I kam inap long taim mi kaunim dispela stori, mi bin ting mi ken sutim tok long Satan taim mi mekim sin. Nius bilong yupela em i nambawan tru, na mi kirapim olgeta man long kaunim. Plis, raitim nem bilong mi long lista bilong ol man i save kisim nius bilong yupela!
M. M., long Amerika
Ol Yangpela i Kilim i Dai Skin Bilong Ol Yet Mi laik tok tenkyu tru long yupela long ol stori “I Gat Gutpela Samting Bai Painim Ol Yangpela Bilong Nau?” (Septemba 8, 1998) Mi pilim tru na mi krai. Inap sampela taim mi bin traim long kilim i dai skin bilong mi yet. Tasol mi amamas mi no dai.
A. Z., long Ripablik Sek
Ol man i raitim ol dispela stori ol i pilim tru dispela hevi na ol i stori long dispela samting i hatwok long toktok long en. Long kirap bilong dispela yia, mi bin traim long kilim i dai skin bilong mi yet taim mi bel hevi nogut tru. Tenkyu long dispela stori i kam long taim stret. Em i helpim mi na mi no dai.
R. P., long Inglan
Sori tru, tupela wanskul bilong mi ol i traim long kilim i dai ol yet. Wanpela i mekim olsem, long wanem, taim em i tingim i stap bilong em long bihain, em i no ting i gat gutpela samting inap kamap—ol hevi tasol em i mas wok long winim. Olsem na dispela stori i helpim ol man, em i kamapim klia tru ol tok na kolim stret ol samting yumi ken mekim bambai i stap bilong yumi long bihain i gat as bilong en.
R. D., long Spen
Stori bilong yupela i sutim bel bilong mi. I olsem Jehova i toktok long mi olsem wanpela gutpela papa. Taim mi liklik yet, mi kisim hevi long papa i mekim nogut long mi. Mi pilim olsem mi samting nating tasol na planti taim mi tingting long kilim i dai mi yet. Tasol nau, olsem stori bilong yupela i tok, mi wok long kisim pasin bilong wetim “dispela laip em i laip tru.”—1 Timoti 6:19.
S. R., long Brasil
Tenkyu tru long kamapim ol toktok ol yangpela i mekim, planti tok ol i mekim i sotpela, tasol i kamapim rot bilong stretim sampela hevi.
W. H., long Jemani
Kisim Sampela Mani Moa Tenkyu tru long yupela i lusim sampela taim bilong raitim dispela gutpela stori “Ol Yangpela i Laik Save . . . Olsem Wanem Mi Ken Kisim Sampela Mani?” (Septemba 8, 1998) Mi bin hatwok tru long painim wok mani. Tasol mi bihainim ol tok yupela i mekim na nau mi painim wanpela wok mani!
S. D., long Gana