Sampela Tok i Kam Long Olgeta Hap

Ol Pilai Nogut Bilong Kompyuta

Nius Reuters i tok, wanpela lain bilong gavman long Brasil (Ministry of Justice) i tambuim ol stua long kisim wanpela kain pilai bilong kompyuta em planti man i gat tok long en. Ol yangpela i pilai long en i save kisim ol mak taim ol i stilim ka na kilim i dai ol polis. Ol man i tok em wanpela pilai “nogut, long wanem, pilai i mekim olsem pasin stil na kilim i dai man em i samting nating, na em inap kirapim ol yangpela i mekim dispela pilai long pait na bagarapim man.” Long 1997, dispela lain bilong gavman i tambuim wanpela pilai bilong kompyuta i givim “mak long ol yangpela i pilai long en taim ol i kilim i dai ol man i wokabaut long rot, em sampela bilong ol em ol lapun meri na ol meri i gat bel.” Mausmeri bilong wanpela lain (Procon), em i tok: “Ol dispela kain pilai bilong kompyuta ol i nogut na ol inap bagarapim yumi, long wanem, ol i save kamapim pasin bilong pait na bagarapim man. Ol pikinini i kisim tingting olsem ol dispela kain pasin i no gat rong.”

No Ken Pinisim Nating Paua

Wanpela nius (Apotheken Umschau) i tok: “Inap 11 pesen bilong paua ol manmeri bilong Jemani i save pinisim long haus o ofis bilong ol, em i lus long sampela samting i stap nating long paua na ol i no mekim wok long en.” Sampela ripot long Jemani i tok, ol televisen, ol kaset, ol kompyuta, na ol narapela samting i wok long paua na ol i stap nating long paua, ol i save pinisim bikpela hap paua (inap 20.5 bilion kilowat-aua) long olgeta yia. Dispela i winim tru paua ol manmeri long Belin i save pinisim long olgeta yia, na Belin em nambawan bikpela taun long Jemani. Sapos yu mekim i dai paua bilong sampela samting yu no mekim wok long en, orait paua i no ken pinis nating na yu no ken tromoi nating mani bilong yu tu.

Marasin Giaman

Wanpela nius (Le Figaro Magazine) i tok: “Long olgeta hap, inap 8 pesen bilong ol marasin ol stua samting i baim i go long ol man, em ol marasin giaman.” Lain Wol Helt Oganaisesen i tok, ol i ting inap 30 pesen bilong ol marasin long Brasil, em ol marasin giaman, na long Naijiria ol i ting dispela kain marasin i planti moa, olsem 60 pesen. Wok bisnis long marasin giaman em bikpela bisnis tru​—⁠olsem 300 bilion dola, na ol bikpela lain i wok olsem raskol, ol i go pas long dispela wok bisnis. Maski ol kampani bilong wokim marasin ol i wok strong long pinisim dispela wok bisnis nogut, ol polis na sampela lain long olgeta hap bilong graun, ol i no painim rot bilong stretim dispela hevi. Marasin giaman inap helpim tingting bilong sikman long i stap isi, tasol samting nogut bilong en, em inap kilim em i dai. Dispela nius i tok moa: ‘Marasin giaman inap bagarapim tru skin bilong sikman.’

Ol Bus Samting i Laik Pinis

Long olgeta hap bilong graun, ol saveman bilong ol bus, olsem diwai gras samting, ol i ting olsem: Long ol 270,000 kain kain diwai gras samting ol i save long en, inap 12.5 pesen​—em wanpela long olgeta 8-pela​—ol inap pinis olgeta. Nius The New York Times i tok: “Long olgeta 10-pela 10-pela diwai gras samting i stap long lista, 9-pela i stap long wanpela kantri tasol, olsem na kwiktaim ol inap pinis olgeta taim hevi bilong mani i go bikpela tru long kantri o ples na i gat planti hevi moa long sindaun bilong ol man.” Ol saientis i kamapim tupela bikpela samting i olsem as na ol bus i wok long pinis: (1) ol man i save pinisim ol bikpela hap bus taim ol i wokim ol haus o rot samting, na ol i katim planti diwai tumas, na ol i katim na rausim bus bilong wokim gaden, na (2) ol narapela diwai gras samting i no bilong wanpela bus, ol i save kamap planti long dispela bus na kilim ol diwai gras samting bilong en. Nius i tok, ol bus ‘i bikpela samting long helpim ol samting bilong graun long wok gut wantaim,’ winim ol animal na pisin. Na nius i tok moa long ol diwai gras samting, olsem: ‘Ol i save strongim planti samting i gat laip​—⁠yumi man tu​—⁠taim ol i mekim wok long strong bilong san bilong kamapim kaikai. Ol i as bilong planti marasin, na planti kaikai ol man i save planim, bipo ol i bin kam long ol dispela samting bilong bus. Na ol diwai gras samting i nambawan bikpela samting bilong graun​—⁠em i save helpim olgeta samting bilong en long i stap gut.’

