Ol Yangpela i Laik Save . . .

Olsem Wanem Mi Inap Karim Hevi Taim Ol i Tok Bilas?

ATING ol yangpela i tok bilas long ol narapela yangpela i gat narapela kain pasin o klos. Dispela i save painim ol yangpela Kristen em pasin bilong ol i narapela kain long pasin bilong ol narapela yangpela. Krais i tok long ol trupela disaipel bilong em olsem: “Sapos ol i bin mekim nogut long mi, orait ol bai i mekim nogut long yupela tu.”​—⁠Jon 15:⁠20.

Dispela i save mekim wanem long ol yangpela Witnes Bilong Jehova? Ol man i save tok bilas long sampela bilong ol, long wanem, ol i no insait long sampela holide, na ol i no save salut long plak. Na ol man i save mekim nogut long sampela yangpela Witnes, long wanem, ol i no save kisim ol drak, na ol i no save giaman, na ol i no mekim pasin pamuk olsem ol lo bilong Baibel i tok.

Dispela i no nupela samting. Aposel Pita i tokim ol Kristen i bin i stap long taim bilong ol aposel, olsem: “Nau yupela i no save mekim ol dispela kain pasin nogut wantaim ol haiden. Na ol i save kirap nogut long dispela, na ol i tok nogut long yupela.” (1 Pita 4:⁠4) Sampela narapela Baibel i tanim dispela tok olsem, ol i “givim ol nem nogut long yupela” (Knox), o “ol i mekim nogut long yupela.”​—⁠Today’s English Version.

Olsem wanem? Sampela taim ol man i bin tok bilas long yu, long wanem, ol i no laikim ol bilip bilong yu? Sapos ol i bin mekim olsem yu no ken bel hevi, long wanem, dispela samting i bin painim planti narapela tu! Na yu ken amamas long save olsem yu inap lain long karim dispela hevi bilong pasin bilong tok bilas long bilip bilong yu.

I Gat Wanem As na Ol i Tok Bilas

Bilong wanem sampela i tok bilas long ol man em bilip na pasin bilong ol i narapela kain long bilip na pasin bilong ol yet? Sampela taim ol man bilong tok bilas​—⁠olsem ol bikhetmanki tu​—⁠ol i no amamas long ol yet. Ating ol i tok bilas long yu bambai ol narapela yangpela i ting olsem ol i gutpela man. Tasol taim ol i stap wanpis, ating wan wan tasol bilong ol i gat laik long sutim tok long yu, o ol i pret long mekim olsem.

Tasol sampela man bilong tok bilas ol i “kirap nogut” olsem Pita i tok. Ating ol i no klia liklik i gat wanem as na yu gat narapela kain pasin. Olsem: Sapos yu wanpela Witnes, ol man inap ting olsem yu narakain tru, long wanem, yu no insait long samting bilong sampela holide. Ating ol i harim ol stori giaman em sampela man i biruaim ol Witnes i bin kamapim.

Tasol maski wanem samting i as bilong dispela pasin, taim ol man i sutim tok long yu, ating yu wanbel long tok bilong Baibel: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.” (Sindaun 12:18) Tasol tingim: I no olsem ol man i no laikim yu na long dispela as ol i mekim kain tok olsem, nogat. Ating ol i mekim samting Baibel i tok long en, ol ‘i no tingting gut na ol i toktok.’

Tasol taim narapela i tok bilas long yu, dispela inap bagarapim tru bel bilong yu. Ating yu laik lusim pasin bilong stap gut long bilip bilong yu bambai ol man i no ken tok bilas long yu. Taim ol man i tok bilas long ol bilip bilong yu, olsem wanem yu ken karim dispela hevi?

Kamapim Ol Tok Bilong Helpim Bilip Bilong Yu

Aposel Pita i tokim ol Kristen olsem: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pita 3:​15) Bilong yu ken mekim ol tok bilong helpim bilip bilong yu, yu mas kisim stretpela save na yu mas save long as bilong ol bilip bilong yu.

