Wanpela Bikpela Senis Bilong Helpim Ol Man
‘Long yia 1900 i gat wanpela bikpela senis i laik kirap long graun. Pasin bilong bipo i laik pinis na nupela taim bai kamap.’—The Times Atlas of the 20th Century.
OLSEM dispela buk i tok, bihain liklik long yia 1900, ‘taim bilong kros pait na bagarapim man i kamap bikpela tru.’ Kirap long yia 1900 na i kam inap nau i gat planti pait moa, winim olgeta taim bipo. Winim 100 milion manmeri ol i dai.
Long taim bilong yumi, ol pait i bin kilim i dai planti manmeri i no insait long pait, winim olgeta taim bipo. Long Namba Wan Pait, inap 15 pesen bilong ol man i dai em ol man i no insait long pait. Tasol long sampela kantri long taim bilong Namba Tu Pait, namba bilong ol man i no insait long pait na ol i dai, em i winim namba bilong ol soldia i bin dai. Kirap long dispela taim na i kam, planti bilong ol milion milion manmeri ol i bin dai long taim bilong pait, em ol manmeri i no bin insait long pait. Ol dispela pasin nogut tru i bin truim tok profet bilong Baibel long man i sindaun long retpela hos, na em i gat “strong bilong pinisim gutpela taim bilong ol manmeri bilong graun.”—KTH 6:3, 4; Matyu 24:3-7.
Tingting na Pasin i Senis
Taim bilong yumi i truim tok bilong 2 Timoti 3:1-5, em i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.”
Tru, long bipo na i kam inap nau, ol man i bin kamapim ol dispela kain pasin. Tasol long taim bilong yumi, kain tingting na pasin olsem i bin kamap strong na i kisim planti man. Bipo, sapos ol man i mekim ol dispela pasin nogut Baibel i stori long en, ol narapela bai ting ol i man bilong bagarapim sindaun bilong ol man, na ol i man nogut tru. Tasol nau, planti manmeri “i bihainim pasin bilong God long skin,” ol tu i ting ol dispela kain pasin i no gat rong.
Long bipo, ol manmeri bilong lotu ol i bin ting i no stret liklik long man na meri i no marit ol i sindaun nating wantaim. Na ol i bin ting meri singel i kamapim pikinini, em samting bilong sem long en, na ol i gat wankain tingting long tupela man i save slip wantaim. Na tu, planti manmeri ol i bin ting pasin bilong rausim bel em wanpela pasin i no stret liklik, na ol i bin ting olsem long pasin bilong katim marit tu. Ol i bin ting pasin bilong paulim mani samting long wok bisnis, em samting man i mas kisim strafe long en. Tasol long nau, olsem wanpela man bilong raitim buk i tok, “maski man i mekim wanem kain pasin, dispela i olsem i no gat rong.” Bilong wanem i olsem? Long wanem, “dispela kain tingting i save amamasim ol man i save tingim ol yet tasol na ol i no laik bai ol narapela i tokim ol long wanem samting ol i no ken mekim.”
Pasin bilong ol man long nau long lusim ol stretpela lo, dispela i mekim na tingting bilong ol man long wanem ol samting i bikpela samting tru, em i senis. Wanpela buk (The Times Atlas of the 20th Century) i tok: ‘Long yia 1900, ol kantri na ol man i bin ting, taim ol i skelim pasin bilong ol i gutpela o nogat, ol i no tingim mani bilong ol na ol i skelim, nogat. Tasol long nau, sapos ol kantri i gat bikpela mani, orait ol bai tok wok bilong ol i bin kamap gutpela. Kain senis olsem i bin kamap long tingting bilong ol man long ol samting olsem mani kago.’ Long nau, planti man i save pilai laki na dispela i kirapim ol long laikim tumas mani. Na redio, televisen, piksa wokabaut, na video, ol i kirapim man long laikim tumas ol samting bilong skin. Na tu, ol program i kamap long TV olsem ol man i resis long bekim sampela askim bilong winim prais, dispela i skulim ol man olsem mani i bikpela samting.
Stap Wantaim Tasol i Olsem Ol i Stap Longwe
Long yia 1900 samting, planti manmeri ol i bin sindaun long ples. Ol man i tok, bihain liklik long yia 2000, winim 3 bilion manmeri bai ol i sindaun long ol biktaun. Wanpela buk (5000 Days to Save the Planet) i tok: ‘Wok bilong helpim ol man long nau—na ol lain bai kamap bihain tu—long kisim gutpela sindaun long ol biktaun, em bikpela hevi tru i olsem yumi no inap winim.’ Nius bilong Yunaitet Nesen (World Health) i tok: ‘Namba bilong ol manmeri i save sindaun long ol biktaun i wok long i go antap moa. Planti handet milion manmeri ol i sindaun long ol hap em inap kamapim sik samting, na dispela kain sindaun inap kilim ol i dai tu.’
Olsem na maski ol man i wok long lusim ples na kam sindaun long ol biktaun, ol i no pas gut wantaim—i olsem ol i stap longwe moa long ol narapela! Televisen, telefon, Intenet, na ol narapela kain samting olsem, ol inap helpim ol man, tasol long rot bilong ol dispela samting ol man i no save bungim narapela man. Olsem na wanpela nius bilong Jemani i tok: “Taim bilong yumi em wanpela taim ol man i kamap planti tumas long en. Na tu, em wanpela taim bilong i stap bel hevi olsem man i wanpis.”—Nius Berliner Zeitung.
