Yu Save Lukautim Paua o Pinisim Nating?
WANPELA MAN LONG BRITEN I RAITIM DISPELA STORI BILONG KIRAP!
LONG olgeta yia, ol Amerika i save pinisim nating bikpela paua tru em ol i ting pe bilong en inap olsem 1 bilion dola, na em inap givim lait samting long wanpela siti i bikpela olsem Sikago. Ol i pinisim nating paua olsem wanem? Ol i save larim ol samting olsem kompyuta, masin faks, video, televisen, redio-kaset samting, na tu, masin bilong wokim kofi, i stap nating long paua. Ol i mekim olsem bambai klok bilong masin i ken wok, o tok i stap long kompyuta samting i no ken lus, na ol i laik lait samting i makim olsem masin i stap long paua i stap ples klia—o bilong masin i redi tasol long man i mekim wok long en.
Ol i ting olsem paua em ol manmeri long Briten i pinisim nating long olgeta yia, long dispela rot i kamapim hap milion ton ges nogut i save bagarapim graun. Dispela ges i go nabaut long win samting na ating dispela tu i mekim na graun i wok long kamap hat. Wanpela niuspepa (The Times) bilong Landon i tok: ‘Tingting bilong ol man long lukautim ol samting bilong graun i bikpela samting namel long ol yangpela i save mekim wok long paua, tasol wan wan tasol i save olsem wok ol i mekim long paua i mekim na graun i wok long kamap hat moa.’
Planti man i no save olsem taim masin i stap nating long paua, em i save pulim bikpela hap paua wankain olsem paua masin i save pulim taim em i wok. Olsem: Televisen i save pulim paua inap olsem 15 watt na taim em i stap nating long paua em i pulim paua inap olsem 14 watt. Ol samting ol i wokim masin long en i no gutpela, em tu i wanpela as na masin i pulim bikpela paua. Ol i bin traim wanpela masin bilong musik CD na em i pulim paua inap olsem 28 watt taim em i stap nating long paua, na narapela masin i wankain long en tasol i gat narapela nem, em i pulim paua inap olsem 2 watt tasol. Long nau ol i wokim wanpela nupela liklik samting bilong kompyuta bambai kompyuta i no ken pinisim nating paua, ol i tok, dispela samting inap mekim na hap paua em kompyuta i save mekim wok long en i go daun; bipo em i pulim paua inap olsem 10 watt tasol nau em i pulim liklik paua tru olsem 1 watt o 0.1 watt tasol. Taim ol i wok yet long pinisim pasin bilong bagarapim win na graun—ol i laik ol kampani long olgeta hap bai mekim wok long dispela liklik samting bilong kompyuta em pe bilong en 2 dola samting. Tasol long nau yumi ken mekim wanem?
Wanpela minista bilong gavman long Briten i tok: “Yumi inap ting paua em wan wan masin i pulim em i liklik tru. Tasol i gat 60 milion manmeri i stap long ol dispela ailan [Briten], olsem na mipela i mekim wok long bikpela paua tru.” Tru, ol samting bilong haus olsem bokis ais, yumi no inap pasim paua long en. Tasol i gutpela yumi kisim pasin bilong pasim ol lait na ol narapela samting yumi no mekim wok long en, yumi mas pasim olgeta na no ken larim ol i stap nating long paua. Dispela pasin bai mekim na yu no tromoi bikpela mani long baim paua, na tu, em bai helpim wok bilong lukautim graun bilong yumi na planti samting i no ken bagarapim win na graun.