Tasol yu mas lain tu long kamapim tingting bilong yu long “gutpela pasin,” o olsem wanpela Baibel (The Bible in Basic English) i tok, “no ken mekim long pasin antap.” Save bilong yu long Baibel na long ol tok bilong en i no ken mekim na yu ting olsem yu winim ol narapela, nogat. Tasol yu mas bihainim pasin bilong aposel Pol, em i tok long wok bilong em olsem: “Long laik bilong mi yet, mi bin kamap olsem wokboi nating bilong olgeta man, bilong mi ken kisim planti man moa i kam insait long lain bilong Krais.”​—⁠1 Korin 9:​19.

Sapos yu pilim olsem yu pret long mekim sampela tok bilong helpim bilip bilong yu, yu no ken bel hevi. Planti yangpela Witnes ol i bin pilim wankain. Jamal i tok: “Taim mi stap long komyuniti skul, mi no inap tokim ol narapela i gat wanem as na mi no save insait long sampela holide, o salut long plak, o bilong wanem mi save go autim tok long ol haus.” Wanem samting i helpim em? Em i tok: “Papa bilong mi em i helpim mi i go inap long taim mi inap kamapim as bilong ol dispela bilip, na dispela i bin helpim mi tru.” Sapos yu hatwok long kamapim as bilong bilip bilong yu long ol narapela, ating yu ken askim papa o mama o wanpela strongpela brata long kongrigesen long helpim yu long kisim gutpela save i kam long God.​—⁠Efesus 3:​17-​19.

Wanpela yangpela Witnes i gat 16 krismas em i tok, em i gat sedyul bilong mekim stadi bilong em yet long Baibel, na dispela i helpim em na em i no pret long tokaut long bilip bilong em long skul. Em i tok: “Bipo, taim ol wanklas bilong mi ol i tok bilas long mi, long wanem, mi wanpela Witnes, mi no save bai mi tok wanem. Nau mi save autim tok long olgeta de, na planti taim mi stadi long Baibel, olsem na mi bekim tok bilong ol. Mi save ritim ol nupela nius Wastaua na Kirap! na dispela i helpim mi long toktok wantaim ol wanskul long ol bilip bilong mi.”

Tru, tok ol man i sutim long yumi i no wankain. Olsem na yumi mas kamapim narapela narapela kain tok bilong bekim tok bilong ol. Tasol taim tok nogut bilong narapela i skrapim bel bilong yu, i no stret long “bekim pasin nogut” bilong em. (Rom 12:​17-​21) Taim yu bekim sampela tok nogut long narapela, maski em i olsem smatpela tok, dispela inap kirapim narapela long mekim sampela tok nogut moa. Olsem na sampela i kisim save olsem i gutpela moa long ol i no tingim dispela tok nogut narapela i mekim.

Sampela taim man i tok bilas em i laik dispela tok i olsem tok pani, olsem na ating i gutpela long lap tasol long dispela tok na no ken bel hevi long en. (Saveman 7:⁠9) Sapos man bilong tok bilas i luksave olsem tok bilong em i no bagarapim bel bilong yu, ating bai em i lusim pasin bilong tok bilas long yu.​—⁠Skelim wantaim Sindaun 24:29; 1 Pita 2:​23.

