Pasin Bilong Bagarapim Ol Samting Bai Pinis
WANPELA MAN LONG BRITEN I RAITIM DISPELA STORI BILONG KIRAP!
“Wok ol man i bin mekim insait long 25 yia i go pinis i bagarapim bikpela hap bilong ol bikbus na ol samting bilong graun.”
EM TOK bilong wanpela lain (World Wide Fund for Nature). Ol i mekim dispela tok taim ol i kamapim buk (Living Planet Index), em wanpela buk ol i save raitim ol nupela namba bilong ol samting bilong graun na solwara long en, em ol i bin skelim.
Lain i gat wok long lukautim graun na ol samting long en, ol i tokaut olsem inap 10 pesen bilong ol bikbus long olgeta hap em i pinis. Wanpela nius (The Independent) bilong Landon i tok, dispela namba i no kamapim bikpela bagarap i bin painim ol bikbus bilong ol ples em bikpela ren i save pundaun long en na long bikbus bilong ol ples drai, na ol narapela narapela samting bilong ol bikbus, ating winim 10 pesen bilong ol dispela samting ol i pinis. Inap 30 pesen bilong ol samting i stap long solwara ol i pinis, na yumi save, long wanem, namba bilong blufin tuna pis long solwara Atlantik na ol traipela trausel (leatherback) long ol solwara bilong Esia, ol i wok long pinis. Samting i nogut moa em mak bilong wara. Wanpela samting ol i kolim Freshwater Ecosystems Index i kamapim klia olsem mak bilong wara i bin go daun inap 50 pesen. Ol i tok bikpela asua bilong dispela em pasin bilong bagarapim wara long ol kain kain marasin nogut ol i save mekim wok long en long ol bikpela gaden na long ol faktori. Na tu, ol i save mekim bikpela wok moa long wara.
Wanpela dairekta bilong ol gaden (Royal Botanical Gardens) long Kyu, Landon, Inglan, em Bikman Ghillian Prance, em i tok: ‘Pasin bilong lukautim ol samting bilong graun i wok gut wantaim bilong helpim ol samting long i stap laip, em i no samting ol maniman tasol inap mekim nabaut long en. Yumi mas lukautim ol dispela samting bambai ol i ken wok gut na bai yumi olgeta i ken i stap laip long graun na yumi no ken bagarap.’ Yumi olgeta i insait long dispela samting. Orait, olsem wanem ol dispela hevi bilong graun bai pinis?
Laspela buk bilong Baibel, em Kamapim Tok Hait, em i toktok long ol man i bagarapim graun. Em i tok profet long wanpela taim bai kamap na ol dispela man yet ol bai bagarap. (KTH 11:18) Olsem wanem? I gat man bai abrusim bagarap? Tru tumas, sampela man bai abrusim bagarap, long wanem, dispela samting bai kamap long rot bilong Jehova, em “God I Gat Olgeta Strong.” Em tasol inap stretim ol hevi bilong ol samting long graun na em i gat strong bilong mekim. (KTH 11:17) Kamapim Tok Hait 21:3 i stori long wanpela taim bai kamap na God “bai i stap wantaim ol [man], na em bai i stap God bilong ol.”
Olsem wanem yu ken kamap wanpela ‘man o meri bilong em’ na yu inap long lukim ol samting bilong graun nau ol i wok long bagarap taim ol i kamap gutpela gen? Yu ken salim pas long ol Witnes Bilong Jehova i stap long hap bilong yu, long wanpela atres i stap long pes 5. O yu ken toktok wantaim ol long narapela taim ol i kam long haus bilong yu. Ol bai amamas long helpim yu long kisim sampela save moa long samting yu ken mekim nau bilong redi taim God i kirap mekim ol samting liklik taim.