Ol Famili i No Gat Papa—Mak Bilong Taim Bilong Yumi
YU TING wanem samting i wanpela bikpela hevi long sindaun bilong ol man long nau? Lain Gallup i givim dispela askim long sampela man long Yunaitet Stets, na planti (80 pesen) ol i tok dispela hevi i olsem: “Papa i no stap wantaim famili.” Lain Gallup i tok, inap olsem 27 milion pikinini long Yunaitet Stets i no sindaun wantaim papa tru bilong ol, na dispela namba i wok long i go bikpela hariap. Ripot bilong wanpela lain (United Nations Children’s Fund) i tok, inap 50 pesen bilong ol pikinini waitskin em ol i bin kamap long Yunaitet Stets kirap long 1980 na i kam inap nau “taim ol i pikinini yet ol i sindaun inap sampela hap taim insait long famili i gat papa o mama tasol. Na inap 80 pesen bilong ol pikinini blakskin bai sindaun long kain famili olsem.” Olsem na nius USA Today i tok, Yunaitet Stets “i gat planti famili i no gat papa, winim ol narapela kantri.”
Tasol wanpela stori long nius The Atlantic Monthly i tok: “Dispela hevi bilong ol famili i bruk i no go bikpela long Amerika tasol, nogat. Dispela samting i save kamap long klostu olgeta kantri i gat gutpela sindaun, long Japan tu.” Tru, i hatwok long kisim save long hamas famili tru i gat dispela hevi, tasol ating dispela hevi i stap long ol kantri i stap rabis tu. Wanpela nius (World Watch) i tok, “planti man [long ol kantri i stap rabis] i save lusim meri pikinini bilong ol, long wanem, hevi long mani i go bikpela.” Wanpela lain i skelim ol famili long wanpela kantri bilong Karibian, ol i kisim save olsem sampela papa tasol (22 pesen) em ol i gat pikinini i gat 8-pela krismas, ol i save sindaun wantaim pikinini bilong ol.
Long taim bilong ol man i bin raitim Baibel tu i gat ol pikinini i no gat papa. (Lo 27:19; Song 94:6) Tasol long dispela taim bipo nambawan as na ol pikinini i no gat papa em olsem: Papa bilong ol i dai pinis. Man bilong raitim buk, em David Blankenhorn, em i tok: “Long nau planti pikinini i no gat papa, long wanem, papa i no laik stap wantaim famili.” Tru tumas, olsem yumi bai lukim, namba bilong ol pikinini i no gat papa i go bikpela, na dispela i kamapim klia olsem planti man long nau ol i no “save long pasin bilong i stap pren bilong ol arapela.” Baibel i tok, dispela em i wanpela samting moa bilong kamapim klia olsem yumi stap long “taim bilong las de.”—2 Timoti 3:1-3.
Tasol taim papa i lusim liklik pikinini, dispela i bagarapim tru bel bilong em. Dispela i kamapim pen na bikpela bel hevi na em i ken nogutim pikinini inap longpela taim. Olsem na long ol dispela stori bai mipela i toktok long ol dispela hevi, tasol mipela i no laik bagarapim bel bilong ol man i ritim ol dispela stori, nogat; mipela i laik kamapim sampela tok bilong helpim ol famili na dispela samting nogut i no ken painim ol.