Tokaut Long Bilip Bilong Yu

Tasol ating long sampela taim, yu inap kamapim sotpela tok bilong kamapim as bilong bilip bilong yu. Wanpela meri i gat 13 krismas, em i traim dispela na gutpela samting i kamap. Em i tok: “Taim mi wokabaut i go long klas-rum, sampela sumatin i tok bilas long ol Witnes. Mi laik mekim sampela tok, tasol ol i wokabaut i go tasol na lap long mi​—⁠wanpela tasol i no mekim olsem.” Dispela yangpela Witnes i tok: “Dispela yangpela meri, nem bilong em Jaimee, em i tokim mi olsem em i gat buk Yu Inap i Stap Oltaim Long Paradais Long Graun.a Em i tok, em i bin ritim bikpela hap bilong dispela buk, na em i gat laik long kisim sampela save moa long ol bilip bilong mipela. Mi kirap stadi long Baibel wantaim Jaimee.” Dispela samting i strongim bel bilong dispela yangpela Witnes, na em i kirap autim tok long ol narapela yangpela. Em i tok: “Mi save go lukim 4-pela wanskul bilong mi em ol i gat laik long kisim save long Baibel, na ating i no longtaim na bai mi kirap stadi long Baibel wantaim ol.”

Inap sampela yia i go pinis, wankain samting i painim wanpela sumatin bilong kantri Laibiria long Afrika. Taim ol i skul long ol samting bilong saiens, long gutpela pasin em i tok olsem em i wanpela Witnes Bilong Jehova, na em i bilip olsem God i bin wokim olgeta samting na em i no bilip ol man i kamap long rot bilong evolusen. Pastaim planti wanklas i sutim tok long em, tasol tisa i larim em i kamapim as bilong bilip bilong em, na bihain tisa i kisim buk Life—⁠How Did It Get Here? By Evolution or by Creation?b

Taim tisa i ritim buk pinis, em i tokim ol sumatin olsem: “I no gat narapela buk i kain olsem dispela. Em i wanpela gutpela buk bilong saiens i stori long olsem wanem ol samting i bin kamap, winim ol narapela buk mi bin ritim.” Bihain tisa i tok, em bai mekim wok long dispela buk Creation wantaim buk bilong skul inap 12-pela mun, na em i tokim ol sumatin long baim dispela buk long dispela yangpela Witnes. Em i tilim planti buk, na tingting bilong planti sumatin long ol Witnes i senis!

Ol Traim i Strongim Bilip

Tru, ating sampela taim yu bel hevi, long wanem, planti ol i no wanbel o amamas long tingting bilong yu em Baibel i as bilong en. (Skelim wantaim Song 3:​1, 2.) Olsem na i gutpela long poroman wantaim ol man i gat wankain bilip olsem yu. (Sindaun 27:17) Tasol olsem wanem sapos long skul o long hap yu stap long en i no gat ol yangpela i gat wankain bilip olsem bilong yu?

Sapos olsem, orait tingim, nambawan gutpela Pren bilong yu em God Jehova, na em inap helpim yu. Satan i bin sutim tok long em inap planti tausen yia pinis. Olsem na yumi ken save, taim yu sanap strong long bilip dispela bai mekim bel bilong Jehova i amamas. Dispela pasin bilong yu i mekim na Jehova inap ‘bekim tok long Satan, em man i sutim tok long em.’​—⁠Sindaun 27:⁠11.

Yu mas save olsem sampela taim samting bilong traim bilip bilong yu bai i kamap. (2 Timoti 3:​12) Tasol aposel Pita i tok, taim samting i traim bilip bilong yumi na yumi sanap strong, dispela i “winim gol na i gutpela moa, long wanem, gol em i samting bilong bagarap.” (1 Pita 1:⁠7) Olsem na taim ol narapela i tok bilas long yu, long wanem, ol i no laikim bilip bilong yu, orait tingim dispela i olsem rot bilong yu ken strongim bilip bilong yu, na kamapim klia pasin bilong yu long sanap strong na karim hevi. Aposel Pol i tok, taim yumi sanap strong God bai orait long yumi. (Rom 5:​3-5) Tru tumas, laik bilong yu long Jehova i ken orait long yu bai strongim yu long karim hevi taim ol narapela i tok bilas long bilip bilong yu!

[Ol Futnot]

[Piksa long pes 13]

Yu inap kamapim ol tok bilong helpim bilip bilong yu?