Dispela i save kamapim sampela bikpela hevi olsem wanpela i bin kamap long Hambek, Jemani. Ol i bin painim skin bilong wanpela man insait long haus bilong em 5-pela yia bihain long taim em i dai! Wanpela nius i tok: “I no gat wanpela man i bin tingim em, maski em ol wanblut o ol man i sindaun klostu o polis samting. Long planti man dispela i makim sindaun bilong ol man long biktaun—i olsem ol i stap wanpis na ol man i no save long ol o toktok wantaim ol.”—Nius Der Spiegel.
Asua bilong ol dispela samting nogut i no stap tasol long ol man bilong saiens na ol nupela save ol i kisim, nogat. Bikpela hap asua i stap long ol man yet. I no gat narapela taim olsem taim bilong yumi na i gat planti man moa ‘ol i laikim ol yet tasol, na ol i laikim tumas long kisim mani, na ol i no tok tenkyu, na ol i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol, na ol i birua long olgeta gutpela pasin, na ol i laikim tumas ol kain kain pasin bilong amamas bilong dispela graun, na ol i no laikim God.’—2 Timoti 3:1-5.
1914, Wanpela Bikpela Yia
Winston Churchill i tok: ‘Yia 1900 samting i olsem gutpela taim na i no gat hevi.’ Planti man ol i ting bel isi na gutpela sindaun bai kamap, winim olgeta taim bipo. Tasol long yia 1905, Wastaua (tok Inglis) bilong Septemba 1, i toksave olsem: “I no longtaim na pait bai kamap gen.” Na tu, nius i tok wanpela “bikpela bagarap” bai kirap long yia 1914.
Long yia 1879, dispela nius i makim yia 1914 olsem wanpela bikpela yia. Sampela yia bihain dispela nius i tok, sampela tok profet bilong Baibel i stap long Buk Daniel i makim dispela yia olsem taim Kingdom bilong God i bin kamap long heven. (Matyu 6:10) Tru, yia 1914 em i no taim bilong Kingdom i ken bosim tru olgeta samting long graun, nogat, em taim bilong Kingdom i kamap.
Baibel i tok profet olsem: “Taim ol dispela king [long taim bilong yumi] i stap yet God bai i kirapim wanpela kingdom [long heven] na dispela kingdom bai i stap oltaim oltaim.” (Daniel 2:44) Dispela Kingdom, wantaim Krais olsem King bilong en, i bin kirap bungim ol manmeri hia long graun, em ol i save pret long God na ol i gat laik long i stap aninit long Kingdom.—Aisaia 2:2-4; Matyu 24:14; KTH 7:9-15.
Long wankain taim olsem samting i bin kamap long heven, yia 1914 i kirapim “taim bilong las de,” em kirap bilong wanpela hap taim em bai pinis long taim dispela pasin nogut bilong nau i pinis. Jisas i bin tok profet olsem long dispela taim bai i gat ol bikpela pait, kaikai bai sot, ol bikpela sik bai kamap, pasin nogut bai go bikpela, na planti man i tok ol i Kristen bai ol i wok long lusim pasin bilong laikim tru God na ol narapela man. Em i tok, ol dispela samting “em i olsem pen i save kamap pastaim long meri i laik karim pikinini.”—Matyu 24:3-12.
Klostu Nau Nupela Taim Tru Bai Kamap
Yumi stap 85 yia pinis long “taim bilong las de,” na pinis bilong dispela pasin nogut tru nau yumi stap long en i wok long i kam klostu hariap. Klostu nau Kingdom bilong God, em Krais i bosim, bai i “bagarapim ol arapela king [i stap nau] na kingdom bilong en bai i stap oltaim.”—Daniel 2:44; 2 Pita 3:10-13.
Tru tumas, God bai kirap na pinisim ol pasin nogut i stap long graun na em bai kisim ol manmeri i gat stretpela bel i go insait long nupela taim tru. “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em.”—Sindaun 2:21, 22.
Man! Em gutpela tok tru—em wanpela tok yumi mas autim long olgeta hap! Klostu nau Kingdom bilong God bai stretim ol hevi em ol i go bikpela moa long taim bilong yumi—olsem pait, stap rabis olgeta, sik, karim hevi bilong ol pasin i no stret ol man i mekim long ol narapela, birua long ol man bilong narapela lotu o skin, no gat wok mani, pasin raskol, no stap amamas, na indai.—Lukim Song 37:10, 11; 46:8, 9; 72:12-14, 16; Aisaia 2:4; 11:3-5; 25:6, 8; 33:24; 65:21-23; Jon 5:28, 29; KTH 21:3, 4.
Olsem wanem? Yu amamas long yu inap tingting long kisim laip i stap oltaim oltaim long stretpela pasin bai kamap long graun? Orait askim ol Witnes Bilong Jehova long tokim yu moa long dispela. Long Baibel bilong yu yet, ol bai soim yu olsem ol yia bilong bikpela senis i bin kirap long yia 1900 samting na i kam inap nau, klostu nau bai pinis na bihain long en bai yu inap kisim ol gutpela blesing inap oltaim oltaim!
[Piksa long pes 10]
Klostu nau nupela taim tru bai kamap