Solwara i Bagarap

Wanpela nius (Nassauische Neue Presse) i tok: “Pasin bilong kisim planti pis tumas, na ol samting i stap insait long solwara olsem marasin nogut i gat gip na ol pipia bilong nuklia, ol dispela samting inap bagarapim ol samting i as bilong laip long graun.” Wanpela nius (Kieler Nachrichten) i tok, namba wan samting i bin kisim bagarap em solwara Blaksi. Ol i ting i no gat wanpela samting long graun i bagarap olsem dispela solwara. Klostu olgeta samting (inap 90 pesen) long en i dai pinis. Pekpek bilong toilet em ol i no bin mekim wanpela samting long en, ol i tromoi nating long dispela solwara, olsem na si i kam bruk long nambis bilong Yukren i doti nogut tru na kala bilong en i grin na braun. Na long yia i go pinis long taim bilong san, ol man inap go long nambis bilong Odesa long wanpela wik tasol, ol narapela wik nogat. Presiden bilong Romenia (Emil Constantinescu) i tok: “Bikpela bagarap tru i painim solwara Blaksi. Sapos yumi larim dispela solwara i bagarap olgeta, ol hevi bai painim yumi bai nogut moa.” Yunaitet Nesen i makim yia 1998 olsem “Intenesenel Yia Bilong Solwara.”

Ol i Kisim Sik Long Haus Sik

Wanpela nius bilong Frans (Le Figaro) i tok: “Ol sik i save kisim ol man long haus sik bihain long ol i kisim marasin o dokta i katim ol, em i wanpela bikpela hevi i painim ol man.” Long olgeta yia long Frans, inap 800,000 manmeri i save kisim sik long haus sik, na ol i ting inap 10,000 bilong ol i save dai. Haus sik inap mekim sampela samting na ol man i no ken kisim sik. Olsem: Ol i mas klinim gut ol rum slip long strongpela marasin bilong kilim ol jem pastaim long nupela sikman i slip long en, na ol i mas glasim gut pasin bilong haus sik long klinim ol tul samting dokta i save mekim wok long en, na taim ol dokta na nes i laik mekim wanpela samting long sikman, pastaim ol i mas wasim gut han bilong ol. Tasol planti taim ol i no save mekim ol dispela samting. Wanpela lain i bin skelim ol dokta na nes samting long wanpela haus sik long Paris na ol i kisim save olsem, inap 72 pesen tasol bilong ol dispela dokta na nes i save wasim han bilong ol bihain long ol i lukim ol wan wan sikman. Na inap 60 pesen bilong ol i tok, ol i save wasim han inap sotpela taim tasol. Nius i tok moa olsem, dispela ripot nogut i makim olsem ‘yumi ken ting ol i gat bikpela wok bilong stretim dispela hevi.’

Sia i Gat Let i Helpim Ol Man

Ol man i raun planti taim long balus ol i save, wantu tasol win inap sakim nabaut balus na dispela inap bagarapim o kilim i dai ol pasindia. Ol saveman bilong balus i tok i gat wanpela gutpela rot tasol yumi inap bihainim. Olsem: Long olgeta taim yumi sindaun long balus, yumi mas pasim let bilong sia. Wanpela nius (U. S. News & World Report) i tok: ‘Em hatwok tru long save win bai kirap na sakim nabaut balus o nogat, o long wanem hap win bai mekim olsem, o olsem wanem balus i ken abrusim dispela kain win.’ Ol saientis i tingting long wokim sampela samting em bai toksave long dispela kain win, tasol inap long nau ol pailot long klostu olgeta balus, ol i mas kisim toksave long ol narapela pailot em balus bilong ol i go pas long wankain rot. Klostu olgeta manmeri i kisim hap bagarap long taim win i sakim nabaut balus, ol i no bin pasim let bilong sia. Nius i tok moa: “Tasol ol kampani bilong balus i no save yet long olsem wanem ol bai subim ol pasindia long pasim let bilong sia.”

Longpela Bris i Winim Ol Narapela

Bris Akasi Kaiko long Japan i skruim ailan Awaji i go long biktaun Kobe, na ol i bin opim dispela bris long Epril. Wantu tasol ol i raitim nem bilong dispela bris long ol bikpela buk olsem wanpela longpela bris tru, i winim olgeta narapela bris i hangamap nating. Nius Time i tok: “Inap 10-pela yia ol i bin wok long dispela bris na pe bilong en i olsem klostu 8 bilion dola. Longpela bilong en namel long 2-pela traipela pos bilong en i olsem 1,991 mita. Ol wan wan pos i save go antap tru, winim haus i gat 90 plua long en, na ol wan wan pos i gat 20 masin samting insait long en bilong helpim bris na i no ken meknais tumas. Sapos win i mekim na bris i meknais, i gat ol hevipela samting i save pulim ol pos i kam bek.” Na ol i bin wokim dispela bris gutpela tru, olsem na maski bikpela guria i kamap na mak bilong strong bilong en i olsem 8.0, em i no ken pundaun. Sapos ol i skruim strongpela waia bilong bris wantaim, longpela bilong en inap raunim graun inap 7-pela taim.

Long Yunaitet Stets Ol i Laikim Gan

Nius The Economist i tok: “Yunaitet Stets i narapela kain long ol narapela kantri. Long 1996, ol i bin mekim wok long han-gan bilong kilim i dai 2-pela man long Nu Silan, 15 man long Japan, 30 man long Briten, 106 man long Kanada, 211 man long Jemani, na 9,390 man long Yunaitet Stets.” Long olgeta yia long Yunaitet Stets, long rot bilong ol han-gan, inap 500,000 pasin raskol i save kamap na 35,000 manmeri i save dai, em sampela i kilim i dai skin bilong ol o birua i painim ol. Tasol ol manmeri long Yunaitet Stets i gat gan, “ol i laik holim yet gan bilong ol, maski planti man i dai long gan. Ol i no laik bai gavman i tambuim gan olsem planti kantri i bin mekim, nogat; ol i gat bikpela laik moa long kisim han-gan.” Long nau, inap 31 provins long Yunaitet Stets i save givim laisens long ol man bambai ol inap karim han-gan long ples hait.