Taim Ol Bagarap Long Skin i Pinis
WANPELA meri em han lek bilong em i dai, em i bin tok olsem skin bilong klostu olgeta man i “strong inap liklik taim” tasol. Dispela tok em i stret, long wanem, ol sik i stap hait long skin bilong yumi olgeta, bihain bai ol i kamap ples klia! Olsem na ol kampani i kamapim bikpela wok bisnis long wokim aiglas, tit giaman, liklik masin bilong helpim ol yaupas long harim tok, skru giaman bilong lek, na liklik masin bilong helpim klok bilong man long wok gut. Olsem Rom 8:22 i tok: “Olgeta samting God i bin wokim, olgeta i pilim pen . . . na olgeta i krai nogut i stap, i kam inap long nau.”
Olsem na tok promis bilong God long stretim skin bilong ol man i bihainim tok bilong em na bai ol i stap gutpela olgeta long “nupela graun” i gat stretpela pasin long en, dispela i mekim gut tru bel bilong yumi olgeta. (2 Pita 3:13; KTH 21:3, 4) Aisaia 35:5, 6 i tok: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”
Baibel i tok profet olsem “planti manmeri tru” bai abrusim bagarap taim dispela pasin nogut bilong nau i pinis. (KTH 7:9, 14; Song 37:10, 11, 29) Yumi ken ting, bihain liklik long taim dispela bikpela bagarap i kamap, ol man em skin bilong ol i bagarap na ol man i gat sik, wantu ol bai orait gen! (Aisaia 33:24) Taim Jisas i stap long graun em i bin oraitim sik bilong ol man, na dispela i olsem piksa bilong ol samting bai kamap long nupela graun God i laik kamapim. (Skelim wantaim Mak 5:25-29; 7:33-35.) Long nau yumi no inap tingim ol gutpela samting ol man bai pilim, na aiwara bilong amamas em bai kamap taim ol i tromoi han o lek giaman bilong ol, o stik bilong wokabaut, o wilsia samting! Skin bilong ol bai strong, olsem na ol inap mekim wok God bai givim long ol bilong helpim wok bilong mekim graun i kamap wanpela paradais.—Luk 23:43.
Tasol long nau, ol man em skin bilong ol i bagarap, ol i mas hatwok yet. Nelson, em wanpela man i stap long Kanada na skin bilong em i bagarap, em i tok: “Taim mi sori long skin bilong mi yet, mi tingim tok bilong Jisas long Matyu 24:13: ‘Ol manmeri i stap strong inap long las de, God bai i kisim bek ol.’ ” Maski skin bilong ol i bagarap na i gat planti samting ol i no inap mekim, ol dispela kain man inap stap gutpela tru long bikpela samting—em ol samting bilong spirit—sapos ol i stap gut long bilip Kristen.—Jems 1:3, 4.
Ol Witnes Bilong Jehova i bin helpim planti milion manmeri long kisim dispela kain bilip. Dell, em yumi bin kaunim sampela tok bilong em long stori i kamap paslain long dispela, em i tok: “Bel bilong mi i amamas nogut tru taim mi kisim save olsem ol bagarap long skin olsem bagarap bilong mi, em samting bilong i stap liklik taim tasol.” Tru tumas, dispela gutpela samting Dell, na planti ol narapela i olsem em ol inap wetim, em i strongim ol, olsem na yumi no ken tok ol i stap nogut.
[Piksa long pes 10]
Ol man i abrusim bikpela bagarap em bai kamap, God bai oraitim sik bilong ol long rot bilong mirakel